Devbhumi Dwarka Drought Relief: દેવભૂમિ દ્વારકા જિલ્લામાં ઓછા વરસાદને કારણે ખેડૂતો મુશ્કેલીમાં મુકાયા હોવાના મુદ્દે કોંગ્રેસે રાજ્ય સરકાર સામે વિરોધ નોંધાવ્યો છે. જિલ્લા કોંગ્રેસ સમિતિએ ખેડૂતોને સાથે રાખીને નિષ્ફળ ગયેલા મગફળીના પાકનાં સૂકાં ઝાંખરાનું પાર્સલ કુરિયર મારફતે મુખ્યમંત્રીને મોકલ્યું હતું. કોંગ્રેસની માગ છે કે દ્વારકા સહિતના અસરગ્રસ્ત જિલ્લાઓને તાત્કાલિક દુષ્કાળગ્રસ્ત જાહેર કરવામાં આવે અને ખેડૂતોને રાહત તથા વળતર આપવામાં આવે.
દ્વારકા જિલ્લામાં વરસાદની અછતથી ખેડૂતોની મુશ્કેલી વધી
કોંગ્રેસના દાવા મુજબ, ચાલુ વર્ષે દેવભૂમિ દ્વારકા જિલ્લામાં ખૂબ ઓછો વરસાદ પડતાં ખેતી પર ગંભીર અસર થઈ છે. પાણીની અછત અને મગફળી સહિતના પાકને થયેલા નુકસાનને કારણે ખેડૂતો આર્થિક મુશ્કેલીનો સામનો કરી રહ્યા છે. વિરોધ કરી રહેલા કોંગ્રેસના નેતાઓએ જણાવ્યું હતું કે જિલ્લામાં દુષ્કાળ જેવી સ્થિતિ હોવા છતાં સરકાર દ્વારા હજુ સુધી સત્તાવાર રીતે દુષ્કાળગ્રસ્ત જાહેર કરવામાં આવ્યો નથી. ખેડૂતોને રાહત અને વળતર ન મળતું હોવાના મુદ્દે પણ તેમણે નારાજગી વ્યક્ત કરી હતી.
મુખ્યમંત્રીને મોકલ્યાં મગફળીના સૂકાં ઝાંખરાં
દેવભૂમિ દ્વારકા જિલ્લા કોંગ્રેસ સમિતિએ ખેડૂતોની સમસ્યાઓ તરફ સરકારનું ધ્યાન દોરવા માટે અનોખો વિરોધ કર્યો હતો. નિષ્ફળ ગયેલા મગફળીના પાકનાં સૂકાં ઝાંખરાં પાર્સલમાં ભરીને મુખ્યમંત્રીને મોકલવામાં આવ્યાં હતાં. કિસાન નેતા પાલભાઈ આંબલીયાએ સરકાર પર પ્રહાર કરતાં આક્ષેપ કર્યો હતો કે ખેડૂતોની દુર્દશાનો સર્વે કરવા માટે પૂરતી કામગીરી થતી નથી, જ્યારે કૃષિમંત્રી સોશિયલ મીડિયા પર રીલ્સ બનાવવામાં વ્યસ્ત છે. તેમણે જણાવ્યું હતું કે મુખ્યમંત્રી સુધી પાકના નમૂના પહોંચાડવાનો હેતુ ખેડૂતોની વાસ્તવિક સ્થિતિ તરફ સરકારનું ધ્યાન દોરવાનો છે.
કોંગ્રેસે સરકાર સમક્ષ મૂકી આ માગણીઓ
દેવભૂમિ દ્વારકા ઉપરાંત જામનગર અને પોરબંદર સહિતના અસરગ્રસ્ત વિસ્તારોમાં ખેડૂતોને રાહત આપવા કોંગ્રેસ અને કિસાન નેતાઓએ વિવિધ માગણીઓ કરી છે.
દેવભૂમિ દ્વારકા, જામનગર અને પોરબંદરને દુષ્કાળગ્રસ્ત જાહેર કરવામાં આવે.
ખેડૂતોના પાકને થયેલા નુકસાનનો સર્વે કરીને યોગ્ય વળતર આપવામાં આવે.
ખેડૂતોનાં પાક ધિરાણ માફ કરવામાં આવે.
પશુઓ માટે ઘાસચારા વિતરણ કેન્દ્રો શરૂ કરવામાં આવે.
સૌની યોજના અંતર્ગત જિલ્લાના ડેમોમાં પાણી પહોંચાડવામાં આવે.
અસરગ્રસ્ત ખેડૂતો માટે તાત્કાલિક રાહત કામગીરી શરૂ કરવામાં આવે.
30 ઓક્ટોબર સુધીની મુદત, આંદોલનની ચીમકી
કોંગ્રેસ અને કિસાન નેતાઓએ રાજ્ય સરકારને ચેતવણી આપી છે કે જો 30 ઓક્ટોબર સુધીમાં દેવભૂમિ દ્વારકા જિલ્લાને દુષ્કાળગ્રસ્ત જાહેર કરીને ખેડૂતોને યોગ્ય સહાય અને વળતર આપવામાં નહીં આવે, તો આગામી દિવસોમાં સમગ્ર જિલ્લામાં વ્યાપક આંદોલન કરવામાં આવશે. હવે સરકાર દ્વારા ખેડૂતોની માગણીઓ અંગે શું નિર્ણય લેવામાં આવે છે અને દુષ્કાળની સ્થિતિનું મૂલ્યાંકન કરવા માટે કયા પગલાં ભરવામાં આવે છે તેના પર અસરગ્રસ્ત ખેડૂતોની નજર રહેશે.
