Gujarat ECI voter list: ગુજરાતમાં મતદાર યાદી સુધારણા (SSR) માટે ભારતના ચૂંટણી પંચે નવો સુધારેલો કાર્યક્રમ જાહેર કર્યો છે. આ કાર્યક્રમ મુજબ, 27 નવેમ્બર, 2026ના રોજ મુસદ્દા મતદાર યાદી પ્રસિદ્ધ કરવામાં આવશે. ત્યારબાદ નાગરિકો 26 ડિસેમ્બર, 2026 સુધી નામ ઉમેરવા, વિગતોમાં સુધારો કરવા અને અન્ય વાંધા-દાવા રજૂ કરી શકશે. તમામ અરજીઓ અને વાંધાઓનો નિકાલ 11 જાન્યુઆરી, 2027 સુધીમાં કરવાનો રહેશે, જ્યારે આખરી મતદાર યાદી 18 જાન્યુઆરી, 2027ના રોજ જાહેર કરવામાં આવશે.
ગુજરાત માટે મતદાર યાદી સુધારણાનો નવો કાર્યક્રમ
ભારતના ચૂંટણી પંચે લોક પ્રતિનિધિત્વ અધિનિયમ, 1950ની કલમ 21 હેઠળ 1 જાન્યુઆરી, 2027ની લાયકાતની તારીખને ધ્યાનમાં રાખીને મતદાર યાદી સુધારણા કાર્યક્રમ જાહેર કર્યો હતો. આ ઝુંબેશની જાહેરાત 15 ઑક્ટોબર, 2026ના રોજ ગુજરાત સહિત 17 રાજ્યો અને કેન્દ્રશાસિત પ્રદેશો માટે કરવામાં આવી હતી. જોકે, વર્તમાન પરિસ્થિતિને ધ્યાનમાં રાખીને ગુજરાત માટેના કાર્યક્રમમાં ફેરફાર કરવામાં આવ્યો છે. સુધારેલા સમયપત્રક મુજબ મતદાન મથકોનું પુનર્ગઠન અને તર્કસંગત ગોઠવણી 17 નવેમ્બર, 2026 સુધીમાં પૂર્ણ કરવાની રહેશે.
મતદાર યાદી સુધારણાની મહત્ત્વપૂર્ણ તારીખો
18 વર્ષ પૂર્ણ કરનારા યુવાનોને મળશે મતદાર બનવાની તક
આ સુધારણા કાર્યક્રમનો મુખ્ય હેતુ 1 જાન્યુઆરી, 2027ના રોજ 18 વર્ષ પૂર્ણ કરનારા લાયક નાગરિકોનાં નામ મતદાર યાદીમાં સામેલ કરવાનો છે. પ્રથમ વખત મતદાર બનતા યુવાનો માટે આ પ્રક્રિયા ખાસ મહત્ત્વપૂર્ણ છે. ચૂંટણી પંચની જોગવાઈ મુજબ, 2027માં આવનારી અન્ય લાયકાતની તારીખો, 1 એપ્રિલ, 1 જુલાઈ અને 1 ઑક્ટોબર, ના રોજ 18 વર્ષ પૂર્ણ કરનારા યુવાનો પણ આગોતરી અરજી કરી શકે છે. આ સુવિધાથી લાયકાતની તારીખ આવતાં જ મતદાર તરીકે નોંધણીની પ્રક્રિયા સરળ બની શકે છે.
નામ ઉમેરવા કે વિગતો સુધારવા શું કરવું?
મુખ્ય નિર્વાચન અધિકારીની કચેરી, ગુજરાતે રાજ્યના લાયક નાગરિકોને મતદાર યાદી તપાસીને જરૂરી કાર્યવાહી સમયસર પૂર્ણ કરવાની અપીલ કરી છે. નાગરિકોએ ખાસ કરીને નીચેની બાબતોનું ધ્યાન રાખવું જોઈએ:
- મતદાર યાદીમાં પોતાનું નામ છે કે નહીં તે તપાસવું.
- નામ યાદીમાં ન હોય તો નોંધણી માટે અરજી કરવી.
- નામ, સરનામું અથવા અન્ય વિગતોમાં ભૂલ હોય તો સુધારા માટે અરજી કરવી.
- રહેઠાણ બદલ્યું હોય તો સ્થળાંતર સંબંધિત અરજી કરવી.
- મુસદ્દા યાદી પ્રસિદ્ધ થયા બાદ કોઈ ભૂલ કે વાંધો જણાય તો નિર્ધારિત સમયગાળામાં રજૂઆત કરવી.
આખરી મતદાર યાદી 18 જાન્યુઆરીએ પ્રસિદ્ધ થશે
મતદાર યાદીમાં નામ ઉમેરવા, વિગતો સુધારવા અથવા વાંધા રજૂ કરવા ઇચ્છતા નાગરિકોએ સુધારેલા સમયપત્રક મુજબ કાર્યવાહી કરવી જરૂરી છે. 26 ડિસેમ્બર, 2026 સુધી પ્રાપ્ત થયેલા વાંધા-દાવાઓનો નિકાલ 11 જાન્યુઆરી, 2027 સુધીમાં કરવામાં આવશે. ત્યારબાદ 18 જાન્યુઆરી, 2027ના રોજ આખરી મતદાર યાદી પ્રસિદ્ધ કરવામાં આવશે. ચૂંટણી પંચની આ પ્રક્રિયા દ્વારા મતદાર યાદીને વધુ ચોક્કસ અને અદ્યતન બનાવવાનો પ્રયાસ કરવામાં આવશે. ખાસ કરીને પ્રથમ વખત મતદાર બનનારા યુવાનો અને સરનામું બદલનારા નાગરિકોએ સમયસર પોતાની વિગતો તપાસવી જોઈએ.
