Same Number Plate on 2 AMTS E-Buses: ગુજરાતના સૌથી મોટા અને સ્માર્ટ સિટી ગણાતા અમદાવાદ શહેરમાં અમદાવાદ મ્યુનિસિપલ ટ્રાન્સપોર્ટ સર્વિસ (AMTS) અવારનવાર વિવાદોમાં રહેતી હોય છે, પરંતુ આ વખતે એક અત્યંત ચોંકાવનારો અને વિચિત્ર કિસ્સો સામે આવ્યો છે. શહેરના મેઘાણીનગર વિસ્તારમાં AMTS ની બે ઈ-બસ એક જ રૂટ પર એકસાથે દોડતી જોવા મળી હતી. આશ્ચર્યની વાત એ છે કે બંને બસ પર એક જ રજીસ્ટ્રેશન નંબર મારેલો હતો. આ દ્રશ્ય જોઈને ત્યાંથી પસાર થતા રાહદારીઓ તેમજ બસની રાહ જોઈને ઊભેલા મુસાફરો આશ્ચર્યચકિત થઈ ગયા હતા અને તંત્રની કામગીરી સામે સવાલો ઉઠાવવા લાગ્યા હતા.
એકમાં HSRP તો બીજીમાં સાદી નંબર પ્લેટ
આ સમગ્ર મામલામાં વધુ તપાસ કરતા ખુલાસો થયો કે બંને ઈ-બસો પર નંબર ભલે એક સરખો જ લગાડેલો હતો, પરંતુ તેમાં મોટો તફાવત હતો. એક બસમાં સરકારી નિયમ મુજબની 'એચએસઆરપી' (HSRP - High Security Registration Plate) લગાડેલી હતી, જ્યારે બીજી બસ પર સાદી સામાન્ય નંબર પ્લેટ મારેલી હતી. આ બાબત સ્પષ્ટપણે દર્શાવે છે કે ઓપરેટર અથવા જવાબદારો દ્વારા ખોટી રીતે એક જ નંબર પ્લેટનો ઉપયોગ કરીને બે અલગ-અલગ બસો રોડ પર દોડાવવામાં આવી રહી હતી. તંત્ર અને આરટીઓ (RTO) ના નિયમોની આવી ખુલ્લેઆમ ધજાગરા ઉડાવતી ઘટનાથી અનેક શંકા-કુશંકાઓ ઉપજી રહી છે.
જીપીએસ મોનિટરિંગ અને સમયપત્રકની વ્યવસ્થા પર ઊભા થયા ગંભીર સવાલો
અમદાવાદ મહાનગરપાલિકા અને AMTS દ્વારા એવા દાવાઓ કરવામાં આવે છે કે શહેરની દરેક બસનું GPS દ્વારા કંટ્રોલ રૂમમાંથી સતત મોનિટરિંગ થાય છે. આ ઉપરાંત તમામ બસોનું ચોક્કસ રૂટ અને સમયપત્રક (ટાઇમ ટેબલ) નક્કી હોય છે. પરંતુ આ ઘટનાએ AMTS ના જીપીએસ મોનિટરિંગ અને કંટ્રોલ રૂમના દાવાઓની પોલ ખોલી નાખી છે. જો ખરેખર કંટ્રોલ રૂમમાંથી બસો પર નજર રાખવામાં આવતી હોય, તો એક જ નંબર ધરાવતી બે બસો એક જ સમયે એક જ રૂટ પર કેવી રીતે ઓપરેટ થઈ રહી હતી? શું કંટ્રોલ રૂમના અધિકારીઓને આ બાબતનો ખ્યાલ જ ન આવ્યો કે પછી બધું જાણી જોઈને આંખ આડા કાન કરવામાં આવી રહ્યા હતા?
મુસાફરો હેરાન થાય છે અને ઓપરેટરોની લાલિયાવાડી ચાલે છે
શહેરના અનેક વિસ્તારોમાં સામાન્ય નાગરિકો અને નોકરિયાત વર્ગ કલાકો સુધી AMTS બસની રાહ જોઈને ઉભા રહેતા હોય છે. ઘણી વખત બસ સમયસર ન મળવાની ફરિયાદો થતી રહે છે. એક તરફ મુસાફરો બસના અભાવે હેરાન થાય છે, તો બીજી તરફ આ રીતે એક જ રૂટ પર એક જ નંબરની બસો ફાળવીને ગેરરીતિ આચરવામાં આવી રહી હોય તેવું ચિત્ર ઊભું થયું છે. ખાનગી ઓપરેટરો દ્વારા બસોના કિલોમીટર વધારવા માટે અથવા તો અન્ય કોઈ આર્થિક ફાયદા માટે આ પ્રકારની લાલિયાવાડી ચલાવવામાં આવી રહી હોવાની શક્યતાઓ સેવાઈ રહી છે.
વાહન વ્યવહાર અને RTO નિયમોનું સરેઆમ ઉલ્લંઘન
ભારતીય માર્ગ વાહન વ્યવહાર નિયમ મુજબ કોઈપણ એક રજીસ્ટ્રેશન નંબર બે અલગ-અલગ વાહનો પર લગાવી શકાતો નથી. આમ કરવું એ કાનૂની ગુનો બને છે. જાહેર રસ્તાઓ પર આ રીતે એક જ નંબરની બે બસો દોડાવવી એ સુરક્ષા સામે પણ મોટો પ્રશ્ન ઊભો કરે છે. જો આવી બસ દ્વારા કોઈ અકસ્માત કે અનિચ્છનીય બનાવ બને તો તેની જવાબદારી કોની રહે? AMTS અને RTO તંત્ર દ્વારા આવા ગંભીર મુદ્દે યોગ્ય ચેકિંગ કેમ કરવામાં આવતું નથી તે પણ એક મોટો સવાલ છે.
કસૂરવાર ઓપરેટર સામે ભારે પેનલ્ટી અને કડક કાર્યવાહીની ખાતરી
આ ઘટના સોશિયલ મીડિયા અને સ્થાનિક સ્તરે ચર્ચાનો વિષય બનતા જ AMTS ના ઉચ્ચ અધિકારીઓ હરકતમાં આવ્યા છે. સમગ્ર મામલે તપાસના આદેશ આપવામાં આવ્યા છે અને પ્રારંભિક તપાસ બાદ અધિકારીઓએ જણાવ્યું છે કે જે-તે બસ સંચાલક કે ઓપરેટર સામે આ ગંભીર બેદરકારી બદલ ભારે પેનલ્ટી (દંડ) ફટકારવામાં આવશે. આ સાથે જ ભવિષ્યમાં આવી ઘટનાઓ ન બને તે માટે રૂટ મેનેજમેન્ટ અને બસ કંટ્રોલ સિસ્ટમમાં કડક સુધારા કરવાની પણ ખાતરી આપવામાં આવી છે.
