Gujarat Changes DEO DPEO Charge Rules for Leave Up to 15 Days: ગુજરાતના શિક્ષણ વિભાગે જિલ્લા શિક્ષણ અધિકારી (DEO) અને જિલ્લા પ્રાથમિક શિક્ષણ અધિકારી (DPEO)ની રજાના સમયગાળા દરમિયાન ચાર્જ સોંપવાની વ્યવસ્થામાં ફેરફાર કર્યો છે. નવા નિયમ મુજબ, આ અધિકારીઓ 15 દિવસ કે તેથી ઓછી રજા પર જાય ત્યારે વધારાનો ચાર્જ સોંપવાની સત્તા સંબંધિત ખાતાના વડાને આપવામાં આવી છે. આ વ્યવસ્થા તાત્કાલિક અસરથી લાગુ કરવામાં આવી છે.
DEO અને DPEOની ગેરહાજરીમાં કોણ સંભાળશે ચાર્જ?
નવા નિયમ પ્રમાણે, DEO રજા પર હોય ત્યારે કમિશનર શાળાઓની કચેરી ચાર્જ સોંપવાનો હુકમ કરશે. જ્યારે DPEOની ગેરહાજરીમાં પ્રાથમિક શિક્ષણ નિયામકની કચેરી આ જવાબદારી સંભાળશે. સામાન્ય સંજોગોમાં DEO અને DPEO એકબીજાને વધારાનો ચાર્જ સોંપી શકશે.
બંને અધિકારીઓ એકસાથે રજા પર હોય તો શું?
જો કોઈ વિશેષ પરિસ્થિતિમાં DEO અને DPEO બંને એકસાથે રજા પર હોય તો સંબંધિત કચેરીના વર્ગ-2ના વરિષ્ઠ અધિકારીને વધારાનો ચાર્જ સોંપવામાં આવશે. આ વ્યવસ્થા ખાતાના વડા દ્વારા કરવામાં આવશે. શિક્ષણ વિભાગ હેઠળની અન્ય સમકક્ષ જગ્યાઓ માટે પણ આ જ નિયમ લાગુ પડશે.
15 દિવસથી વધુ રજા માટે અગાઉથી દરખાસ્ત કરવી પડશે
સરકારે સ્પષ્ટ કર્યું છે કે આ નવી સત્તા મહત્તમ 15 દિવસના ચાર્જ માટે જ લાગુ પડશે. જો કોઈ અધિકારી 15 દિવસથી વધુ રજા પર જવાના હોય તો રજા શરૂ થવાના ઓછામાં ઓછા સાત દિવસ અગાઉ જરૂરી વિગતો સાથેની દરખાસ્ત શિક્ષણ વિભાગને મોકલવી પડશે.
રજા લંબાય તો વિભાગની મંજૂરી જરૂરી
જો અધિકારીની 15 દિવસની રજા પૂર્ણ થયા બાદ પણ રજા લંબાવવામાં આવે તો અગાઉ સોંપાયેલો ચાર્જ ચાલુ રાખવા માટે શિક્ષણ વિભાગની પૂર્વ મંજૂરી લેવી ફરજિયાત રહેશે. ટૂંકી રજાની દરખાસ્તો મોડેથી મળવાને કારણે ચાર્જ સોંપવાના હુકમોમાં વિલંબ થતો હતો. તેના કારણે શૈક્ષણિક અને વહીવટી કામગીરીને અસર ન થાય તે માટે સરકારે આ ફેરફાર કર્યો છે.
