Gujarat University Scam: ગુજરાત યુનિવર્સિટીના પૂર્વ કુલપતિ નિરજા ગુપ્તાને લઈને ચાલી રહેલા વિવાદ વચ્ચે મોટો ખુલાસો સામે આવ્યો છે. નિરજા ગુપ્તાના જણાવ્યા મુજબ, PMJVK હેઠળ મળેલી ₹16.50 કરોડની ગ્રાન્ટમાંથી ખર્ચ બાદ બચેલી ₹14.59 કરોડની રકમ, વ્યાજ સહિત, તેમણે યુનિવર્સિટીને પરત કરી છે. સાથે જ તેમણે સંબંધિત પ્રોજેક્ટના પ્રિન્સિપલ ઇન્વેસ્ટિગેટર પદેથી પણ રાજીનામું આપ્યું છે.
ગ્રાન્ટને લઈને સર્જાયો હતો વિવાદ
ગુજરાત યુનિવર્સિટીને પ્રધાનમંત્રી જન વિકાસ કાર્યક્રમ (PMJVK) હેઠળ જૈન હસ્તપ્રતોના દસ્તાવેજીકરણ અને સંરક્ષણ સંબંધિત પ્રોજેક્ટ માટે ₹40 કરોડની રકમ મંજૂર થઈ હોવાના અહેવાલો સામે આવ્યા હતા. જોકે, નિરજા ગુપ્તાએ આ આક્ષેપોને ફગાવતા કહ્યું હતું કે યુનિવર્સિટીને સંપૂર્ણ ₹40 કરોડ મળ્યા નહોતા અને માત્ર ₹16.50 કરોડની પ્રથમ હપ્તાની રકમ જ મળી હતી. તેમના જણાવ્યા મુજબ આ રકમ યુનિવર્સિટીના સત્તાવાર પ્રોજેક્ટ ખાતામાં જમા થઈ હતી, તેમના અંગત ખાતામાં નહીં.
₹14.59 કરોડ યુનિવર્સિટીને પરત કર્યાનો દાવો
નિરજા ગુપ્તાના જણાવ્યા મુજબ, મળેલી ₹16.50 કરોડની રકમમાંથી ₹1,90,80,228નો ખર્ચ થયો હતો. ત્યારબાદ બાકી રહેલી ₹14,59,19,772ની રકમ વ્યાજ સહિત બેન્ક ડ્રાફ્ટ મારફતે યુનિવર્સિટીને પરત કરવામાં આવી હતી. આ બેન્ક ડ્રાફ્ટ તેમણે પોતાના રાજીનામા સાથે જમા કરાવ્યો હોવાનું તેમણે જણાવ્યું હતું.
તપાસ કમિટી પણ કરી રહી છે તપાસ
આ સમગ્ર મામલે ગુજરાત યુનિવર્સિટીએ પૂર્વ કુલપતિના કાર્યકાળ દરમિયાન થયેલી નાણાકીય અને વહીવટી બાબતોની તપાસ માટે નિવૃત્ત ગુજરાત હાઈકોર્ટના ન્યાયાધીશ ડી.એમ. વ્યાસની અધ્યક્ષતામાં કમિટી રચી છે. કમિટીને કથિત ગેરરીતિઓ અને ગ્રાન્ટના ઉપયોગ અંગે તપાસ કરીને રિપોર્ટ રજૂ કરવાનો છે.
આરોપો અંગે નિરજા ગુપ્તાએ શું કહ્યું?
નિરજા ગુપ્તાએ અગાઉ પોતાના પર લાગેલા નાણાકીય ગેરરીતિના આરોપોને નકારી કાઢ્યા હતા. તેમણે કહ્યું હતું કે ₹40 કરોડના દુરુપયોગની વાત ભ્રામક છે અને પ્રોજેક્ટની રકમનો હિસાબ યુનિવર્સિટી પાસે ઉપલબ્ધ છે. બીજી તરફ, વિદ્યાર્થી સંગઠનો દ્વારા ગ્રાન્ટના વ્યવહારો અને પ્રોજેક્ટમાં તેમની ભૂમિકા અંગે સવાલો ઉઠાવવામાં આવ્યા છે. આ મામલે અંતિમ હકીકત તપાસ કમિટીના અહેવાલ અને સંબંધિત દસ્તાવેજોની ચકાસણી બાદ સ્પષ્ટ થશે.
