GPRB Lok Rakshak document verification: ગુજરાત પોલીસ ભરતી બોર્ડ દ્વારા લોકરક્ષક કેડરની ભરતી પ્રક્રિયા અંગે મહત્વપૂર્ણ અપડેટ જાહેર કરવામાં આવ્યું છે. ભરતી જાહેરાત ક્રમાંક GPRB/202526/1 હેઠળ 14 જૂન 2026ના રોજ યોજાયેલી લેખિત પરીક્ષાના ગુણ 11 જુલાઈએ જાહેર કરવામાં આવ્યા હતા. હવે ભરતી બોર્ડે જણાવ્યું છે કે પ્રથમ તબક્કાનું ડોક્યુમેન્ટ વેરિફિકેશન 30 સપ્ટેમ્બર 2026થી શરૂ કરવામાં આવશે. કુલ 12,733 જગ્યાઓ માટે પ્રથમ તબક્કામાં 18,322 ઉમેદવારોને દસ્તાવેજ ચકાસણી માટે લાયક ઠેરવવામાં આવ્યા છે.
ક્વોલિફાય થયેલા ઉમેદવારોની યાદી બહાર પાડવામાં આવી
લોકરક્ષક કેડરની લેખિત પરીક્ષાનું મેરિટ જાહેર થયા બાદ ડોક્યુમેન્ટ વેરિફિકેશન માટે કેટેગરી પ્રમાણે ક્વોલિફાય થયેલા ઉમેદવારોની યાદી બહાર પાડવામાં આવી હતી. ભરતી બોર્ડના જણાવ્યા મુજબ, પ્રથમ તબક્કાની ચકાસણી દરમિયાન જો કોઈ કેટેગરીમાં ઉમેદવારોની ઘટ રહેશે તો મેરિટના આધારે બીજા તબક્કામાં સંબંધિત કેટેગરીના વધુ ઉમેદવારોને બોલાવવામાં આવશે. ડોક્યુમેન્ટ વેરિફિકેશન માટે કયા-કયા દસ્તાવેજો સાથે લાવવાના રહેશે અને કેટેગરી પ્રમાણે કટ-ઓફ સહિતની સંપૂર્ણ માહિતી ભરતી બોર્ડની સત્તાવાર વેબસાઇટ પર ઉપલબ્ધ કરાવવામાં આવશે.
879 શાળા-કોલેજોમાં લેખિત પરીક્ષા યોજાઈ હતી
લોકરક્ષક કેડરની 12,733 જગ્યાઓ માટે 14 જૂનના રોજ રાજ્યભરમાં 879 શાળા-કોલેજોમાં લેખિત પરીક્ષા યોજાઈ હતી, જેમાં 2.63 લાખથી વધુ ઉમેદવારોએ ભાગ લીધો હતો. આ પહેલાં 2 એપ્રિલ 2026ના રોજ શારીરિક કસોટીનું પરિણામ જાહેર થયું હતું. શારીરિક પરીક્ષામાં 1.73 લાખથી વધુ પુરુષ અને 89,405 મહિલા ઉમેદવારો પાસ થયા હતા. ભરતીમાં બિનહથિયારી પોલીસ કોન્સ્ટેબલની 6,942, હથિયારધારી પોલીસ કોન્સ્ટેબલની 2,458, SRPF હથિયારધારી પોલીસ કોન્સ્ટેબલની 3,002, પુરુષ જેલ સિપાહીની 300 અને મહિલા જેલ સિપાહી/મેટ્રનની 31 જગ્યાઓનો સમાવેશ થાય છે.
દસ્તાવેજો સાથે હાજર રહેવાનું રહેશે
હવે ડોક્યુમેન્ટ વેરિફિકેશન ભરતી પ્રક્રિયાનો આગામી મહત્વપૂર્ણ તબક્કો રહેશે. ઉમેદવારોએ નિર્ધારિત તારીખે જરૂરી તમામ દસ્તાવેજો સાથે હાજર રહેવાનું રહેશે. દસ્તાવેજ ચકાસણી સંબંધિત સૂચનાઓ, જરૂરી પ્રમાણપત્રોની વિગતો, કેટેગરીવાઇઝ કટ-ઓફ અને અન્ય મહત્વની માહિતી ભરતી બોર્ડની સત્તાવાર વેબસાઇટ gprb.gujarat.gov.in પર જાહેર કરવામાં આવશે. તેથી ડોક્યુમેન્ટ વેરિફિકેશન માટે ક્વોલિફાય થયેલા ઉમેદવારોએ આગામી સૂચનાઓ પર ખાસ નજર રાખવી જરૂરી રહેશે.
