Food department raids in Deesa: બનાસકાંઠાના ડીસા શહેરમાં ખાદ્ય પદાર્થોની ગુણવત્તા સામે ખોરાક અને ઔષધ નિયમન તંત્ર એટલે કે FDAએ મોટી કાર્યવાહી કરી છે. પાલનપુર વર્તુળ કચેરીની ટીમે ડીસા GIDC વિસ્તારમાં પાણીની ટાંકી સામે આવેલી ‘મે. પ્રકાશ ગૃહ ઉદ્યોગ’ નામની પેઢી પર ઓચિંતી તપાસ હાથ ધરી હતી. તપાસ દરમિયાન જરૂરી ફૂડ લાઇસન્સ વિના ખાદ્યચીજોનું ઉત્પાદન અને વેચાણ થતું હોવાનું સામે આવ્યું હતું. ટીમે સ્થળ પરથી કોર્ન પફ, કોર્ન બોલ, મિક્સ મસાલા અને કલર સહિતનો જથ્થો તપાસ માટે લીધો હતો અને કુલ 301 કિલોગ્રામ જેટલો, અંદાજે રૂ. 37,008ની કિંમતનો જથ્થો સીઝ કર્યો હતો.
લેબોરેટરી રિપોર્ટમાં નોન-પરમિટેડ કલરનો ખુલાસો
ડેઝિગ્નેટેડ ઓફિસર ટી.એચ. પટેલના માર્ગદર્શન હેઠળ ફૂડ સેફ્ટી ઓફિસર એમ.એલ. ગુર્જરે આ કાર્યવાહી હાથ ધરી હતી. તપાસ દરમિયાન શંકાસ્પદ ખાદ્ય પદાર્થોના નમૂનાઓ ફૂડ સેફ્ટી એન્ડ સ્ટાન્ડર્ડ એક્ટ-2006 હેઠળ લેવામાં આવ્યા હતા અને વડોદરા સ્થિત ફૂડ એનાલિસ્ટ લેબોરેટરીમાં મોકલવામાં આવ્યા હતા. લેબોરેટરી રિપોર્ટમાં કોર્ન પફ અને કોર્ન બોલમાં ખાદ્ય પદાર્થોમાં ઉપયોગ માટે મંજૂર ન હોય તેવા કલરની હાજરી સામે આવી હતી. પરિણામે સંબંધિત નમૂનાઓને ‘અનસેફ’ અને ‘સબસ્ટાન્ડર્ડ’ જાહેર કરવામાં આવ્યા હોવાનું તંત્રએ જણાવ્યું છે.
લાઇસન્સ વિના ચાલતી હતી ખાદ્યચીજોની કામગીરી
FDAની તપાસમાં પેઢી પાસે ખાદ્યચીજોના ઉત્પાદન અને વેચાણ માટે જરૂરી લાઇસન્સ ન હોવાનું પણ સામે આવ્યું હતું. તેમ છતાં ત્યાં કોર્ન પફ, કોર્ન બોલ, મિક્સ મસાલા અને કલરનો જથ્થો તૈયાર કરવામાં આવતો હોવાનું જાણવા મળ્યું હતું. તંત્રએ શંકાસ્પદ સામગ્રીના નમૂનાઓ લીધા બાદ બાકીનો જથ્થો સીઝ કરી કાયદેસરની કાર્યવાહી શરૂ કરી છે. સમગ્ર કાર્યવાહી ફૂડ સેફ્ટી એન્ડ સ્ટાન્ડર્ડ એક્ટ-2006ની જોગવાઈઓ હેઠળ આગળ ધપાવવામાં આવી રહી છે.
બાળકોને આકર્ષવા કાર્ટૂન આધારિત રેપરનો ઉપયોગ
તપાસ દરમિયાન બાળકોને આકર્ષવા માટે નાસ્તાના રેપર અને વેચાણમાં કાર્ટૂન કેરેક્ટર સંબંધિત નામોનો ઉપયોગ થતો હોવાની વિગતો પણ સામે આવી છે. ખાસ કરીને ‘થ્રી ઇડિયટ્સ’ જેવા નામોનો ઉપયોગ કરીને બાળકોનું ધ્યાન ખેંચવામાં આવતું હોવાનું જણાવાયું છે. FDAએ આ પ્રકારના આકર્ષક પેકિંગ અને ખાદ્ય પદાર્થોમાં બિનમંજૂર કલરના ઉપયોગને લઈને ગંભીરતા દાખવી છે.
વાલીઓને FDAની ખાસ અપીલ
આ કાર્યવાહી બાદ ખોરાક અને ઔષધ નિયમન તંત્ર દ્વારા વાલીઓ અને નાગરિકોને બજારમાંથી બાળકો માટે નાસ્તાની વસ્તુઓ ખરીદતી વખતે ખાસ સાવચેતી રાખવા અપીલ કરવામાં આવી છે. આકર્ષક કાર્ટૂન રેપર, વધુ પડતા ચમકદાર રંગવાળા ખુલ્લા અથવા અનધિકૃત નાસ્તા ખરીદવાનું ટાળવા તેમજ કોઈપણ પેકેટવાળી ખાદ્ય સામગ્રી લેતા પહેલાં તેની ગુણવત્તા, પેકિંગ, લેબલિંગ અને માન્ય લાઇસન્સ સંબંધિત વિગતો તપાસવાની સલાહ આપવામાં આવી છે. ડીસાની આ કાર્યવાહી બાદ તંત્ર દ્વારા આવી ખાદ્યચીજોના ઉત્પાદન અને વેચાણ સામે તપાસ વધુ કડક બને તેવી શક્યતા છે.
