NCISM Gujarat Ayurvedic Colleges Recognition Cancelled: ગુજરાતમાં આયુર્વેદિક તબીબી શિક્ષણને લઈને નેશનલ કમિશન ફોર ઇન્ડિયન સિસ્ટમ ઓફ મેડિસિન (NCISM) દ્વારા મોટી કાર્યવાહી કરવામાં આવી છે. શૈક્ષણિક વર્ષ 2026-27 માટે હાથ ધરાયેલા નિરીક્ષણ બાદ નિયમોનું પાલન ન કરતી અને જરૂરી માપદંડો પૂર્ણ ન કરતી ગુજરાતની 7 ખાનગી આયુર્વેદિક કોલેજોની BAMS પ્રવેશ મંજૂરી રદ કરવામાં આવી હોવાના અહેવાલો સામે આવ્યા છે. આ યાદીમાં જૂનાગઢની નોબલ આયુર્વેદ કોલેજનો પણ સમાવેશ થાય છે.
2026-27થી નવા પ્રવેશ પર અસર
આ કાર્યવાહી બાદ આ સાત કોલેજોમાં BAMS (આયુર્વેદાચાર્ય) કોર્સમાં નવા પ્રવેશને અસર થશે. કુલ 620 જેટલી બેઠકોની મંજૂરી રદ થવાથી આયુર્વેદમાં પ્રવેશ મેળવવા ઇચ્છતા વિદ્યાર્થીઓ માટે બેઠકોની સંખ્યામાં ઘટાડો થશે. NCISMના નિરીક્ષણ દરમિયાન કોલેજોમાં જરૂરી માપદંડો અને સુવિધાઓને લઈને ખામીઓ સામે આવી હોવાનું જણાવાયું છે.
ફેકલ્ટી અને સુવિધાઓ અંગે ગંભીર સવાલ
અહેવાલો અનુસાર, કેટલીક કોલેજોમાં પૂરતી અને લાયકાત ધરાવતી ફેકલ્ટી, હોસ્પિટલમાં દર્દીઓની સંખ્યા તેમજ જરૂરી સાધનો સહિતની સુવિધાઓ અંગે ખામીઓ સામે આવી હતી. જૂનાગઢની નોબલ આયુર્વેદ કોલેજને લઈને પણ ફેકલ્ટી સંબંધિત ગેરરીતિઓના આક્ષેપો સામે આવ્યા છે. આ સમગ્ર મામલે તપાસ અને કાર્યવાહી અંગેની વિગતો પણ સામે આવી રહી છે.
એડમિશન સમયે જ કોલેજો સામે પગલાં
દર વર્ષે એડમિશન પ્રક્રિયા દરમિયાન જ આવી કોલેજોની મંજૂરી અંગે પ્રશ્નો ઊભા થતાં વિદ્યાર્થીઓ અને વાલીઓમાં ચિંતા જોવા મળે છે. NEET પાસ કરીને આવતા વિદ્યાર્થીઓને એડમિશન બાદ આવી સ્થિતિનો સામનો ન કરવો પડે તે માટે નિયમનકારી સંસ્થાઓ અને સંબંધિત સત્તાવાળાઓની ભૂમિકા અંગે પણ સવાલો ઉઠી રહ્યા છે. વિદ્યાર્થી સંગઠનો અને વાલીઓએ જો ગેરરીતિ સાબિત થાય તો જવાબદારો સામે કડક કાયદેસરની કાર્યવાહી કરવાની માંગ કરી છે.
માન્યતા રદ થયેલી 7 કોલેજો
ગુજરાતમાં માન્યતા રદ થયેલી કોલેજોમાં જૂનાગઢની નોબલ આયુર્વેદ કોલેજ-રિસર્ચ ઇન્સ્ટિટ્યૂટમાં 100 બેઠકો, વડોદરાની સુમનદીપ આયુર્વેદ મેડિકલ કોલેજ-હોસ્પિટલમાં 100 બેઠકો, મહેસાણાની સરદાર આયુર્વેદ કોલેજ એન્ડ હોસ્પિટલમાં 100 બેઠકો, ખેડાની ડાલિયા આયુર્વેદ કોલેજ એન્ડ હોસ્પિટલમાં 100 બેઠકો, લીંબડીની લીંબડી આયુર્વેદિક મેડિકલ કોલેજમાં 100 બેઠકો, ગોધરાની જય જલારામ આયુર્વેદિક કોલેજમાં 60 બેઠકો અને અમરેલીની શ્રીધર અતુલકુમાર જાની આયુર્વેદિક મેડિકલ કોલેજમાં 60 બેઠકોનો સમાવેશ થાય છે. આ રીતે સાતેય કોલેજોની કુલ 620 BAMS બેઠકો પર અસર પડી છે. હવે વિદ્યાર્થીઓ અને વાલીઓની નજર આગામી એડમિશન પ્રક્રિયા અને NCISMના આગળના નિર્ણય પર રહેશે.
