Ahmedabad Cyber Fraud: અમદાવાદના વસ્ત્રાલ વિસ્તારમાં રહેતા અને અમરાઈવાડીની શાળામાં માધ્યમિક શિક્ષક તરીકે ફરજ બજાવતા 43 વર્ષીય યુવક સાયબર ઠગોની જાળમાં ફસાયા છે. 12 સપ્ટેમ્બરના રોજ રાત્રિના સમયે તેમના મોબાઇલ પર અજાણ્યા નંબર પરથી વોટ્સએપ મેસેજ આવ્યો હતો. ઠગોએ પોતાની ઓળખ અદાણી ગેસના પ્રતિનિધિ તરીકે આપવા માટે પ્રોફાઇલ પિક્ચરમાં કંપનીનો લોગો રાખ્યો હતો. મેસેજમાં ચીમકી આપવામાં આવી હતી કે જો આજે રાત સુધીમાં ગેસનું બાકી બિલ ચૂકવવામાં નહીં આવે, તો ગેસ કનેક્શન તુરંત જ કાપી નાખવામાં આવશે.
બિલ ભરી દીધું હોવા છતાં જાળ બિછાવી
શિક્ષકે અગાઉ જ ગેસ બિલ ચૂકવી દીધું હોવાથી તેમણે બિલ પેમેન્ટનો સ્ક્રીનશોટ તે નંબર પર મોકલી આપ્યો હતો. પરંતુ, સાયબર ઠગો તો ચોક્કસ પ્લાનિંગ સાથે જ આવ્યા હતા. તેમણે શિક્ષકને વિશ્વાસમાં લેવાનો પ્રયાસ કર્યો અને જણાવ્યું કે સિસ્ટમમાં તમારું બિલ અપડેટ થયું નથી. આ સમસ્યાના ઉકેલ માટે ઠગોએ 'અદાણી ગેસ' નામની એક શંકાસ્પદ APK (એપીકે) ફાઇલ વોટ્સએપ પર મોકલી અને શિક્ષકને તે એપ્લિકેશન ડાઉનલોડ કરવા માટે જણાવ્યું હતું.
APK ફાઇલ અને ક્રેડિટ કાર્ડની માહિતી
ગઠિયાઓએ ચાલુ કોલ દરમિયાન જ શિક્ષકને તે એપીકે ફાઇલ ઓપન કરાવી હતી. આ ફાઇલમાં શિક્ષકે પોતાની એક્સિસ બેંકના ક્રેડિટ કાર્ડની વિગતો દાખલ કરી હતી. જોકે, ફાઇલમાં પ્રોસેસ પૂર્ણ થતી ન હોવાનું જણાવીને ઠગે શિક્ષકના મનમાં વધુ શંકા ન ઉપજે તે રીતે કામ લીધું હતું. ક્રેડિટ કાર્ડની સંવેદનશીલ માહિતી મેળવી લીધા બાદ પણ OTP વિના પૈસા ટ્રાન્સફર કરવા માટે ઠગોએ એક નવો દાવ ખેલ્યો હતો.
કોલ ફોરવર્ડિંગનો કોડ ડાયલ કરાવીને OTP મેળવ્યો
એપ્લિકેશનમાં ટેકનિકલ ખામી હોવાનું બહાનું બતાવીને સાયબર ઠગે શિક્ષક પાસે તેમના મોબાઇલમાં એક ખાસ કોડ ડાયલ કરાવ્યો હતો. શિક્ષકે જેવો એ કોડ ડાયલ કર્યો કે તરત જ તેમના મોબાઇલનો કોલ અને મેસેજ ફોરવર્ડિંગ ઓપ્શન એક્ટિવ થઈ ગયો હતો. આનાથી બેંકમાંથી આવતા તમામ OTP અને સિક્યોરિટી મેસેજ સીધા ઠગોના નંબર પર રીડાયરેક્ટ થઈ ગયા હતા. પરિણામે શિક્ષકના ક્રેડિટ કાર્ડમાંથી ત્રણ અલગ-અલગ ટ્રાન્ઝેક્શન દ્વારા કુલ ₹3.48 લાખની રકમ ઉપાડી લેવામાં આવી હતી.
રામોલ પોલીસ સ્ટેશનમાં ફરિયાદ અને સાયબર નિષ્ણાતોની સલાહ
પોતાના બેંક એકાઉન્ટમાંથી લાખો રૂપિયા ઉપડી ગયાનો મેસેજ મળતાં જ શિક્ષકના પગ નીચેથી જમીન ખસી ગઈ હતી. તેમણે તાત્કાલિક સમગ્ર ઘટના અંગે રામોલ પોલીસ સ્ટેશનમાં સત્તાવાર રીતે ફરિયાદ નોંધાવી હતી. રામોલ પોલીસે ટેકનિકલ એનાલિસિસ અને સાયબર સેલની મદદથી આ મામલે વધુ તપાસ હાથ ધરી છે. સાયબર એક્સપર્ટ્સ નાગરિકોને ચેતવણી આપે છે કે ક્યારેય વોટ્સએપ કે એસએમએસ પર આવેલી કોઈ અજાણી APK ફાઇલ ડાઉનલોડ કરવી નહીં તથા મોબાઇલમાં અજાણ્યા કોડ ડાયલ કરવાથી બચવું.
