Suspicious Scooter Rider Intercepted by Ahmedabad Police: અમદાવાદ શહેરના પૂર્વ વિસ્તારમાં ગુનાખોરી અને નશીલા પદાર્થોની હેરાફેરી રોકવા માટે પોલીસ દ્વારા સતત ઘનિષ્ઠ પેટ્રોલિંગ કરવામાં આવી રહ્યું છે. આ દરમિયાન ગોમતીપુર પોલીસ સ્ટેશનની ટીમ જ્યારે વિસ્તારમાં પેટ્રોલિંગમાં હતી, ત્યારે ચતુરસિંગ ચાર રસ્તાથી હરીભાઈ ગોદાણી સર્કલ તરફ જવાના માર્ગ પર એક યુવક નંબર પ્લેટ વગરનું સ્કૂટર લઈને પસાર થઈ રહ્યો હતો. નંબર પ્લેટ ન હોવાથી પોલીસને શંકા ગઈ હતી, જેથી પોલીસે તાત્કાલિક તે સ્કૂટર ચાલકને અટકાવ્યો હતો.
તપાસ દરમિયાન સ્કૂટરમાંથી મળી આવ્યો માદક પદાર્થનો જથ્થો
પોલીસે અટકાવેલા 20 વર્ષીય યુવકની પ્રાથમિક પૂછપરછ કરતાં તેણે પોતાનું નામ ફરદીન ઉર્ફે ડુગ્ગુ ઉમરહુસેન મોહમદઅલી સૈયદ હોવાનું જણાવ્યું હતું. તે સરસપુરના આઈટીઆઈ રોડ પર આવેલા ગીરધર માસ્ટર કમ્પાઉન્ડમાં રહે છે. પોલીસે તેના બર્ગમેન સ્કૂટરની ઝીણવટભરી તપાસ હાથ ધરતાં તેમાંથી સેલોટેપથી વીંટાળેલા 3 શંકાસ્પદ પાર્સલ મળી આવ્યા હતા. જેથી સ્થળ પર જ વધુ તપાસ અર્થે પ્રક્રિયા હાથ ધરવામાં આવી હતી.
એફએસએલ તપાસમાં ગાંજો હોવાની થઈ પુષ્ટિ
ઘટનાની ગંભીરતાને ધ્યાનમાં રાખીને એફએસએલ (FSL) અધિકારીને ઘટનાસ્થળે બોલાવવામાં આવ્યા હતા. એફએસએલ ટીમે કેમિકલ કિટ વડે સ્થળ પર જ પરીક્ષણ કરતાં મળી આવેલો પદાર્થ નશીલો ગાંજો હોવાનું સ્પષ્ટ થયું હતું. ડિજિટલ કાંટા પર આ જથ્થાનું વજન કરાવતાં કુલ 3.093 કિલોગ્રામ ચોખ્ખો ગાંજો હોવાનું સામે આવ્યું હતું, જેની બજાર કિંમત અંદાજે રૂ. 1,54,650 જેટલી થાય છે.
મુખ્ય સપ્લાયરનું નામ સામે આવ્યું
પોલીસ દ્વારા કરવામાં આવેલી આકરી પૂછપરછમાં આરોપી ફરદીન ઉર્ફે ડુગ્ગુએ કબૂલાત કરી હતી કે આ ગાંજાનો જથ્થો તે ગોમતીપુરના મદની મહોલ્લામાં રહેતા ફકરુદ્દીન ઉર્ફે ટકલો ઉર્ફે મુલ્લા પાસેથી લાવ્યો હતો અને તેનું છૂટક વેચાણ કરવાનો હતો. પોલીસે ગાંજો, મોંઘાદાટ સ્કૂટર અને અન્ય સામાન મળીને કુલ રૂ. 2.54 લાખનો મુદ્દામાલ જપ્ત કર્યો છે.
પોલીસે ગુનો નોંધી આગળની કાયદેસરની કાર્યવાહી ધરી
ગોમતીપુર પોલીસે આરોપી ફરદીનની અટકાયત કરીને તેની સામે નાર્કોટિક્સ એક્ટ હેઠળ ગુનો નોંધ્યો છે. આ સાથે જ આ રેકેટના મુખ્ય સપ્લાયર ફકરુદ્દીન ઉર્ફે ટકલાને ફરાર જાહેર કરી તેની શોધખોળ હાથ ધરી છે. આ નશીલો પદાર્થ ક્યાંથી લાવવામાં આવ્યો હતો અને શહેરમાં અન્ય કોને કોને સપ્લાય કરવાનો હતો તે દિશામાં પોલીસે તપાસના ચક્રો ગતિમાન કર્યા છે.
