Food Grain distribution Issue: ગુજરાતમાં સામાન્ય નાગરિકોની ફરિયાદોને લઈ તંત્રની ઉદાસીનતા ફરી એકવાર સામે આવી છે. રેશન કાર્ડ હોવા છતાં અનાજ ન મળતાં અંકલેશ્વરના એક ગરીબ પરિવારને અનેક વખત અરજી કરવા છતાં ઉકેલ મળ્યો નહીં.
મહિલાએ તણાવમાં આવી ઝેરી દવા પી લીધી
અંતે પરિવાર પોતાનું દુઃખ રજૂ કરવા ગાંધીનગર પહોંચી ગયો, પરંતુ ત્યાં પણ નિરાશા જ મળતાં મહિલાએ તણાવમાં આવી ઝેરી દવા પી લીધી હતી, જેના પગલે સ્વર્ણિમ સંકુલ નજીક ખળભળાટ મચી ગયો છે. સુરક્ષા સ્ટાફે તરત જ મહિલાને એમ્બ્યુલન્સ દ્વારા સિવિલ હોસ્પિટલ લઈ જવામાં મદદ કરી હતી. પતિએ આંસુઓ રોકતા કહ્યું, "બાળકો ભૂખ્યા છે, અનાજ મળતું નથી… કોઈ તો અમને સાંભળો."
અંકલેશ્વરથી આખો પરિવાર રજૂઆત માટે ગાંધીનગર પહોંચ્યો
રાજ્ય સરકાર "ગુજરાતમાં કોઈ ભુખ્યો નહીં સુએ" તેવો દાવો કરતી હોવા છતાં, અનેક ગરીબ પરિવારોને રોજના ભોજન માટે પણ સંઘર્ષ કરવો પડે છે. અંકલેશ્વરની શિતલ માલવિયા પોતાના પતિ અને બે બાળકો સાથે આજે સ્વર્ણિમ સંકુલ–1 ખાતે અનાજ વિષયક ફરિયાદ લઈને પહોંચી હતી. તેનું કહેવું હતું કે, રેશન કાર્ડ હોવા છતાં સસ્તી દુકાનમાં સમયસર અનાજ મળતું નથી અને આ અંગે સ્થાનિક સ્તરે ઘણી વખત રજૂઆત કરવા છતાં કોઈ કાયદેસર કાર્યવાહી થતી નથી.
મહિલાએ જીવલેણ પગલું ભર્યું
લગભગ સાંજે ચાર વાગ્યા આસપાસ, સંકુલની બહાર જ શિતલબેન અચાનક બેભાન પડી ગયા. તપાસ કરતાં જાણવા મળ્યું કે, તેમણે ઝેરી દવા પીધી હતી. બાળકો રડવા લાગતાં સુરક્ષાકર્મીઓ દોડી આવ્યા અને મહિલાને તરત જ હોસ્પિટલ ખસેડવામાં આવી. પતિએ જણાવ્યું કે, ઘરમાં એક દાણો પણ નથી, રોજનું ભોજન પણ મુશ્કેલ બન્યું છે અને અનેક રજૂઆતો છતાં કોઈ ધ્યાન આપતું નથી.
તંત્રની બેદરકારી સામે આવી
આ બનાવ બાદ ફરી એક વાર સ્પષ્ટ થયું છે કે, તંત્રની બેદરકારી અને કચેરીઓના ધક્કાથી સામાન્ય લોકોની મુશ્કેલીઓ વધી રહી છે. સરકારના કલ્યાણકારી દાવાઓ કરતા હકીકત અલગ છે. રાજ્યમાં હજુ હજારો પરિવારો રોજના ભોજન માટે લાચાર છે. ગાંધીનગર સિવિલ હોસ્પિટલના સુપ્રિટેન્ડેન્ટ મુજબ મહિલાએ ઉંદર મારવાની દવા પીધી હતી, હાલમાં તેમની સારવાર ચાલી રહી છે અને સ્થિતિ સ્થિર છે.
