Gujarat free textbooks on Amazon: ગુજરાતમાં વિદ્યાર્થીઓને વિનામૂલ્યે આપવામાં આવતા સરકારી પાઠ્યપુસ્તકો એમેઝોન પર વેચાણ માટે ઉપલબ્ધ હોવાના વિવાદે હવે રાજકીય રંગ પકડ્યો છે. ગુજરાત પ્રદેશ કોંગ્રેસ સમિતિના પ્રવક્તા અને મીડિયા કોઓર્ડિનેટર હેમાંગ મહીપતરામ રાવલે પાઠ્યપુસ્તક મંડળના નિયામક વિનયગીરી ગોસ્વામીના ખુલાસા સામે સવાલો ઉઠાવ્યા છે. કોંગ્રેસનો દાવો છે કે મંડળ દ્વારા આપવામાં આવેલા ખુલાસામાં તેના દ્વારા રજૂ કરાયેલા એમેઝોન લાઇવ લિંક, સ્ક્રીનશોટ અને સ્ક્રીન રેકોર્ડિંગ જેવા પુરાવાઓ અંગે સંતોષકારક જવાબ આપવામાં આવ્યો નથી.
‘જો ત્રાહિત સેલર છે તો સરકારી પુસ્તક પહોંચ્યું કેવી રીતે?’
કોંગ્રેસે અગાઉ એમેઝોનની લાઇવ લિંક સહિતના પુરાવા રજૂ કરીને સવાલ કર્યો હતો કે રાજ્ય સરકારની વિનામૂલ્યે વિતરણ યોજનામાં આપવામાં આવતા અને તેના માટે સ્પષ્ટ ઓળખ ધરાવતા પુસ્તકો ઓનલાઇન વેચાણ માટે કેવી રીતે ઉપલબ્ધ થયા. હેમાંગ રાવલે સવાલ ઉઠાવ્યો કે જો આ પુસ્તકોનું વેચાણ કોઈ ત્રાહિત સેલર દ્વારા કરવામાં આવી રહ્યું છે, તો સરકારી વિતરણ વ્યવસ્થામાંથી આ પુસ્તકો તે સેલર સુધી કેવી રીતે પહોંચ્યા? કોંગ્રેસે એવો પણ પ્રશ્ન કર્યો છે કે જો આ વેચાણ ગેરકાયદેસર છે તો પાઠ્યપુસ્તક મંડળ દ્વારા અત્યાર સુધી પોલીસ ફરિયાદ કેમ કરવામાં આવી નથી. કોંગ્રેસે સમગ્ર મામલે દસ્તાવેજી પુરાવા સાથે તપાસમાં સહકાર આપવાની તૈયારી દર્શાવી છે.
₹5ની માર્કેટપ્લેસ ફી પર કોંગ્રેસનો સવાલ
વિવાદમાં હવે એમેઝોન પર દેખાતા ₹5ના માર્કેટપ્લેસ ચાર્જનો મુદ્દો પણ ચર્ચામાં આવ્યો છે. કોંગ્રેસનો દાવો છે કે શિક્ષણ મંત્રી દ્વારા વિદ્યાર્થીઓ અને વાલીઓને એમેઝોન મારફતે પુસ્તકો મંગાવતી વખતે કોઈ ડિલિવરી ચાર્જ નહીં ચૂકવવો પડે તેવી જાહેરાત કરવામાં આવી હતી. પરંતુ કોંગ્રેસના જણાવ્યા મુજબ, પુસ્તકને કાર્ટમાં ઉમેરીને પેમેન્ટની પ્રક્રિયા દરમિયાન ₹5નો ચાર્જ દેખાય છે. આ મુદ્દે કોંગ્રેસે સવાલ કર્યો છે કે આ રકમ કોણ વસૂલે છે, શા માટે વસૂલવામાં આવે છે અને શિક્ષણ મંત્રીની ‘કોઈ ચાર્જ નહીં’ની જાહેરાત સાથે આ ફીનો સંબંધ શું છે.
જૂના બનાવોને લઈને પણ વિતરણ વ્યવસ્થા પર સવાલ
કોંગ્રેસે અગાઉ વિનામૂલ્યે આપવામાં આવતા સરકારી પુસ્તકો ખટારા ભરીને પસ્તીમાં જતા હોવાના કિસ્સાઓનો ઉલ્લેખ કર્યો છે. આ ઉપરાંત પાઠ્યપુસ્તક મંડળના ગોડાઉનમાં પાણી ભરાવાને કારણે પુસ્તકોને નુકસાન થયાની તાજેતરની ઘટના પણ કોંગ્રેસે તપાસના સંદર્ભમાં ઉઠાવી છે. હવે એમેઝોન પર સરકારી પાઠ્યપુસ્તકોના કથિત વેચાણના પુરાવા સામે આવ્યાના દાવા બાદ કોંગ્રેસે સમગ્ર સપ્લાય ચેઇન અને સરકારી પુસ્તક વિતરણ વ્યવસ્થા અંગે પ્રશ્નો ઉઠાવ્યા છે. બીજી તરફ, આ તમામ મુદ્દાઓ અંગે અંતિમ સ્થિતિ સ્પષ્ટ કરવા માટે પાઠ્યપુસ્તક મંડળ અને શિક્ષણ વિભાગ તરફથી દસ્તાવેજી સ્પષ્ટતા મહત્વપૂર્ણ રહેશે.
