Harsh Sanghavi Japan Visit Osaka Invest in Gujarat Roundtable: વાઇબ્રન્ટ ગુજરાત ગ્લોબલ સમિટના પૂર્વસંધ્યા પ્રચાર અને રોડ-શો અંતર્ગત જાપાનના પ્રવાસે ગયેલા રાજ્યના નાયબ મુખ્યમંત્રી હર્ષ સંઘવીએ ઓસાકા ખાતે જાપાનના અગ્રણી ઉદ્યોગપતિઓ, પ્રમુખ રોકાણકારો અને સરકારી પ્રતિનિધિઓ સાથે એક ઉચ્ચ સ્તરીય 'ઇન્વેસ્ટ ઇન ગુજરાત' રાઉન્ડટેબલ કોન્ફરન્સ યોજી હતી. ગુજરાત અને જાપાન વચ્ચેના વર્ષો જૂના આર્થિક તથા વ્યૂહાત્મક સંબંધોને નવી ઊંચાઈએ લઈ જવા અને પરસ્પર સમૃદ્ધિ માટે સ્ટ્રેટેજિક પાર્ટનરશીપ વધુ સુદ્રઢ બનાવવાના મુખ્ય ઉદ્દેશ સાથે આ આંતરરાષ્ટ્રીય બેઠકનું આયોજન કરવામાં આવ્યું હતું.
જાપાન ઊગતા સૂર્યનો દેશ અને ગુજરાત ઊગતી તકોની ભૂમિ: નાયબ મુખ્યમંત્રી
રાઉન્ડટેબલ કોન્ફરન્સમાં ઉપસ્થિત વૈશ્વિક ઉદ્યોગ જગતના પ્રતિનિધિઓને સંબોધતા નાયબ મુખ્યમંત્રીએ મહાત્મા ગાંધી અને સરદાર વલ્લભભાઈ પટેલની પવિત્ર ભૂમિ ગુજરાત વતી ઉષ્માભર્યું સ્વાગત કર્યું હતું. તેમણે ભારપૂર્વક જણાવ્યું હતું કે, "જાપાન ઊગતા સૂર્યનો દેશ છે અને ગુજરાત ઊગતી તકોની ભૂમિ છે." ભારત અને જાપાન માત્ર વેપારી ભાગીદાર નથી, પરંતુ પરસ્પર વિશ્વાસ, સન્માન અને સાંસ્કૃતિક મૂલ્યોની સાથોસાથ સદીઓ જૂની સહિયારી સંસ્કૃતિ પણ ધરાવે છે. આ મજબૂત પાયા પર આજે બંને પ્રદેશો સમક્ષ વિકાસની અસીમ નવી તકો ઉપલબ્ધ છે.
ભારતના આર્થિક વિકાસમાં ગુજરાતની મજબૂત ભૂમિકાના આંકડા રજૂ કરાયા
ગુજરાતની આર્થિક ક્ષમતા અને ઔદ્યોગિક ગતિશીલતાના આંકડા રજૂ કરતા નાયબ મુખ્યમંત્રીએ જણાવ્યું હતું કે, દેશની માત્ર ૫ ટકા વસ્તી ધરાવતું ગુજરાત ભારતના કુલ GDPમાં 8 ટકાથી વધુનું યોગદાન આપે છે. દેશના કુલ ઔદ્યોગિક ઉત્પાદનમાં ગુજરાતનો હિસ્સો 18 ટકા જેટલો પ્રભાવી છે, જ્યારે ભારતની કુલ નિકાસમાંથી આશરે એક તૃતીયાંશ (1/3) નિકાસ એકલા ગુજરાતમાંથી થાય છે. આ ઉપરાંત ભારતના કુલ કાર્ગો હેન્ડલિંગનો 40 ટકા હિસ્સો ગુજરાતના સમૃદ્ધ બંદરો દ્વારા સંચાલિત થાય છે અને રાજ્યની 65 ટકા ઊર્જા જરૂરિયાતો રિન્યુએબલ એનર્જી સ્ત્રોતોમાંથી પૂરી થાય છે.
ગુજરાતમાં 'સ્પીડ, સ્કેલ અને સ્ટેબિલિટી'
તેમણે ઉમેર્યું કે ગુજરાત એટલે 'સ્પીડ, સ્કેલ અને સ્ટેબિલિટી'. ગુજરાતમાં નિર્ણયો ઝડપી લેવાય છે અને તમામ ઔદ્યોગિક નીતિઓ અત્યંત પારદર્શક તથા સ્પષ્ટ છે. સુઝુકી, બુલેટ ટ્રેન પ્રોજેક્ટ અને ખોરાજ સ્થિત જાપાનીઝ ઇન્ડસ્ટ્રિયલ પાર્ક્સ દર્શાવે છે કે જાપાન ગુજરાતમાં પોતાના ઘર જેવો માહોલ અનુભવે છે. સેમિકન્ડક્ટર, ગ્રીન હાઇડ્રોજન, ઇલેક્ટ્રિક વ્હીકલ્સ (EV) અને ઇલેક્ટ્રોનિક્સ જેવા ફ્યુચરિસ્ટિક સેક્ટર્સનું કેન્દ્ર આજે ગુજરાત બની રહ્યું છે. તેમણે જાપાનના રોકાણકારોને વાઇબ્રન્ટ ગુજરાત ગ્લોબલ સમિટમાં ઉપસ્થિત રહેવા ‘આવો, જુઓ, રોકાણ કરો અને અમારી સાથે વિકાસ સાધો’નું આહવાન કર્યું હતું.
જાપાનના પ્રમુખ ઉદ્યોગપતિઓ અને મેયર્સની ઉપસ્થિતિ વચ્ચે 11 મહત્વપૂર્ણ બેઠકો
આ રાઉન્ડટેબલ બેઠકમાં ડાઇકી એલ્યુમિનિયમ ઇન્ડસ્ટ્રીના કાઝુશી ગોટો, કન્સાઈ જાપાન-ઈન્ડિયા એસોસિએશનના સુસુમુ સાઇટો, નાકાનિશિ મેટલ વર્ક્સના કેઇટા ઇટો, પેનાસોનિક એનર્જીના દાઈસુકે તાકાહાશી તથા નોબુટો નાકાનિશિ અને હિગાશિયોસાકાના મેયર યોશિકાઝુ નોડા તથા આશિયા સિટીના મેયર ર્યોસુકે તાકાશિમા વિશેષ ઉપસ્થિત રહ્યા હતા. આ કાર્યક્રમ દરમિયાન નાયબ મુખ્યમંત્રીએ વિવિધ ક્ષેત્રના અગ્રણી ઉદ્યોગપતિઓ સાથે 11 મહત્વપૂર્ણ વન-ટુ-વન બેઠકો યોજીને ગુજરાતમાં મોટા પાયે રોકાણ લાવવા અંગે સફળ ચર્ચાઓ કરી હતી.
વધારાની માહિતી: ગુજરાત-જાપાન આર્થિક ભાગીદારી અને જાપાનીઝ ટાઉનશિપ
જાપાનીઝ ઇન્ડસ્ટ્રિયલ ટાઉનશિપ (Khoraj): અમદાવાદ નજીક મંડલ-બહુચરાજી અને ખોરાજ ખાતે વિશેષ જાપાનીઝ ઇન્ડસ્ટ્રિયલ પાર્ક વિકસાવવામાં આવ્યો છે, જ્યાં અસંખ્ય જાપાનીઝ મલ્ટીનેશનલ કંપનીઓ ઉત્પાદન એકમો ચલાવે છે.
હાઇ-સ્પીડ રેલ (Bullet Train Project): અમદાવાદ-મુંબઈ વચ્ચે આકાર લઈ રહેલા ભારતના પ્રથમ બુલેટ ટ્રેન પ્રોજેક્ટમાં જાપાન ઇન્ટરનેશનલ કોઓપરેશન એજન્સી (JICA) મુખ્ય તકનીકી અને નાણાકીય ભાગીદાર છે.
