Mahesana News: મહેસાણા જિલ્લાના કડી તાલુકાના ઈન્દ્રાડ ગામની સીમમાં આજે એક એવી ગોઝારી ઘટના બની છે, જે સાંભળીને કોઈપણનું હૃદય દ્રવી ઉઠે. પિતાની છત્રછાયામાં રહીને કામ શીખતા અને પરિવારને આર્થિક ટેકો આપતા 19 વર્ષીય યુવાનનું પોતાના જ પિતાના હાથે અકસ્માતે મોત નીપજ્યું છે. પિતા જ્યારે ટ્રક રિવર્સ લઈ રહ્યા હતા ત્યારે તેમનો પુત્ર પાછળના ભાગે કચડાઈ ગયો હતો. પોતાની જ નજર સામે જુવાનજોધ દીકરાને લોહીલુહાણ હાલતમાં દમ તોડતા જોઈ લાચાર પિતા પર જાણે આભ તૂટી પડ્યું હતું.
રાજસ્થાનથી માલ ભરીને આવ્યા હતા
મળતી વિગતો અનુસાર, મૂળ રાજસ્થાનના બાડમેર જિલ્લાના વતની દેવારામ ચૌધરી ટ્રક ડ્રાઈવિંગ કરી પરિવારનું ભરણપોષણ કરે છે. તેમનો 19 વર્ષીય પુત્ર મુકનારામ પણ પિતાને એકલતા ન લાગે અને કામમાં મદદ થાય તે હેતુથી તેમની સાથે જ રહેતો હતો. તારીખ 23 ડિસેમ્બરે આ બાપ-દીકરો જેસલમેરથી ટ્રકમાં માલ ભરીને ઈન્દ્રાડની 'ગ્રીનફિલ્ડ ડેરિવેટિવ્ઝ' કંપનીમાં આવ્યા હતા. 24મીની વહેલી સવારે સાત વાગ્યે જ્યારે કંપનીમાં માલ ખાલી કરવાની તૈયારી ચાલી રહી હતી, ત્યારે જ આ દુર્ઘટના ઘટી હતી.
દીવાલ અને ટ્રક વચ્ચે યુવાન દબાયો
દુર્ઘટના ત્યારે બની જ્યારે પિતા દેવારામભાઈ ટ્રકને રિવર્સમાં લઈ કંપનીના શેડમાં ગોઠવી રહ્યા હતા. પુત્ર મુકનારામ પાછળ ઉભો રહી પિતાને સાઈડ આપી રહ્યો હતો. આ દરમિયાન ટ્રક અને દીવાલની વચ્ચે એક લોખંડનું સ્ટેન્ડ નડતરરૂપ બનતા મુકનારામ તેને ખસેડવા માટે ગયો હતો. કમનસીબે પિતાનું ધ્યાન ન રહેતા તેમણે ટ્રક રિવર્સ લેવાનું ચાલુ રાખ્યું હતું. પળવારમાં જ મુકનારામ દીવાલ, લોખંડના સ્ટેન્ડ અને ભારેખમ ટ્રકની વચ્ચે લોખંડના ગજની જેમ દબાઈ ગયો હતો.
પિતાની નજર સામે જ અંતિમ શ્વાસ લીધા
ટ્રક અને દીવાલ વચ્ચે ભીંસાઈ જવાથી મુકનારામને છાતી અને શરીરના અન્ય ભાગે ગંભીર ઈજાઓ પહોંચી હતી. પુત્રની કારમી ચીસ સાંભળીને પિતાએ તુરંત બ્રેક મારી હતી અને નીચે ઉતરીને જોયું તો કાળજું કંપી જાય તેવા દ્રશ્યો હતા. તેમનો પુત્ર લોહીલુહાણ હાલતમાં ફસાયેલો હતો. આસપાસના લોકો દોડી આવ્યા હતા, પરંતુ ત્યાં સુધીમાં ઘણું મોડું થઈ ચૂક્યું હતું. ગંભીર ઈજાઓને કારણે મુકનારામે પિતાની નજર સામે જ અંતિમ શ્વાસ લીધા હતા.
દીકરો ગુમાવતા પરિવારમાં માતમ
19 વર્ષની ઉંમર એટલે કે જે ઉંમરે યુવાન પોતાના સપના પૂરા કરવાની શરૂઆત કરે, તે જ ઉંમરે મુકનારામની જીવનલીલા સંકેલાઈ ગઈ છે. રાજસ્થાનથી ગુજરાત કમાવા માટે આવેલા આ પરિવાર પર કાળનો પંજો ફરી વળ્યો છે. પોતાની જ એક ભૂલથી દીકરાને ગુમાવનાર પિતાની હાલત અત્યંત દયનીય છે. તેઓ આઘાતને કારણે કશું બોલી શકવાની સ્થિતિમાં પણ નથી. ટ્રાન્સપોર્ટ વ્યવસાય સાથે સંકળાયેલા અન્ય ચાલકોમાં પણ આ ઘટનાને પગલે શોકનું મોજું ફરી વળ્યું છે.
પોલીસે તપાસ શરૂ કરી
બનાવની જાણ થતા જ કડી પોલીસનો કાફલો ઘટનાસ્થળે પહોંચી ગયો હતો. પોલીસે મૃતદેહને પોસ્ટમોર્ટમ માટે ખસેડી અકસ્માતે મોતના ગુનાની દિશામાં તપાસ હાથ ધરી છે. આ ઘટનાએ ફરી એકવાર કંપનીઓમાં લોડિંગ-અનલોડિંગ દરમિયાન રાખવામાં આવતી તકેદારી અને સુરક્ષાના નિયમો સામે સવાલ ઉભા કર્યા છે. પિતા-પુત્રના પવિત્ર સંબંધમાં આ ગોઝારી ઘટનાએ ક્યારેય ન ભરાય તેવો ઘા આપ્યો છે.
