Singer Kinjal Rabari Gujarat High Court: લોકપ્રિય ગાયિકા કિંજલ રબારી અને તેમના પતિ અશોક ચૌધરીને ગુજરાત હાઇકોર્ટમાંથી મોટી રાહત મળી છે. અપહરણના કેસમાં કાયદાકીય કાર્યવાહી આગળ વધે તે પહેલાં દંપતીએ હાઇકોર્ટનો સંપર્ક કર્યો હતો અને વીડિયો કોન્ફરન્સિંગ મારફતે કોર્ટ સમક્ષ હાજરી નોંધાવી હતી. સુનાવણી દરમિયાન કિંજલ રબારીએ પોતાનું અપહરણ થયું ન હોવાનું અને તે પોતાની ઇચ્છાથી પતિ અશોક ચૌધરી સાથે હોવાનો ખુલાસો કર્યો હતો.
અશોક ચૌધરીની ધરપકડ સામે હાઇકોર્ટનો વચગાળાનો સ્ટે
અશોક ચૌધરી સામે નોંધાયેલી અપહરણની ફરિયાદના આધારે પોલીસ કાર્યવાહી અંગે હાઇકોર્ટમાં સુનાવણી થઈ હતી. દંપતી તરફથી રજૂઆત કરવામાં આવ્યા બાદ કોર્ટે અશોક ચૌધરીની ધરપકડ સામે વચગાળાનો સ્ટે આપ્યો છે. આ રાહતના પગલે હાલ પોલીસ અશોક ચૌધરીની ધરપકડ કરી શકશે નહીં.
કિંજલના નિવેદનથી અપહરણ કેસમાં નવો વળાંક
આ સમગ્ર મામલામાં સૌથી મહત્વનું એ છે કે કિંજલ રબારીએ કોર્ટ સમક્ષ પોતાનું અપહરણ થયું હોવાનો ઇનકાર કર્યો છે. તેમણે પોતાની મરજીથી અશોક ચૌધરી સાથે હોવાનું જણાવ્યું છે. કિંજલના આ નિવેદન બાદ અગાઉ નોંધાયેલી અપહરણની ફરિયાદ અને પોલીસ તપાસને લઈને કેસમાં નવો વળાંક આવ્યો છે. હવે હાઇકોર્ટના આદેશ અને બંને પક્ષની રજૂઆતોના આધારે આગળની કાયદાકીય પ્રક્રિયા નક્કી થશે. હાલ અશોક ચૌધરીને ધરપકડથી વચગાળાની રાહત મળી છે, જ્યારે સમગ્ર મામલે અંતિમ હકીકત અને કાયદાકીય સ્થિતિ આગળની કાર્યવાહી બાદ વધુ સ્પષ્ટ થશે.
