Gandhinagar News: રાજ્યમાં શિયાળાની ફૂલગુલાબી ઠંડીનો લાભ ઉઠાવી તસ્કર ટોળકીઓ હવે ધાર્મિક સ્થાનોને નિશાન બનાવી રહી છે. ગાંધીનગર જિલ્લાના માણસા તાલુકાના પ્રેમનગર બોરુ ગામમાં આવેલ અંબાજી માતાના મંદિરમાં મોડી રાત્રે ચોરીની ઘટના બની છે. અજાણ્યા તસ્કરો મંદિરના ગર્ભગૃહના દરવાજા ખોલી માતાજીના સોના-ચાંદીના ઘરેણાં અને દાનપેટીની રોકડ રકમ ચોરી રફુચક્કર થઈ ગયા છે. આ બનાવને પગલે સમગ્ર ગ્રામજનોમાં ભારે રોષ જોવા મળી રહ્યો છે.
સવારે પૂજારી મંદિરે પહોંચતા ભાંડો ફૂટ્યો
ચોરીની આ ઘટનાની જાણ રવિવારે વહેલી સવારે થઈ હતી. મંદિરના પૂજારી અશ્વિનગીરી ગોસ્વામી જ્યારે નિત્યક્રમ મુજબ સવારે પૂજા-અર્ચના માટે મંદિરે પહોંચ્યા ત્યારે તેમણે મુખ્ય દરવાજાના તાળા તૂટેલા જોયા હતા. અંદર જઈને જોતા માતાજીની મૂર્તિ પરથી આભૂષણો ગાયબ હતા. પૂજારીએ તુરંત જ મંદિર કમિટીના સભ્યો અને ગ્રામજનોને જાણ કરી હતી, જેના પગલે મોટી સંખ્યામાં લોકો ઉમટી પડ્યા હતા.
સોનાનો હાર અને ચાંદીનું છત્ર લઈ ગયા ચોર
તસ્કરો માતાજીના શણગાર પર હાથફેરો કરી ગયા છે. પ્રાથમિક તપાસમાં બહાર આવ્યું છે કે અંદાજે ₹3,37,500ની મત્તાની ચોરી થઈ છે. જેમાં ₹1.20 લાખની કિંમતનું 500 ગ્રામ ચાંદીનું છત્ર, ₹1.62 લાખનું સોનાનો હારનો સમાવેશ થાય છે. તસ્કરોએ માતાજીના શણગારને નિશાન બનાવી લાખો રૂપિયાની મત્તા પડાવી લીધી છે.
દાનપેટી તૂટેલી હાલતમાં સીમમાંથી મળી આવી
માત્ર ઘરેણાં જ નહીં, તસ્કરોએ મંદિરની દાનપેટીને પણ છોડી નથી. દાનપેટીમાં રહેલી અંદાજે ₹3,000ની રોકડ રકમની ચોરી કરવામાં આવી છે. ગ્રામજનોએ આસપાસ તપાસ કરતા મંદિરથી થોડે દૂર સીમ વિસ્તારમાં દાનપેટી તૂટેલી હાલતમાં ફેંકાયેલી મળી આવી હતી. એવું મનાય છે કે તસ્કરોએ મંદિરમાંથી દાનપેટી ઉઠાવીને સલામત સ્થળે લઈ જઈ તેને તોડી હતી અને રોકડ રકમ લઈને પેટી ત્યાં જ ફેંકી દીધી હતી.
માણસા પોલીસે ડોગ સ્ક્વોડ અને એફએસએલની મદદ લીધી
ઘટનાની જાણ થતા જ માણસા પોલીસ સ્ટેશનનો કાફલો ઘટનાસ્થળે દોડી આવ્યો હતો. પોલીસે અજાણ્યા શખ્સો વિરુદ્ધ ચોરીનો ગુનો નોંધી તપાસના ચક્રો ગતિમાન કર્યા છે. તસ્કરોના પગરખાંના નિશાન અને ફિંગરપ્રિન્ટ મેળવવા માટે એફએસએલ અને ડોગ સ્ક્વોડની પણ મદદ લેવામાં આવી રહી છે. ગામના એન્ટ્રી અને એક્ઝિટ પોઈન્ટ પર લાગેલા સીસીટીવી ફૂટેજ પણ ચકાસવામાં આવી રહ્યા છે.
તસ્કર ટોળકીની રેકી હોવાની ગ્રામજનોને આશંકા
સ્થાનિક રહીશોના જણાવ્યા મુજબ, તસ્કરો મંદિરની ભૂગોળથી વાકેફ હોય તેવું લાગી રહ્યું છે. જે રીતે મુખ્ય દરવાજાના તાળા તોડવામાં આવ્યા અને ચોક્કસ ઘરેણાંની જ ચોરી કરવામાં આવી તે જોતા આ ચોરી પૂર્વે રેકી કરવામાં આવી હોવાની પૂરી શક્યતા છે. માણસા પંથકમાં છેલ્લા કેટલાક સમયથી ચોરીના બનાવો વધતા પોલીસ પેટ્રોલિંગ વધારવાની માંગ પણ ઉઠી છે.








