Ahmedabad Garba Controversy: અમદાવાદના ન્યૂ સાયન્સ સિટી રોડ પર જીગરદાન ગઢવીની ‘સાચી નવરાત્રિ’ના એસી ડોમ ગરબામાં બીજા નોરતે ભારે હોબાળો થયો હતો. મોંઘા પાસ ખરીદ્યા હોવા છતાં ખેલૈયાઓને લાંબા સમય સુધી પ્રવેશ ન મળતાં તેઓ રોષે ભરાયા હતા. આયોજકો તરફથી યોગ્ય જવાબ ન મળતાં કેટલાક ખેલૈયાઓ ધક્કામુક્કી કરીને ડોમમાં ઘૂસી ગયા હતા. આ દરમિયાન પોસ્ટર ફાડવાની અને તોડફોડની ઘટના બની હતી. ખેલૈયાઓએ રિફંડની માગ સાથે સૂત્રોચ્ચાર પણ કર્યા હતા.
મોંઘા પાસ લીધા છતાં કલાકો સુધી એન્ટ્રી નહીં
મળતી માહિતી મુજબ, બીજા નોરતે રાત્રે 9 વાગ્યાથી ખેલૈયાઓ પાસ લઈને પ્રવેશદ્વાર પાસે રાહ જોઈ રહ્યા હતા. જોકે, લાંબા સમય સુધી તેમને એન્ટ્રી આપવામાં આવી નહોતી. પ્રવેશ કેમ અટકાવવામાં આવ્યો છે તે અંગે આયોજકો તરફથી સંતોષકારક જવાબ ન મળતાં લોકોમાં નારાજગી વધી હતી. અંતે કેટલાક ખેલૈયાઓએ ધક્કામુક્કી કરીને એસી ડોમમાં પ્રવેશ કર્યો હતો. આ દરમિયાન પોસ્ટર ફાડવામાં આવ્યાં હતાં અને તોડફોડ થઈ હતી. પાસના પૈસા પરત આપવાની માગ પણ ઉઠી હતી.
પોલીસની મંજૂરી ન મળતાં બીજા નોરતે ગરબા બંધ
આ વિવાદ પાછળ પોલીસની મંજૂરીનો મુદ્દો હોવાનું સામે આવ્યું છે. અહેવાલો અનુસાર, ગરબા યોજવા માટે જરૂરી પ્રક્રિયા પૂર્ણ ન થતાં પોલીસે બીજા નોરતે કાર્યક્રમની મંજૂરી આપી નહોતી. ફાયર વિભાગની પરવાનગી મળી હોવા છતાં ડોમના સ્ટ્રક્ચરની સ્થિરતા અંગેનો રિપોર્ટ બાકી હોવાથી પોલીસની મંજૂરી અટકી હોવાનું જણાવાયું છે. મંજૂરી ન મળતાં બીજા નોરતે ગરબા શરૂ થઈ શક્યા નહોતા.
પહેલા નોરતે મંજૂરી વગર ગરબા યોજાયાનો આક્ષેપ
આ સમગ્ર મામલે પહેલા નોરતાના આયોજન અંગે પણ સવાલો ઊભા થયા છે. અહેવાલો મુજબ, ફાયર વિભાગની એનઓસી અને પોલીસની મંજૂરી વિના જ રવિવારે રાત્રે ગરબા યોજાયા હતા. ફાયર વિભાગે ડોમની તપાસ દરમિયાન સલામતી સંબંધિત કેટલીક ખામીઓ નોંધાવી હતી અને જરૂરી સુધારા કરવા સૂચના આપી હતી. ફાયર વિભાગે ડોમમાં ખુલ્લા ઇલેક્ટ્રિક વાયરો, ઇમરજન્સી એક્ઝિટ, ફાયર એક્સ્ટિંગ્વિશર તેમજ ડોમના કપડાં અને ગ્રાઉન્ડની કાર્પેટ પર ફાયર-રેઝિસ્ટન્ટ સ્પ્રે જેવી વ્યવસ્થાઓ અંગે સૂચનાઓ આપી હોવાનું અહેવાલોમાં જણાવાયું છે. પ્રવેશ અને બહાર નીકળવાના રસ્તા તથા સ્થળની સ્વચ્છતા અંગે પણ ખામીઓ હોવાનો ઉલ્લેખ કરવામાં આવ્યો છે.
ફાયર સેફ્ટી અને તંત્રની કામગીરી અંગે સવાલો
ફાયર વિભાગની ટીમે ત્રણ દિવસ દરમિયાન સ્થળની તપાસ કરી હોવાનું અહેવાલોમાં જણાવાયું છે. જરૂરી સુધારા પૂર્ણ થયા હતા કે નહીં અને એનઓસી વિના પહેલા નોરતે ગરબા કેવી રીતે યોજાયા, તે અંગે સવાલો ઊભા થયા છે. ખેલૈયાઓ પાસેથી ઊંચી ફી વસૂલવામાં આવી હોવા છતાં સલામતીની વ્યવસ્થાઓ અધૂરી હોવાના આક્ષેપો પણ સામે આવ્યા છે. હાલ આ ઘટનાને પગલે ગરબાના આયોજનમાં પરવાનગીઓ, ફાયર સેફ્ટી અને ખેલૈયાઓની સુરક્ષાને લઈને ચર્ચા તેજ બની છે. જોકે, આયોજકો અને સંબંધિત તંત્ર તરફથી આ તમામ મુદ્દે સત્તાવાર સ્પષ્ટતા મળ્યા બાદ જ સમગ્ર મામલાની સ્થિતિ વધુ સ્પષ્ટ થશે.
