Fake navratri pass scam: અમદાવાદમાં ગરબાના ઓનલાઇન પાસના નામે ખેલૈયાઓ સાથે સાયબર છેતરપિંડી થયાનો કિસ્સો સામે આવ્યો છે. શહેરમાં આયોજિત ‘અનંત બ્રહ્માંડ’ ગરબાના અધિકૃત નામ, લોગો અને બ્રાન્ડિંગનો કથિત દુરુપયોગ કરીને Instagram મારફતે બોગસ પાસ વેચવામાં આવતા હોવાનો ખુલાસો થયો છે. આ મામલે આયોજકો દ્વારા સાયબર ક્રાઇમમાં ફરિયાદ નોંધાવવામાં આવી છે. પ્રાથમિક ફરિયાદ મુજબ, ઠગોએ ડિસ્કાઉન્ટની લાલચ આપીને ખેલૈયાઓને નકલી ઓનલાઇન ટિકિટ વેચવાનો પ્રયાસ કર્યો હતો. સમગ્ર મામલે પોલીસે તપાસ શરૂ કરી છે.
‘વીર.રાજપૂત’ નામના Instagram ID પરથી વેચાતા હતા પાસ
ફરિયાદમાં જણાવ્યા અનુસાર, અમદાવાદ એક્સપિરિયન્સ એક્સચેન્જ કંપની દ્વારા 14 ઓક્ટોબરે રાંચરડા-થોળ રોડ પર અરવિંદ એપલવુડ્સ નજીક ‘અનંત બ્રહ્માંડ’ નામે ગરબાનું આયોજન કરવામાં આવ્યું હતું. આ ઇવેન્ટ માટે ઓગસ્ટ મહિનાથી ઓનલાઇન ટિકિટનું વેચાણ શરૂ કરવામાં આવ્યું હતું. પાસની કિંમત રૂ. 4,000થી રૂ. 10,000 સુધી રાખવામાં આવી હતી. દરમિયાન ‘વીર.રાજપૂત’ નામના Instagram એકાઉન્ટ પરથી આ ગરબાના પાસ વેચવામાં આવતા હોવાની જાણ આયોજકોને થઈ હતી.
રૂ. 3,100માં પાસ ખરીદનાર ગ્રાહકને શંકા ગઈ
મળતી માહિતી મુજબ, એક ગ્રાહકે આ Instagram એકાઉન્ટ પરથી રૂ. 3,100માં ઓનલાઇન ટિકિટ ખરીદી હતી. જોકે, પાસની અધિકૃતતા અંગે ખાતરી કરવા માટે ગ્રાહકે આયોજકોનો સંપર્ક કર્યો હતો. ત્યારબાદ આયોજકોએ તપાસ કરતાં સંબંધિત Instagram ID પરથી વેચવામાં આવતા પાસ બોગસ હોવાની શંકા ઊભી થઈ હતી. વધુ તપાસમાં રૂ. 6,000ની કિંમત ધરાવતા પાસને ડિસ્કાઉન્ટ સાથે રૂ. 4,000માં વેચવાની જાહેરાત કરવામાં આવતી હોવાનું પણ સામે આવ્યું હતું. આ રીતે ઓછા ભાવે પાસ આપવાની લાલચનો ઉપયોગ કરીને લોકોને ફસાવવાનો પ્રયાસ થયો હોવાનો આક્ષેપ છે.
કંપનીના નામે બોગસ ઈમેઇલ અને બ્રાન્ડિંગનો દુરુપયોગ
ફરિયાદ મુજબ, અજાણ્યા શખસોએ લોકોને વિશ્વાસમાં લેવા માટે કંપનીના ડોમેન સાથે મળતું આવતું બોગસ ઈમેઇલ એડ્રેસ પણ બનાવ્યું હતું. આ ઉપરાંત, ‘અનંત બ્રહ્માંડ ગરબા’નું અધિકૃત નામ, લોગો અને બ્રાન્ડિંગનો ઉપયોગ કરીને પાસની ડિસ્કાઉન્ટ ઓફર દર્શાવવામાં આવી હતી. આ રીતથી ગ્રાહકોને એવું લાગે કે ટિકિટનું વેચાણ અધિકૃત માધ્યમથી થઈ રહ્યું છે. જોકે, આ એકાઉન્ટ ચલાવનાર વ્યક્તિઓની ઓળખ અને છેતરપિંડીમાં તેમની ચોક્કસ ભૂમિકા અંગે પોલીસ તપાસ બાદ જ વધુ સ્પષ્ટતા થશે.
સાયબર ક્રાઇમમાં ફરિયાદ, ખેલૈયાઓને સાવચેત રહેવા અપીલ
આ સમગ્ર મામલે આયોજકોએ સાયબર ક્રાઇમમાં ફરિયાદ નોંધાવી છે, જેના આધારે પોલીસે તપાસ હાથ ધરી છે. સાયબર ઠગાઈથી બચવા માટે ખેલૈયાઓને ગરબાના પાસ માત્ર ઇવેન્ટ કંપનીની સત્તાવાર વેબસાઇટ અથવા અધિકૃત વેચાણ માધ્યમ પરથી જ ખરીદવાની સલાહ આપવામાં આવી છે. Instagram કે અન્ય સોશિયલ મીડિયા પ્લેટફોર્મ પર અસામાન્ય ડિસ્કાઉન્ટની ઓફર મળે તો તેની સત્યતા ચકાસ્યા વિના પૈસા ચૂકવવા નહીં. ટિકિટ ખરીદતી વખતે વેબસાઇટનું સરનામું, ઈમેઇલની અધિકૃતતા અને ચુકવણીની વિગતોની ખરાઈ કરવી પણ જરૂરી છે. હાલ પોલીસ ફરિયાદના આધારે આ મામલે વધુ તપાસ કરી રહી છે.
