Ahmedabad Sarkhej Road Accident: અમદાવાદ શહેરના માર્ગો પર અવારનવાર સર્જાતા અકસ્માતોમાં વધુ એક હૃદયદ્રાવક ઘટના સામે આવી છે. સરખેજ વિસ્તારમાં આવેલી ફતેવાડીનો રહેવાસી અને માત્ર 15 વર્ષનો માસુમ સગીર સરખેજ ઢાળ ચાર રસ્તા પાસેથી પસાર થઈ રહ્યો હતો. તે સમયે રસ્તો ઓળંગતી વખતે કાળ બનીને આવેલી એક બેફામ બોલેરો પીકઅપ વાને તેને જોરદાર અડફેટે લીધો હતો. અકસ્માત એટલો ભયાનક હતો કે ટક્કર વાગતા જ સગીર રોડ પર પટકાયો હતો અને ગાડીના પૈડા નીચે આવી જતાં તેનું મોઢું ખરાબ રીતે છૂંદાઈ ગયું હતું.
ઘટનાસ્થળે હૃદયદ્રાવક દ્રશ્યો અને વીડિયો વાયરલ
આ અકસ્માત બાદ ઘટનાસ્થળે અત્યંત કરુણ અને કાળજું કંપાવી દે તેવા દ્રશ્યો સર્જાયા હતા. આ દુર્ઘટનાનો એક વીડિયો પણ સામે આવ્યો છે, જેમાં ગંભીર રીતે લોહીલુહાણ થયેલો સગીર વાહનની નીચે ફસાયેલી હાલતમાં પોતાનો જીવ બચાવવા માટે તરફડિયાં મારતો જોવા મળે છે. પૂરપાટ ઝડપે આવતા બોલેરો વાહનના ચાલકે સ્પીડ પરનો કાબૂ ગુમાવી દીધો હતો. તેણે માસુમ સગીરને કચડવા ઉપરાંત રસ્તા પરથી પસાર થઈ રહેલી એક પેસેન્જર રિક્ષા અને અન્ય એક વાહનને પણ જોરદાર ટક્કર મારી હતી.
ઈજાગ્રસ્ત સગીરની હાલત નાજુક: અસારવા સિવિલમાં સારવાર હેઠળ
અકસ્માત સર્જાતા જ આસપાસના સ્થાનિક લોકો અને વાહનચાલકો તાત્કાલિક મદદ માટે દોડી આવ્યા હતા. લોકોએ ભારે જહેમત બાદ ગાડી નીચે ફસાયેલા સગીરને બહાર કાઢ્યો હતો અને લોહીલુહાણ હાલતમાં 108 એમ્બ્યુલન્સ મારફતે સારવાર અર્થે સોલા સિવિલ હોસ્પિટલમાં ખસેડ્યો હતો. જોકે, સગીરને ચહેરા અને મોઢાના ભાગે અતિ ગંભીર ઈજાઓ પહોંચી હોવાથી તેની પ્રાથમિક સારવાર બાદ વધુ સ્પેશિયલ સારવાર માટે અસારવા સિવિલ હોસ્પિટલ ખાતે રિફર કરવામાં આવ્યો છે, જ્યાં હાલ તેની સ્થિતિ અત્યંત નાજુક હોવાનું કહેવાય છે.
ટ્રાફિક પોલીસે બોલેરો ચાલકની ધરપકડ કરી કાર્યવાહી હાથ ધરી
આ ભયાનક અકસ્માતની જાણ થતાં જ એમ-ડિવિઝન ટ્રાફિક પોલીસનો કાફલો ઘટનાસ્થળે પહોંચી ગયો હતો. પોલીસે તુરંત કાર્યવાહી કરીને અકસ્માત સર્જનાર બોલેરો પીકઅપ વાહનના ચાલકની અટકાયત (ધરપકડ) કરી લીધી છે. ચાલક નશામાં હતો કે કેમ, તેમજ વાહનની સ્પીડ કેટલી હતી તે દિશામાં પોલીસે તપાસ શરૂ કરી છે. આ ઉપરાંત અકસ્માત સ્થળના સીસીટીવી ફૂટેજ કબજે કરીને પોલીસે ગુનો નોંધીને આગળની કાયદેસરની તપાસ ચાલુ કરી છે.
બેફામ વાહનચાલકો સામે કડક પગલાં ભરવા સ્થાનિકોની માગ
સરખેજ ઢાળ અને ફતેવાડી વિસ્તારમાં સતત ટ્રાફિકની અવરજવર રહેતી હોય છે, છતાં પણ કેટલાક બેફામ વાહનચાલકો પૂરપાટ ઝડપે વાહનો હંકારતા હોય છે. આ ઘટનાને પગલે સ્થાનિક રહીશોમાં ભારે રોષ અને શોકની લાગણી ફરી વળી છે. લોકોની માગણી છે કે આવા નફ્ફટ અને બેદરકાર વાહનચાલકો સામે ટ્રાફિક પોલીસ દ્વારા દાખલો બેસે તેવી સખતમાં સખત કાર્યવાહી કરવામાં આવે, જેથી ભવિષ્યમાં કોઈ નિર્દોષ નાગરિક કે બાળકનો જીવ જોખમમાં ન મુકાય.
