Kadi Road Accident: ગુજરાતના મહેસાણા જિલ્લાના કડી અને દક્ષિણ ગુજરાતના વાપીમાં મોડી રાત્રે બે અલગ-અલગ ગમખ્વાર અકસ્માતો સર્જાયા છે. કડીમાં રોડ નિર્માણના કામ દરમિયાન બે નિર્દોષ બાળકોના કમકમાટીભર્યા મોત નિપજ્યા છે, જ્યારે વાપીમાં હિટ એન્ડ રનની ઘટનામાં માનવતાને શરમાવે તેવા દ્રશ્યો સર્જાયા હતા. આ બંને ઘટનાઓએ સમગ્ર રાજ્યમાં અરેરાટી વ્યાપી દીધી છે.
કડી: રોડ પર સૂતેલા બે માસૂમ ભાઈઓ પર JCB ફરી વળ્યું
કડી-કલ્યાણપુરા રોડ પર નાની કડી ગામની સીમમાં શિવ શક્તિ કોટન ઇન્ડસ્ટ્રીઝ સામે એક હૃદયદ્રાવક અકસ્માત સર્જાયો હતો. અહીં છેલ્લા ચાર મહિનાથી આરસીસી (RCC) રોડ બનાવવાનું કામ ચાલી રહ્યું છે. ગત મોડી રાત્રે, જેસીબીનો ચાલક કપચીનો માલ નાખવા માટે મશીન રિવર્સ લઈ રહ્યો હતો. અંધારામાં ચાલકને રોડ કિનારે સૂઈ રહેલા બે બાળકો દેખાયા નહોતા અને ભારેભરખમ મશીન તેમના પર ફરી વળ્યું હતું.
અકસ્માતમાં 2 અને 4 વર્ષના બંને ભાઈઓના મોત
આ અકસ્માતમાં મૂળ મધ્યપ્રદેશના ઝાબુઆ જિલ્લાના શ્રમિક અલ્કેશભાઈના બે પુત્રો, 4 વર્ષીય કાલિક અને 2 વર્ષીય હાર્દિકનું ઘટનાસ્થળે જ કરુણ મોત નીપજ્યું હતું. આ અકસ્માત એટલો ભયાનક હતો કે માતા પોતાની વહાલસોયી સંતાનોની લાશો પાસે રાત્રે અઢી વાગ્યાથી સવાર સુધી ઘટનાસ્થળે જ બેસી રહી હતી. કડી પોલીસે સ્થળ પર પહોંચી જેસીબી ચાલક સામે કાયદેસરની કાર્યવાહી હાથ ધરી છે.
તંત્રની બેદરકારી અને ધૂળની ડમરીઓ
સ્થાનિકોના જણાવ્યા અનુસાર, આ રોડનું કામ અત્યંત ધીમી ગતિએ ચાલી રહ્યું છે. જકાત નાકા રામજી મંદિરથી નર્મદા કેનાલ સુધીના આ માર્ગ પર મોટી શાળાઓ આવેલી છે, પરંતુ રોડના ખોદકામને કારણે ઉડતી ધૂળની ડમરીઓથી વાહનચાલકો અને વિદ્યાર્થીઓ ભારે પરેશાન છે. રોડનો માત્ર એક ભાગ પૂર્ણ થયો છે જ્યારે ત્રણ ભાગ હજુ બાકી છે, જે શ્રમિકો અને સ્થાનિકો માટે જોખમી સાબિત થઈ રહ્યો છે.
વાપી: નેશનલ હાઈવે પર માનવતા મરી પરવારી
બીજી તરફ, દક્ષિણ ગુજરાતના ઔદ્યોગિક હબ વાપી નજીક બલીઠા વિસ્તારમાં નેશનલ હાઈવે-48 પર હિટ એન્ડ રનની એક કમકમાટીભરી ઘટના સામે આવી છે. અહીં એક અજાણ્યા રાહદારીને કોઈ વાહને ટક્કર મારતા તેનું મોત નીપજ્યું હતું. પરંતુ આશ્ચર્ય અને આઘાતની વાત એ છે કે, અકસ્માત બાદ મૃતદેહ 20 મિનિટ સુધી હાઈવે પર રઝળતો રહ્યો હતો. અંધારામાં પસાર થતા અનેક વાહનો આ મૃતદેહને કચડીને પસાર થઈ ગયા, છતાં એક પણ વાહનચાલકે માનવતા દાખવી વાહન થોભાવ્યું નહીં કે પોલીસને જાણ કરવાની તસ્દી લીધી નહીં. આ ઘટનાએ સમાજની સંવેદનશીલતા પર ગંભીર સવાલો ઉભા કર્યા છે. આ બંને ઘટનાઓ દર્શાવે છે કે માર્ગ સુરક્ષા અને માનવીય મૂલ્યોમાં કેટલી મોટી ખાઈ સર્જાઈ છે. કડીમાં શ્રમિક પરિવારના બે દીપક ઓલવાઈ ગયા છે, તો વાપીમાં રસ્તા પર રઝળતી લાશ પ્રત્યેની ઉદાસીનતાએ વ્યવસ્થા સામે આંગળી ચીંધી છે. હાલમાં પોલીસ બંને કેસોમાં વધુ તપાસ કરી રહી છે.
