Morbi LCB Busts Illegal Liquor Factory in Maliya: મોરબી જિલ્લામાં ગેરકાયદે પ્રવૃત્તિઓ પર લગામ લગાવવા માટે સક્રિય બનેલી લોકલ ક્રાઈમ બ્રાન્ચ (LCB)ની ટીમને એક મોટી અને મહત્વપૂર્ણ સફળતા સાંપડી છે. માળિયા તાલુકાના મોટા દહીસરા ગામે ચોક્કસ બાતમીના આધારે પોલીસે દરોડો પાડીને એક રહેણાંક મકાનમાં છૂપી રીતે ચાલતી નકલી વિદેશી દારૂ બનાવતી મીની ફેક્ટરીનો પર્દાફાશ કર્યો છે. બૂટલેગરો આ ઝેરી અને બનાવટી દારૂ તૈયાર કરીને બજારમાં સપ્લાય કરે તે પહેલાં જ પોલીસે દરોડો પાડીને તેમના આ કાળા કારોબારનો પર્દાફાશ કરી દીધો છે.
5 આરોપીઓ રંગેહાથ ઝડપાયા
પોલીસની પ્રાથમિક તપાસમાં બહાર આવેલી વિગતો મુજબ, આ ગેરકાયદેસર અને જોખમી ગોરખધંધો મહેશ ઉર્ફે મુનાભાઈ કાજીયા તેમજ અજયસિંહ ભાવુભા જાડેજા નામના શખ્સોના મકાનમાંથી ચલાવવામાં આવી રહ્યો હતો. બ્રાન્ડેડ બનાવટી વિદેશી દારૂ બનાવીને નિર્દોષ લોકોના સ્વાસ્થ્ય સાથે ખુલ્લેઆમ ખીલવાડ કરવામાં આવી રહ્યો હતો. પોલીસે ઘટનાસ્થળેથી આ નકલી દારૂ બનાવવાની પ્રક્રિયામાં સંકળાયેલા કુલ 5 શખ્સોને રંગેહાથ ઝડપી પાડી કાયદેસરની ધારાધોરણ મુજબ અટકાયત કરી લીધી છે.
1400 બોટલો પેક થાય તે પહેલાં કાર્યવાહી
દરોડા દરમિયાન દારૂ બનાવવાનું સ્થાન જોઈને પોલીસ અધિકારીઓ પણ ચોંકી ઉઠ્યા હતા. LCB ની ટીમે સ્થળ પરથી 400 લીટર જેટલું આલ્કોહોલયુક્ત ઝેરી કેમિકલ, કેમિકલ મિશ્રિત પાણી, કલર અને ફ્લેવરિંગ એસન્સનો મોટો જથ્થો કબજે કર્યો છે. આ સિવાય બનાવટી દારૂને અસલ બ્રાન્ડેડ લુક આપવા માટે રાખવામાં આવેલી 1400 નંગ ખાલી બોટલો, બુચ, પ્લાસ્ટિકના ઢાંકણાં તેમજ બ્લેન્ડર્સ વ્હિસ્કી બ્રાન્ડના નકલી સ્ટીકરો અને લેબલ સહિત લાખો રૂપિયાનો મુદ્દામાલ જપ્ત કરવામાં આવ્યો છે.
પોલીસે વધુ તપાસ હાથ ધરી
જો મોરબી LCB ની ટીમે સમયસર આ કાર્યવાહી ન કરી હોત, તો આશરે 1400 જેટલી બનાવટી દારૂની બોટલો બજારમાં વેચાણ માટે પહોંચી ગઈ હોત, જે લોકોના જીવ માટે અત્યંત જોખમી સાબિત થઈ શકી હોત. હાલમાં પોલીસે તમામ 5 આરોપીઓ સામે ગુનો નોંધી તેમની ઊંડાણપૂર્વક પૂછપરછ હાથ ધરી છે. આ નેટવર્કમાં અન્ય કયા બૂટલેગરો જોડાયેલા છે અને કેમિકલનો જથ્થો ક્યાંથી લાવવામાં આવ્યો હતો તે દિશામાં પોલીસે તપાસના ચક્રો ગતિમાન કર્યા છે.
