GUJARAT MONSOON RAIN: અમદાવાદ અને ગાંધીનગર સહિત સમગ્ર ઉત્તર ગુજરાતમાં વહેલી સવારથી જ કાળા ડિબાંગ વાદળો અને વીજળીના કડાકા-ભડાકા સાથે મુશળધાર વરસાદ શરૂ થયો છે. હવામાન વિભાગ દ્વારા સાબરકાંઠા, અરવલ્લી, મહીસાગર, ગાંધીનગર, ખેડા, મહેસાણા અને અમદાવાદ જિલ્લામાં ભારેથી અતિભારે વરસાદને પગલે યલો એલર્ટ જાહેર કરવામાં આવ્યું છે. સવારના સમયે જ ધોધમાર વરસાદ તૂટી પડતાં નોકરી-ધંધે નીકળેલા હજારો વાહનચાલકો અને રાહદારીઓ અટવાઈ પડ્યા હતા.
માત્ર 40 મિનિટમાં બે ઇંચ વરસાદ ખાબકતાં પશ્ચિમ વિસ્તાર બેટમાં ફેરવાયો
અમદાવાદના પશ્ચિમ ભાગમાં સવારે સાત વાગ્યા બાદ વાદળછાયા વાતાવરણ વચ્ચે આભ ફાટ્યું હોય તેવી સ્થિતિ સર્જાઈ હતી. ગોતા, ઓગણજ અને જગતપુરમાં માત્ર 40 મિનિટના ટૂંકા ગાળામાં જ બે ઇંચ જેટલો વરસાદ ખાબકી ગયો હતો. આ ઉપરાંત સાયન્સ સિટી અને ચાંદલોડિયામાં દોઢ ઇંચ તેમજ બોડકદેવ, થલતેજ, બોપલ, ઘુમા અને મકરબા પંથકમાં એક ઇંચ જેટલો વરસાદ નોંધાયો હતો, જેના કારણે મુખ્ય માર્ગો નદીમાં ફેરવાઈ ગયા હતા.
પાણી ભરાતાં શહેરના મુખ્ય અંડરપાસ વાહનવ્યવહાર માટે બંધ કરાયા
શહેરમાં પડેલા ભારે વરસાદના કારણે નીચાણવાળા માર્ગો અને અંડરપાસમાં ગળાડૂબ પાણી ભરાઈ ગયા હતા. પરિસ્થિતિ ગંભીર બનતાં તંત્ર દ્વારા અખબારનગર, પરિમલ, શાહીબાગ, મકરબા અને ઉસ્માનપુરા અંડરપાસને વાહનવ્યવહાર માટે તાત્કાલિક અસરથી બંધ કરવાની ફરજ પડી હતી. વરસાદી પાણીના ઝડપી નિકાલ માટે અમદાવાદ મ્યુનિસિપલ કોર્પોરેશન દ્વારા વાસણા બેરેજના 14 દરવાજા ખોલી દેવામાં આવ્યા છે.
BRTS અને AMTS પબ્લિક ટ્રાન્સપોર્ટ સેવાઓ ખોરવાતાં મુસાફરો પરેશાન
મુશળધાર વરસાદ અને સર્વત્ર જળબંબાકારના પગલે અમદાવાદની જાહેર પરિવહન સેવાને વ્યાપક અસર પહોંચી છે. BRTSના પાંચ મહત્વના રૂટ જેમાં આરટીઓથી મણિનગર, એસપી રીંગ રોડથી એલડી એન્જિનિયરિંગ કોલેજ, રબારી કોલોનીથી આરટીઓ, સાણંદ સર્કલથી સારંગપુર અને આરટીઓ સર્ક્યુલર રુટ સંપૂર્ણ બંધ કરી દેવાયા છે તેમજ 6 રૂટ ટૂંકાવી દેવાયા છે. આ તરફ AMTS બસ સેવા પણ પ્રભાવિત થતાં અખબારનગર, માદલપુર, ચંદ્રનગર, શાહીબાગ અને ગોતા સહિતના વિસ્તારોમાં બસોને વૈકલ્પિક માર્ગો પર ડાઈવર્ટ કરાઈ છે.
શહેરના પોશ વિસ્તારોમાં ઘૂંટણસમા પાણી ભરાતાં જનજીવન ઠપ
એસજી હાઇવે, સોલા બ્રિજ, પ્રહલાદનગર, હેલ્મેટ સર્કલ, વિજય ચાર રસ્તા, સાઉથ બોપલ, નરોડા અને અસારવા જેવા મુખ્ય માર્ગો પર ઘૂંટણસમા પાણી ભરાઈ ગયા હતા. મકરબાથી એસજી હાઇવે તરફ જતો કોર્પોરેટ રોડ બેટમાં ફેરવાઈ જતાં અનેક વાહનો બંધ પડી ગયા હતા અને લોકો અડધા ડૂબેલા વાહનોને ધક્કા મારીને પસાર થવા મજબૂર બન્યા હતા. બીજી તરફ ચાંદલોડિયા ડમરુ સર્કલ પાસે ભારે પવનના કારણે વૃક્ષ ધરાશાયી થતાં ફાયર બ્રિગેડે દોડી જઈ રસ્તો ખુલ્લો કરાવ્યો હતો.
ગાંધીનગર, સાબરકાંઠા અને મહીસાગર સહિત ઉત્તર ગુજરાતમાં સાર્વત્રિક વરસાદ
પાટનગર ગાંધીનગરમાં પણ વહેલી સવારથી સુસવાટા મારતા પવન સાથે ધીમીધારે અનરાધાર વરસાદ ચાલુ રહ્યો છે. આ તરફ સાબરકાંઠાના તલોદમાં પોણા બે ઇંચ અને વડાલીમાં સવા એક ઇંચ વરસાદ વરસ્યો છે, જ્યારે દહેગામના નાના જલુન્દ્રામાં વીજળી પડતાં એક ગાયનું મોત નીપજ્યું હતું. મહીસાગર જિલ્લાના ખાનપુરમાં 49 મિ.મી. વરસાદ નોંધાતા ખેડૂતોમાં આનંદ છવાયો છે, તેમજ બનાસકાંઠાના પાલનપુર અને પાટણના શંખેશ્વરમાં ત્રણ ઇંચ જેટલો વરસાદ ખાબકતાં શાળાની દીવાલ ધરાશાયી થવાની સાથે નીચાણવાળા વિસ્તારો પાણીમાં ગરકાવ થયા છે.
રાજ્યમાં ખેતી માટે જીવનદાન પરંતુ સૌરાષ્ટ્ર માટે હજુ વરસાદની ઘટ
ભાદરવા મહિનાની શરૂઆતમાં થયેલા આ સાર્વત્રિક વરસાદથી સુકાઈ રહેલા પાકને મોટું જીવનદાન મળ્યું છે, જેના કારણે ધરતીપુત્રોમાં ખુશીનો માહોલ છે. જોકે સમગ્ર રાજ્યમાં સિઝનનો સરેરાશ 85 ટકા વરસાદ નોંધાઈ ચૂક્યો હોવા છતાં હજુ પણ 9 ટકા વરસાદની ખાધ પ્રવર્તી રહી છે. રાજ્યના 17 જિલ્લાઓમાં હજી પણ વરસાદની મોટી ઘટ વર્તાઈ રહી હોવાથી આગામી દિવસોમાં જો સારો વરસાદ નહીં પડે તો સૌરાષ્ટ્ર સહિતના વિસ્તારોમાં પીવાના પાણીની ગંભીર કટોકટી સર્જાવાની ચિંતા યથાવત છે.
