Gujarat rain update: ગુજરાતમાં છેલ્લા કેટલાક દિવસોથી હળવાથી મધ્યમ વરસાદી માહોલ જોવા મળી રહ્યો છે, પરંતુ ચોમાસાની વર્તમાન સ્થિતિ ખેડૂતો માટે ચિંતાજનક બની છે. રાજ્યમાં અત્યાર સુધી સરેરાશ વરસાદ સામાન્ય કરતાં 7 ટકા ઓછો નોંધાયો છે. જોકે, વરસાદની સ્થિતિ સમગ્ર રાજ્યમાં એકસરખી નથી. ગુજરાત રીજનમાં સામાન્ય કરતાં 9 ટકા વધુ વરસાદ થયો છે, જ્યારે કચ્છ અને સૌરાષ્ટ્રમાં વરસાદની ઘટ આશરે 30 ટકા સુધી પહોંચી છે. આ સ્થિતિને કારણે ખાસ કરીને ખેડૂતોમાં ચિંતા વધી છે.
કચ્છ-સૌરાષ્ટ્રમાં વરસાદની મોટી ઘટ
હવામાનના આંકડા મુજબ દક્ષિણ ગુજરાતના કેટલાક વિસ્તારોમાં સારો વરસાદ નોંધાયો છે, જ્યારે કચ્છ અને સૌરાષ્ટ્રના અનેક વિસ્તારોમાં હજુ પણ વરસાદની મોટી ઘટ યથાવત છે. આગામી દિવસોમાં ભારે વરસાદની કોઈ ખાસ શક્યતા ન હોવાથી આ વિસ્તારોમાં પાણીની સમસ્યા ઊભી થવાની ચિંતા વધી છે. વરસાદ ખેંચાવાની સ્થિતિ લાંબી ચાલે તો તેનો સીધો અસર ખેતી અને પાણીના સ્ત્રોતો પર પડી શકે છે.
છેલ્લા 24 કલાકમાં ક્યાં થયો વરસાદ?
હવામાન વિભાગના જણાવ્યા મુજબ છેલ્લા 24 કલાક દરમિયાન દક્ષિણ ગુજરાતના કેટલાક વિસ્તારોમાં હળવાથી મધ્યમ વરસાદ નોંધાયો હતો. તેમાં વલસાડમાં પ્રમાણમાં સારો વરસાદ થયો છે. ઉત્તર ગુજરાતમાં દાહોદ અને ખેડા આસપાસના વિસ્તારોમાં હળવો વરસાદ નોંધાયો હતો. બીજી તરફ, સૌરાષ્ટ્રમાં માત્ર બે-ત્રણ સ્થળોએ નહિવત વરસાદ થયો છે, જ્યારે મોટાભાગના વિસ્તારોમાં વરસાદી માહોલ જોવા મળ્યો નથી.
આગામી દિવસોમાં ભારે વરસાદની શક્યતા નહીં
હવામાન વિભાગે આગામી દિવસોમાં ગુજરાત માટે ભારે વરસાદની કોઈ ચેતવણી આપી નથી. આગામી એક સપ્તાહ દરમિયાન કેટલાક વિસ્તારોમાં હળવાથી મધ્યમ વરસાદની શક્યતા છે. દક્ષિણ ગુજરાતના કેટલાક ભાગો અને સૌરાષ્ટ્રના દક્ષિણ તટીય વિસ્તારોમાં વરસાદ થઈ શકે છે. જોકે, ઉત્તર ગુજરાત અને સૌરાષ્ટ્રના ઉત્તરીય વિસ્તારો મોટાભાગે સૂકા રહેવાની શક્યતા છે. અમદાવાદ અને ગાંધીનગરમાં તાપમાન આશરે 33 ડિગ્રી સેલ્સિયસ રહેવાની શક્યતા છે અને મોટાભાગના વિસ્તારોમાં વાદળછાયું વાતાવરણ જોવા મળી શકે છે. જો કચ્છ-સૌરાષ્ટ્રમાં આગામી દિવસોમાં પૂરતો વરસાદ નહીં પડે, તો ખેડૂતો ઉપરાંત કેટલાક વિસ્તારોમાં પાણીની તંગીનો પડકાર પણ ઊભો થઈ શકે છે.
