GSRTC restarts online passenger pass: ગુજરાત રાજ્ય માર્ગ વાહન વ્યવહાર નિગમ એટલે કે GSRTC દ્વારા મુસાફરોની સુવિધા વધારવા માટે એક મહત્વપૂર્ણ નિર્ણય લેવામાં આવ્યો છે. ટેક્નિકલ ખામીઓના કારણે થોડા સમય માટે બંધ કરાયેલી ઓનલાઈન પાસ સેવા હવે ફરી શરૂ કરવામાં આવી છે. નિગમે આ સેવા પોતાના ઇનહાઉસ સોફ્ટવેર દ્વારા અપગ્રેડ કરીને વધુ ઝડપી અને વિશ્વસનીય બનાવી છે, જેના કારણે ખાસ કરીને રોજિંદા મુસાફરી કરતા નોકરીયાત વર્ગ અને વિદ્યાર્થીઓને મોટી રાહત મળશે.
QR કોડ સ્કેન કરીને સરળતાથી ઓનલાઈન ચુકવણી
નવી સિસ્ટમ હેઠળ મુસાફરોને ડિજિટલ પેમેન્ટની સુવિધા આપવામાં આવી છે. હવે પાસ માટેની ફી ભરવા માટે QR કોડ સ્કેન કરીને સરળતાથી ઓનલાઈન ચુકવણી કરી શકાય છે. આથી રોકડ રકમ રાખવાની જરૂરિયાત ઘટશે અને ટ્રાન્ઝેક્શન વધુ સુરક્ષિત બનશે.આ ઉપરાંત, સમય બચત આ સિસ્ટમનો સૌથી મોટો ફાયદો માનવામાં આવી રહ્યો છે. અંદાજે બે લાખથી વધુ મુસાફરો, જે લોકલ અને એક્સપ્રેસ બસોમાં દૈનિક મુસાફરી કરે છે, તેઓને હવે બસ સ્ટેશન પર લાંબી લાઈનમાં ઊભા રહેવાની જરૂર નહીં પડે. આખી પ્રક્રિયા હવે ઘર બેઠા મોબાઈલ દ્વારા પૂર્ણ કરી શકાય છે.
બસ સ્ટેશન પરથી પાસની પ્રિન્ટ મેળવી શકે છે
પાસ મેળવવાની પ્રક્રિયાને પણ સરળ બનાવવામાં આવી છે. મુસાફરો પોતાના મોબાઈલ અથવા કમ્પ્યુટર દ્વારા ઓનલાઈન અરજી કરી શકે છે અને પેમેન્ટ પૂર્ણ થયા બાદ નજીકના બસ સ્ટેશન પરથી પાસની પ્રિન્ટ મેળવી શકે છે. આથી પ્રક્રિયામાં પારદર્શિતા અને ઝડપ બંનેમાં વધારો થયો છે.ખાસ વાત એ છે કે આ નવી સિસ્ટમ સંપૂર્ણપણે GSRTCના પોતાના ઇનહાઉસ સોફ્ટવેર પર આધારિત છે. આ કારણે ભવિષ્યમાં કોઈ ટેક્નિકલ સમસ્યા ઉભી થાય તો તેને ઝડપથી ઠીક કરી શકાશે અને સેવા સતત ચાલુ રાખી શકાશે. અગાઉ ઓનલાઈન સેવા બંધ થતાં મુસાફરોને મેન્યુઅલ પદ્ધતિથી પાસ મેળવવામાં ઘણી મુશ્કેલીઓનો સામનો કરવો પડતો હતો. હવે નવી ટેક્નોલોજી સાથે આ સમસ્યાનો અંત આવ્યો છે. આ પગલાંથી મુસાફરોને વધુ સુવિધાજનક, ઝડપી અને પારદર્શક સેવા મળશે, જે તેમના દૈનિક પ્રવાસને વધુ સરળ અને આરામદાયક બનાવશે.
