Fire Breaks Out on Top Floor of Palladium Corporate Building in Ahmedabad Makarba: અમદાવાદના સરખેજ-મકરબા વિસ્તારમાં મકરબા અંડરપાસ નજીક આવેલી જાણીતી 'પેલેડિયમ' (Palladium) કોર્પોરેટ હાઈ-રાઈઝ બિલ્ડિંગમાં શુક્રવારે આગ લાગવાની ઘટના બની હતી. બિલ્ડિંગના સૌથી ઉપરના માળે (ટોપ ફ્લોર) આવેલી એક ઓફિસમાં અચાનક આગ ભભૂકી ઉઠતા સમગ્ર સંકુલમાં અફરાતફરી અને ગભરાટનો માહોલ સર્જાયો હતો. આગને કારણે બિલ્ડિંગમાંથી ધુમાડાના ગોટેગોટા નીકળતા જોવા મળ્યા હતા, જે મુખ્ય રસ્તા પરથી પણ સ્પષ્ટ દેખાતા હોવાથી રાહદારીઓમાં પણ કુતૂહલ અને ચિંતા વ્યાપી ગઈ હતી.
સમયસૂચકતાથી તમામ કર્મચારીઓ સુરક્ષિત બહાર નીકળ્યા
ટોપ ફ્લોર પર આગ લાગ્યાની જાણ થતા જ બિલ્ડિંગમાં હાજર તમામ કર્મચારીઓ અને મુલાકાતીઓને તાત્કાલિક અસરથી નીચે ઉતારીને બિલ્ડિંગ ખાલી કરાવવામાં આવી હતી. લોકોની સતર્કતા અને સમયસૂચકતાને કારણે આગ વધુ વિકરાળ સ્વરૂપ ધારણ કરે તે પહેલાં જ તમામ લોકો સુરક્ષિત રીતે બહાર આવી ગયા હતા. ફાયર વિભાગના જણાવ્યા અનુસાર, બિલ્ડિંગ સમયસર ખાલી થઈ ગઈ હોવાથી કોઈ પણ વ્યક્તિ ફસાઈ ન હતી અને કોઈ અલગ રેસ્ક્યુ ઓપરેશન કરવાની જરૂર પડી ન હતી. આ ઘટનામાં કોઈ જાનહાનિ કે ઈજાના સમાચાર નથી, જે તંત્ર અને લોકો માટે મોટી રાહતની વાત છે.
ફાયર બ્રિગેડની ત્રણ ગાડીઓએ આગ પર મેળવ્યો કાબૂ
ઘટનાની જાણ થતા જ અમદાવાદ ફાયર એન્ડ ઈમરજન્સી સર્વિસની ટીમ તાત્કાલિક એક્શનમાં આવી હતી અને ત્રણ ફાયર ટેન્ડર (ફાયર ફાઈટર ગાડીઓ) ઘટનાસ્થળે દોડી આવ્યા હતા. ફાયરના જવાનોએ હાઈ-રાઈઝ બિલ્ડિંગના ટોપ ફ્લોર પર પાણીનો સતત મારો ચલાવીને ગણતરીના સમયમાં જ આગને સંપૂર્ણપણે કાબૂમાં લઈ લીધી હતી. ફાયર બ્રિગેડની ઝડપી કામગીરીના કારણે આગ બિલ્ડિંગના અન્ય માળ કે આસપાસની ઓફિસોમાં પ્રસરતી અટકી હતી, જેનાથી મોટું નુકસાન ટળ્યું હતું.
શોર્ટ સર્કિટની આશંકા, પોલીસ અને ફાયર વિભાગની તપાસ શરૂ
પ્રાથમિક તપાસમાં એવું અનુમાન લગાવવામાં આવી રહ્યું છે કે ઓફિસમાં થયેલા ઈલેક્ટ્રિકલ શોર્ટ સર્કિટના કારણે આ આગ લાગી હતી. જોકે, આગ લાગવાનું ચોક્કસ કારણ હજુ સુધી સત્તાવાર રીતે સ્પષ્ટ થયું નથી. ઘટનાની જાણ થતા સ્થાનિક પોલીસનો કાફલો પણ સ્થળ પર પહોંચી ગયો હતો. હાલ ફાયર વિભાગ અને પોલીસ દ્વારા સંયુક્ત રીતે તપાસ હાથ ધરવામાં આવી છે કે આગ શોર્ટ સર્કિટથી લાગી હતી કે અન્ય કોઈ કારણ જવાબદાર છે. આ ઉપરાંત, આગને કારણે ઓફિસમાં કેટલું આર્થિક નુકસાન થયું છે તેનો પણ અંદાજ મેળવવામાં આવી રહ્યો છે.
