Ahmedabad Farki Lassi Controversy Viral Video: અમદાવાદ શહેરના પૂર્વ વિસ્તારમાં આવેલા મણિનગરના કૃષ્ણબાગ પાસેની પ્રખ્યાત 'ફરકી' (Farki) લસ્સી શોપમાંથી એક ચોંકાવનારો કિસ્સો સામે આવ્યો છે. અહીંથી ખરીદેલી પેક્ડ મલાઈ લસ્સીમાંથી જીવાત (જીવજંતુ) નીકળતાં ગ્રાહકે વીડિયો ઉતારી સોશિયલ મીડિયા પર વાયરલ કર્યો છે. સરસપુરના રહીશ વ્રજ બારોટ નામના યુવકે 4થી 5 ચમચી લસ્સી પીધા બાદ અંદરથી જીવાત નીકળતાં ભારે આક્રોશ વ્યક્ત કર્યો હતો. આ અંગે દુકાનના સ્ટાફ અને મેનેજર પાસે રજૂઆત કરવામાં આવતાં તેમણે જવાબદારીમાંથી છટકવાનો પ્રયાસ કર્યો હતો.
4થી 5 ચમચી લસ્સી પીધા પછી નીચેથી જીવાત ઉપર આવી
મળતી માહિતી મુજબ, સરસપુર વિસ્તારમાં રહેતો વ્રજ બારોટ તેના મિત્ર સાથે ૪ સપ્ટેમ્બરની સાંજે મણિનગર સ્થિત ફરકી લસ્સીના આઉટલેટ પર ગયો હતો. તેણે મલાઈ લસ્સીનો ઓર્ડર આપ્યો હતો અને લસ્સીનું પેકિંગ ખોલીને પીવાનું શરૂ કર્યું હતું. ચારથી પાંચ ચમચી પીધા પછી જ્યારે તેણે ચમચી અંદર બોળી ત્યારે લસ્સીના તળિયેથી જીવાત ઉપર આવી હતી. આ દ્રશ્ય જોઈને યુવક દંગ રહી ગયો હતો અને તુરંત જ તેણે આ અંગે સ્ટોરના કર્મચારીઓ અને મેનેજરનું ધ્યાન દોર્યું હતું.
સ્ટાફે રિફંડ આપવાની વાત કરી, મેનેજરે કહ્યું- 'ભૂલથી આવી ગઈ હશે'
ગ્રાહક વ્રજે આટલી મોટી અને પ્રખ્યાત ફ્રેન્ચાઈઝીમાં લોકોના આરોગ્ય સાથે થતી આવી લાપરવાહી સામે વિરોધ નોંધાવ્યો હતો. ત્યારે ત્યાંના સ્ટાફે પૈસા પાછા આપી દેવાની ઓફર કરી હતી. ગ્રાહકે પૈસા લેવાનો સ્પષ્ટ ઈનકાર કરી દીધો હતો અને હેલ્થ સેફ્ટી અંગે સવાલ ઉઠાવ્યા હતા. ત્યારબાદ સ્ટાફે એવો બચાવ કર્યો હતો કે જીવાત ઉપરથી પડી હશે. જોકે ગ્રાહકે તર્ક આપ્યો હતો કે જો ઉપરથી પડી હોત તો તરતી હોત, જ્યારે આ જીવાત લસ્સી પીધા પછી અંદરથી નીચેથી ઉપર આવી છે. જ્યારે સ્ટોરના મેનેજર સાથે વાત કરવામાં આવી ત્યારે તેમણે બિનજવાબદાર નિવેદન આપતાં કહ્યું હતું કે, "ભૂલથી આવી ગઈ હશે."
AMCના ફૂડ વિભાગે તપાસ હાથ ધરી
આ અંગે વીડિયો વાયરલ થયા બાદ અમદાવાદ મ્યુનિસિપલ કોર્પોરેશન (AMC) ના ફૂડ વિભાગના ડેપ્યુટી હેલ્થ ઓફિસર ડૉ. તેજસ શાહે જણાવ્યું હતું કે, આ ઘટના અંગે અમને જાણ થઈ છે અને આ મામલે મણિનગર સ્થિત ફરકી આઉટલેટ પર ટીમ મોકલી તપાસ પ્રક્રિયા હાથ ધરવામાં આવશે. જોકે ગ્રાહકે સત્તાવાર રીતે લિખિત ફરિયાદ નોંધાવી નથી, પરંતુ વાયરલ વીડિયોના આધારે યોગ્ય કાર્યવાહી કરવામાં આવશે.
ફૂડ સેફ્ટી અને ગ્રાહક અધિકારો અંગે વિશેષ માહિતી
ફૂડ સેફ્ટી એન્ડ સ્ટાન્ડર્ડ્સ એક્ટ (FSSAI Rules): ખાદ્યપદાર્થોમાં કોઈ પણ પ્રકારની જીવાત, કચરો કે અસ્વચ્છતા જોવા મળે તો તે FSSAIના નિયમોનું સ્પષ્ટ ઉલ્લંઘન છે. આવા કિસ્સામાં સંબંધિત આઉટલેટને નોટિસ પાઠવવામાં આવે છે, સેમ્પલ ફેલ થાય તો આઉટલેટ સીલ થઈ શકે છે અને દંડ પણ થઈ શકે છે.
ગ્રાહકે ક્યાં ફરિયાદ કરવી?: જો તમને કોઈ હોટેલ, રેસ્ટોરન્ટ કે પેક્ડ ફૂડમાં અસ્વચ્છતા કે ભેળસેળ જણાય, તો તમે તાત્કાલિક AMC ના કંટ્રોલ રૂમ પર અથવા FSSAI ની 'Food Safety Connect' એપ/પોર્ટલ પર ઓનલાઈન વિડીયો અને બિલ સાથે સીધી ફરિયાદ નોંધાવી શકો છો.
