Accident on Ahmedabad-Vadodara Expressway: ગુજરાતના સૌથી વ્યસ્ત ગણાતા અમદાવાદ-વડોદરા એક્સપ્રેસ વે પર વહેલી સવારે એક અત્યંત દુઃખદ અને કાળજું કંપાવી દેનારી ઘટના સામે આવી છે. વડોદરાથી અમદાવાદ તરફ આવી રહેલી એક ખાનગી લક્ઝરી બસ અને ટ્રક વચ્ચે ભયાનક ટક્કર થઈ હતી. આ ગોઝારા અકસ્માતમાં 5 મુસાફરોના ઘટનાસ્થળે જ કરુણ મોત નીપજ્યા છે. ઘટનાની જાણ થતાં જ આસપાસના લોકો અને હાઈવે પેટ્રોલિંગની ટીમ તાત્કાલિક મદદ માટે દોડી આવી હતી.
ગાઢ ઊંઘમાં જ મુસાફરો પર ત્રાટક્યો કાળ
મળતી પ્રાથમિક માહિતી અનુસાર, આ દુર્ઘટના 'સાઈ સુદર્શન ટ્રાવેલ્સ'ની લક્ઝરી બસ સાથે ઘટી હતી, જે સુરતથી ઉપડીને રાજસ્થાન તરફ જઈ રહી હતી. સવારે આશરે 4 વાગ્યાના સુમારે જ્યારે મોટાભાગના મુસાફરો ગાઢ ઊંઘમાં હતા, ત્યારે જ વડોદરા-અમદાવાદ એક્સપ્રેસ વે પર આ અકસ્માત સર્જાયો હતો. બસ અને ટ્રક વચ્ચેની ટક્કર એટલી જોરદાર હતી કે બસના આગળના ભાગનો ભુકડો બોલી ગયો હતો અને સુતેલા મુસાફરોમાં ચીસાચીસ તથા અફરાતફરીનો માહોલ સર્જાયો હતો.
ઈજાગ્રસ્તોને તાત્કાલિક હોસ્પિટલ ખસેડાયા
આ કરુણ ઘટનામાં 5 લોકોએ પોતાના જીવ ગુમાવ્યા છે, જ્યારે અન્ય ઘણા મુસાફરો ગંભીર રીતે ઈજાગ્રસ્ત થયા છે. ઘટના બનતા જ સ્થાનિક લોકો અને રાહદારીઓએ બચાવ કામગીરી શરૂ કરી હતી. 108 એમ્બ્યુલન્સ મારફતે ઈજાગ્રસ્તોને તાત્કાલિક નજીકની હોસ્પિટલમાં સારવાર અર્થે ખસેડવામાં આવ્યા છે, જ્યાં ડૉક્ટરો દ્વારા તેમની સારવાર કરવામાં આવી રહી છે.
પોલીસ કાફલો ઘટનાસ્થળે, ટ્રાફિક હળવો કરાયો
અકસ્માતની જાણ થતાં જ સ્થાનિક પોલીસનો કાફલો ઘટનાસ્થળે પહોંચી ગયો હતો. અકસ્માત એટલો વિકરાળ હતો કે હાઈવે પર વાહનોની લાંબી કતારો લાગી ગઈ હતી અને ભારે ટ્રાફિક જામની સ્થિતિ સર્જાઈ હતી. પોલીસે તાત્કાલિક ક્રેનની મદદથી ક્ષતિગ્રસ્ત વાહનોને રસ્તા પરથી દૂર કરાવીને ટ્રાફિક વ્યવહાર પૂર્વવત કરાવ્યો હતો અને આગળની કાર્યવાહી હાથ ધરી હતી.
પોલીસે હાથ ધરી કાયદેસરની તપાસ
પોલીસે મૃતકોના મૃતદેહોને પોસ્ટમોર્ટમ અર્થે મોકલી આપ્યા છે અને તેમના પરિવારજનોને જાણ કરવાની કામગીરી શરૂ કરી છે. અકસ્માત કયા કારણોસર સર્જાયો, શું ડ્રાઈવરને ઝોકું આવી ગયું હતું કે વાહનની ગતિ મર્યાદા બહાર હતી, તે તમામ પાસાઓ પર પોલીસ દ્વારા ઝીણવટભરી તપાસ શરૂ કરવામાં આવી છે.
