Gandhiagar News: ગુજરાતનું પાટનગર ગાંધીનગર હવે વધુ સ્માર્ટ અને સુવિધાજનક બનવા જઈ રહ્યું છે. મ્યુનિસિપલ કમિશનર જે.એન. વાઘેલાએ નાણાકીય વર્ષ 2026-27 માટે ₹1903.08 કરોડનું ડ્રાફ્ટ બજેટ રજૂ કર્યું છે. પાટનગરવાસીઓ માટે સૌથી મોટા રાહતના સમાચાર એ છે કે બજેટમાં કોઈ પણ પ્રકારનો નવો કરવેરો લાદવામાં આવ્યો નથી. ગત વર્ષના ₹1718 કરોડના બજેટની સરખામણીએ આ વખતે કદમાં 10.77%નો વધારો કરવામાં આવ્યો છે, જે શહેરના ઝડપી વિસ્તાર અને આધુનિકીકરણનો સંકેત આપે છે.
62% રકમ ઇન્ફ્રાસ્ટ્રક્ચર પાછળ ખર્ચાશે
બજેટના કુલ ખર્ચના સિંહફાળો એટલે કે 62 ટકા રકમ (અંદાજે ₹1186 કરોડ) માત્ર ભૌતિક આંતરમાળખાકીય સુવિધાઓ માટે ફાળવવામાં આવી છે. શહેરના વધતા ટ્રાફિકને રોકવા માટે રિલાયન્સ ચોકડી અને પંડિત દીનદયાળ સર્કલ પર નવા ફ્લાયઓવર બ્રિજ બનાવવાની જાહેરાત કરવામાં આવી છે. આ ઉપરાંત, સેક્ટર 22-23 ખાતે નવા અન્ડરપાસ અને સેક્ટર-11માં અત્યાધુનિક ‘બિઝનેસ કોરિડોર’ વિકસાવવાની યોજના છે, જેનાથી ગાંધીનગર માત્ર વહીવટી કેન્દ્ર જ નહીં પણ બિઝનેસ હબ તરીકે પણ ઉભરી આવશે.
1000 રિચાર્જ વેલ દ્વારા શહેરના વોટર ટેબલને ઊંચું લાવવાનો લક્ષ્યાંક
પર્યાવરણ અને જળ સ્તરની જાળવણી ગાંધીનગર મનપાની પ્રાથમિકતામાં છે. ‘શૂન્ય જળ ભરાવ’ કાર્યક્રમ હેઠળ અગાઉ 19 તળાવોના કામ પૂર્ણ કર્યા બાદ હવે વધુ 24 તળાવોને વિકસાવવાનું આયોજન બજેટમાં છે. શહેરના ગ્રાઉન્ડ વોટર લેવલને જાળવી રાખવા માટે 1000 રિચાર્જ વેલ બનાવવામાં આવશે. એટલું જ નહીં, શહેરીજનોને શુદ્ધ પાણી મળી રહે તે માટે આધુનિક આઈઓટી (IoT) ટેકનોલોજી દ્વારા પાણીની ગુણવત્તા અને પાઈપલાઈનમાં થતા લીકેજનું રિયલ ટાઈમ મોનિટરિંગ કરવામાં આવશે.
પ્રદૂષણ મુક્ત પરિવહનથી ગ્રીન સિટીની ઓળખ વધુ મજબૂત બનશે
પાટનગરની હવાને શુદ્ધ રાખવા અને જાહેર પરિવહનને વધુ સુદ્રઢ બનાવવા માટે 100 નવી ‘પીએમ ઈ-બસ’ લોન્ચ કરવામાં આવશે. આ બસો સંપૂર્ણપણે ઇલેક્ટ્રિક હોવાથી શહેરમાં અવાજ અને ધુમાડાનું પ્રદૂષણ ઘટશે. મનપાએ ગ્રીન કવર વધારવા માટે આગામી વર્ષે 10 લાખથી વધુ નવા વૃક્ષો વાવવાનો નિર્ધાર કર્યો છે. આ પરિવર્તનથી ગાંધીનગર ખરા અર્થમાં દેશનું સૌથી સ્વચ્છ અને પ્રદૂષણ મુક્ત સ્માર્ટ સિટી બનવા તરફ અગ્રેસર થશે.
સ્માર્ટ શાળાઓ માટે કરોડોની જોગવાઈ
શહેરીજનોના સ્વાસ્થ્ય માટે મનપા હવે પીપીપી (PPP) મોડલ પર મલ્ટી સ્પેશિયાલિટી હોસ્પિટલ અને પબ્લિક હેલ્થ સેન્ટર શરૂ કરવાની દિશામાં કામ કરશે. આ ઉપરાંત, શિક્ષણ ક્ષેત્રે બાળકોને આધુનિક સુવિધાઓ મળી રહે તે માટે ₹16.90 કરોડની માતબર રકમ ફાળવવામાં આવી છે. શિક્ષણના સ્તરને સુધારવા માટે સરકારી શાળાઓમાં સ્માર્ટ ક્લાસરૂમ અને નવીન ભૌતિક સુવિધાઓ ઊભી કરવામાં આવશે, જે ખાનગી શાળાઓની સ્પર્ધામાં મનપાની શાળાઓને ઊભી રાખશે.
મહિલા સશક્તિકરણ માટે વિશેષ જોગવાઈ
ગાંધીનગર નોકરીયાત મહિલાઓનું મોટું કેન્દ્ર હોવાથી બજેટમાં મહિલા સશક્તિકરણ માટે ખાસ જોગવાઈ કરવામાં આવી છે. શહેરમાં નોકરી કરતી મહિલાઓ માટે આધુનિક ‘વર્કિંગ વુમન હોસ્ટેલ’ બનાવવાની જાહેરાત કરાઈ છે. આ હોસ્ટેલથી અન્ય શહેરોમાંથી ગાંધીનગર આવતી મહિલાઓને સુરક્ષિત અને સસ્તું રહેઠાણ મળી રહેશે. આમ, કમિશનરે રજૂ કરેલું આ બજેટ યુવાનો, મહિલાઓ, નોકરીયાત વર્ગ અને પર્યાવરણને સંતુલિત રાખીને તૈયાર કરવામાં આવ્યું હોવાનું જણાય છે.
