Gujarat Local Elections 2026 Police Action Plan: ગુજરાતમાં આગામી સ્થાનિક સ્વરાજની ચૂંટણીને ધ્યાનમાં રાખીને રાજ્ય પોલીસ તંત્ર દ્વારા કાયદો અને વ્યવસ્થા મજબૂત બનાવવાના પ્રયાસો તેજ કરવામાં આવ્યા છે. આ સંદર્ભમાં ગાંધીનગર ખાતે રાજ્ય પોલીસ વડા ડૉ. કે. એલ. એન. રાવની અધ્યક્ષતામાં મહત્વપૂર્ણ બેઠક યોજાઈ હતી. આ બેઠકમાં રાજ્યભરના ઉચ્ચ પોલીસ અધિકારીઓ તથા તમામ જિલ્લાઓના પોલીસ વડાઓ વીડિયો કોન્ફરન્સ મારફતે જોડાયા હતા.
સંવેદનશીલ વિસ્તારોમાં ખાસ ચાંપતી નજર રાખવાનું સૂચન
આ બેઠક દરમિયાન ચૂંટણી દરમિયાન શાંતિપૂર્ણ અને નિષ્પક્ષ વાતાવરણ જળવાઈ રહે તે માટે જરૂરી માર્ગદર્શિકા આપવામાં આવ્યું હતું. ખાસ કરીને ગુનાખોરી પર નિયંત્રણ રાખવા અને અસામાજિક તત્વો પર કડક નજર રાખવા માટે ભાર મૂકાયો હતો. રાજ્યના દરેક જિલ્લામાં પોલીસ દ્વારા પૂર્વ તૈયારી મજબૂત બનાવવામાં આવે અને સંવેદનશીલ વિસ્તારોમાં ખાસ ચાંપતી નજર રાખવામાં આવે તેવા સૂચનો આપવામાં આવ્યા છે.
આચારસંહિતાનો અમલ શરૂ
ચૂંટણી પ્રક્રિયાને ધ્યાનમાં રાખીને આચારસંહિતાનો અમલ શરૂ થઈ ચૂક્યો છે. તે અનુસંધાનમાં પોલીસ વિભાગને વધુ સક્રિય બનવા અને કાયદાકીય કાર્યવાહી ઝડપથી કરવાની સૂચના આપવામાં આવી છે. બેઠકમાં ખાસ કરીને લાંબા સમયથી ફરાર આરોપીઓને ઝડપી પાડવા, પેન્ડિંગ કેસોમાં ઝડપી કાર્યવાહી કરવા અને હિસ્ટ્રીશીટર તરીકે ઓળખાતા ગુનેગારો સામે કડક પગલાં લેવા માટે સૂચનાઓ આપવામાં આવી હતી. આ ઉપરાંત, રાજ્યના એટીએસ વિભાગના એડીજીપી અમિત વિશ્વકર્માને ચૂંટણી સંદર્ભે નોડલ અધિકારી તરીકે મહત્વપૂર્ણ જવાબદારી સોંપવામાં આવી છે. તેઓ સમગ્ર રાજ્યમાં પોલીસની કામગીરી પર નજર રાખશે અને જરૂરી માર્ગદર્શન આપશે. તેમની આગેવાની હેઠળ વિવિધ પોલીસ યુનિટોને સંકલિત રીતે કાર્ય કરવા માટે સૂચનાઓ આપવામાં આવી છે.
બેઠકનો મુખ્ય હેતુ
પોલીસ વડાએ તમામ અધિકારીઓને સૂચન આપ્યું હતું કે, તેઓ પોતાના વિસ્તારમાં શાંતિ જાળવવા માટે સ્થાનિક સ્તરે સચેત રહે અને કોઈ પણ પ્રકારની ગેરકાયદેસર પ્રવૃત્તિ સામે તરત જ કાર્યવાહી કરે. ઉપરાંત, ચૂંટણી દરમિયાન કોઈ અનિચ્છનીય ઘટના ન બને તે માટે પૂરતા પોલીસ બંદોબસ્તની વ્યવસ્થા કરવા પર પણ ભાર મૂકાયો હતો. આ બેઠકનો મુખ્ય હેતુ ચૂંટણી પહેલાં જ સંભવિત જોખમોને ઓળખી તેને નિયંત્રિત કરવાનો હતો. રાજ્ય પોલીસ દ્વારા કરવામાં આવી રહેલા આ પ્રયાસો દ્વારા મતદાન પ્રક્રિયા સરળ અને સુરક્ષિત રીતે પૂર્ણ થાય તેવી અપેક્ષા વ્યક્ત કરવામાં આવી છે.
