Salim Ismail Dola Arrest: ગુજરાત ATSને આંતરરાષ્ટ્રીય ડ્રગ્સ નેટવર્ક સામેની તપાસમાં મોટી સફળતા મળી છે. વડોદરાના સિંધરોટમાં કરોડો રૂપિયાની MD ડ્રગ્સ બનાવતી ફેક્ટરીના કેસમાં લાંબા સમયથી વોન્ટેડ આંતરરાષ્ટ્રીય ડ્રગ્સ માફિયા સલીમ ઇસ્માઇલ ડોલાની ધરપકડ કરવામાં આવી છે. મુંબઈથી દુબઈ, કેન્યા અને ત્યારબાદ તુર્કી પહોંચેલા સલીમ ડોલાને રેડ કોર્નર નોટિસના આધારે તુર્કીથી ડિપોર્ટ કરાવવામાં આવ્યો હતો. ભારત લવાયા બાદ તેને ગુજરાત ATSના હવાલે કરવામાં આવ્યો છે. હવે તેની પૂછપરછમાં ડ્રગ્સના આંતરરાષ્ટ્રીય નેટવર્ક અને કરોડો રૂપિયાના આર્થિક વ્યવહારો અંગે મહત્ત્વની વિગતો સામે આવવાની શક્યતા છે.
સિંધરોટ ડ્રગ્સ ફેક્ટરીનો માસ્ટરમાઇન્ડ હતો સલીમ ડોલા
વડોદરાના સિંધરોટ ખાતે 1 ડિસેમ્બર, 2022ના રોજ તપાસ એજન્સીઓએ દરોડો પાડ્યો હતો. આ કાર્યવાહી દરમિયાન MD ડ્રગ્સ બનાવતી ફેક્ટરીનો પર્દાફાશ થયો હતો. ફેક્ટરીમાંથી 87.728 કિલો MD ડ્રગ્સનો જથ્થો મળી આવ્યો હતો, જેની અંદાજિત કિંમત રૂ. 437 કરોડ હતી. આ કેસમાં શરૂઆતમાં 10 આરોપીઓની ધરપકડ કરવામાં આવી હતી. તપાસ દરમિયાન સલીમ ઇસ્માઇલ ડોલાનું નામ સામે આવ્યું હતું. તપાસ એજન્સીઓના જણાવ્યા અનુસાર, ફેક્ટરીના સમગ્ર નેટવર્કમાં તેની મુખ્ય ભૂમિકા હતી. તે ડ્રગ્સ બનાવવાના કારોબારને ફાઇનાન્સ કરવા ઉપરાંત કેમિકલ પ્રોડક્ટ્સની વ્યવસ્થા કરવામાં પણ સંકળાયેલો હોવાનું તપાસમાં સામે આવ્યું હતું.
મુંબઈથી દુબઈ, કેન્યા થઈ તુર્કી પહોંચ્યો હતો
સિંધરોટ ડ્રગ્સ ફેક્ટરીનો પર્દાફાશ થયા બાદ સલીમ ડોલા મુંબઈથી ભાગીને દુબઈ પહોંચ્યો હતો. ત્યારબાદ તે કેન્યા અને ત્યાંથી તુર્કી ગયો હતો. વિદેશમાં રહીને તે ભારતીય તપાસ એજન્સીઓથી બચવાનો પ્રયાસ કરી રહ્યો હતો. જોકે, તેની સામે રેડ કોર્નર નોટિસ જાહેર કરવામાં આવી હતી. ત્યારબાદ તુર્કીથી તેને ડિપોર્ટ કરવામાં આવ્યો હતો. ભારત પહોંચ્યા બાદ ગુજરાત ATSએ તેની ધરપકડ કરી છે. લાંબા સમયથી વોન્ટેડ રહેલા આરોપીની ધરપકડને ડ્રગ્સ નેટવર્કની તપાસમાં મહત્ત્વપૂર્ણ કાર્યવાહી માનવામાં આવી રહી છે.
દેશભરમાં અનેક નાર્કોટિક્સ કેસ નોંધાયેલા
સલીમ ઇસ્માઇલ ડોલા સામે દેશના વિવિધ વિસ્તારોમાં આશરે 8 નાર્કોટિક્સ સંબંધિત ગુનાઓ નોંધાયેલા હોવાનું જાણવા મળ્યું છે. આ ઉપરાંત તેની સામે 10થી વધુ ગુનાઓ નોંધાયા હોવાની વિગતો પણ સામે આવી છે. એન્ફોર્સમેન્ટ ડિરેક્ટોરેટ (ED) દ્વારા પણ તેની સામે ગુનો નોંધવામાં આવ્યો છે. હવે ગુજરાત ATS તેની પૂછપરછ કરીને ડ્રગ્સના કારોબાર સાથે જોડાયેલી વધુ વિગતો મેળવવાનો પ્રયાસ કરી રહી છે.
ડ્રગ્સનું નેટવર્ક કોના સુધી પહોંચતું હતું?
સલીમ ડોલાની ધરપકડ બાદ ગુજરાત ATSની તપાસમાં અનેક મહત્ત્વના સવાલોના જવાબ મેળવવાનો પ્રયાસ કરવામાં આવશે. સિંધરોટની ફેક્ટરીમાં તૈયાર થતું MD ડ્રગ્સ કોને સપ્લાય કરવામાં આવતું હતું, તેના માટે નાણાં ક્યાંથી આવતા હતા અને કેમિકલ પ્રોડક્ટ્સ કોણ પૂરાં પાડતું હતું તે અંગે પૂછપરછ થઈ શકે છે. આ ઉપરાંત ભારતમાં અને વિદેશમાં સલીમ ડોલાનું નેટવર્ક કેટલું વિસ્તરેલું હતું, તેની સાથે અન્ય કયા ડ્રગ્સ માફિયાઓ જોડાયેલા હતા અને આ કરોડો રૂપિયાના કારોબારમાં અન્ય કોની સંડોવણી હતી તે દિશામાં પણ તપાસ આગળ વધશે. સલીમ ડોલાની ધરપકડથી સિંધરોટ ડ્રગ્સ ફેક્ટરી કેસમાં નવા ખુલાસા થવાની શક્યતા છે. હવે ATSની પૂછપરછ અને તપાસમાં આંતરરાષ્ટ્રીય ડ્રગ્સ નેટવર્કની કડીઓ કેટલી દૂર સુધી પહોંચે છે તેના પર નજર રહેશે.
