Bharuch Jhagadia GIDC factory blast Gujarat : ભરૂચ જિલ્લાના ઝઘડિયા GIDC વિસ્તારમાં આજે એક ગંભીર ઔદ્યોગિક અકસ્માત બન્યો હતો, જેના કારણે સમગ્ર વિસ્તારમાં ભયનો માહોલ ફેલાયો હતો. 23 એપ્રિલના રોજ અહીં આવેલી મેટ્રોપોલિટન એક્ઝીચેમ કંપનીના પ્લાન્ટમાં અચાનક જોરદાર વિસ્ફોટ થયો, જેના ધડાકાથી આસપાસના વિસ્તારો ધ્રૂજી ઉઠ્યા હતા. વિસ્ફોટનો અવાજ એટલો તેજ હતો કે તે દૂર દૂર સુધી સંભળાયો હતો. થોડી જ વારમાં પ્લાન્ટમાં આગ ભભૂકી ઉઠી અને સમગ્ર યુનિટ ધુમાડાના ગોટાળામાં ગરકાવ થઈ ગયું.
10થી વધુ કામદારો ગંભીર રીતે દાઝ્યા
આ ઘટના સમયે પ્લાન્ટમાં કામ કરતા અનેક શ્રમિકો હાજર હતા. વિસ્ફોટ અને આગના કારણે ઓછામાં ઓછા 10થી વધુ કામદારો ગંભીર રીતે દાઝી ગયા હોવાના પ્રાથમિક અહેવાલો સામે આવ્યા છે. ઈજાગ્રસ્તોને તાત્કાલિક એમ્બ્યુલન્સ દ્વારા અંકલેશ્વરની જયાબેન મોદી હોસ્પિટલ ખાતે ખસેડવામાં આવ્યા છે. હોસ્પિટલમાં હાલ તેમની સારવાર ચાલી રહી છે અને કેટલાકની સ્થિતિ ચિંતાજનક હોવાનું જણાવાઈ રહ્યું છે. વિસ્ફોટ બાદ ફેલાયેલી આગને કારણે આસપાસના ઔદ્યોગિક એકમોમાં કામ કરતા કર્મચારીઓમાં ગભરાટ ફેલાયો હતો. ઘણા લોકો પોતાનો જીવ બચાવવા માટે દોડધામ કરતા નજરે પડ્યા હતા. આકાશમાં ઉઠતા કાળા ધુમાડાના ગોટેગોટા દૂરથી પણ સ્પષ્ટ દેખાતા હતા, જેના કારણે પરિસ્થિતિ વધુ ગંભીર બની ગઈ હતી.
ફાયર બ્રિગેડની ટીમ તાત્કાલિક ઘટનાસ્થળે
ઘટનાની જાણ થતાં જ ફાયર બ્રિગેડની ટીમ તાત્કાલિક ઘટનાસ્થળે પહોંચી ગઈ હતી. ઝઘડિયા અને નજીકના વિસ્તારોમાંથી અનેક ફાયર ફાઈટરો બોલાવવામાં આવ્યા હતા. કેમિકલ ફેક્ટરી હોવાને કારણે આગ ઝડપથી ફેલાઈ રહી હતી, જેને કાબૂમાં લેવા માટે ફાયર બ્રિગેડની ટીમને ભારે મહેનત કરવી પડી રહી છે. હાલમાં બચાવ કામગીરી અને આગને નિયંત્રિત કરવાનો પ્રયાસ મુખ્ય પ્રાથમિકતા તરીકે લેવામાં આવ્યો છે.
પ્લાન્ટને પણ મોટું નુકસાન
આ અકસ્માતમાં પ્લાન્ટને પણ મોટું નુકસાન પહોંચ્યું હોવાની આશંકા છે. વિસ્ફોટનું ચોક્કસ કારણ હજુ સુધી બહાર આવ્યું નથી, પરંતુ પ્રાથમિક રીતે ટેકનિકલ ખામી અથવા કેમિકલ રિએક્શનને કારણે ઘટના બની હોવાની સંભાવના વ્યક્ત કરવામાં આવી રહી છે. વહીવટી તંત્ર દ્વારા સમગ્ર મામલે તપાસ હાથ ધરવાની તૈયારી કરવામાં આવી રહી છે, જેથી હકીકત સામે આવી શકે. હાલ તમામની નજર ઈજાગ્રસ્તોના આરોગ્ય પર કેન્દ્રિત છે અને તેમના ઝડપી સાજા થવાની પ્રાર્થના કરવામાં આવી રહી છે.
