Cryptocurrency scam Ahmedabad: અમદાવાદમાં ક્રાઈમ બ્રાન્ચે ક્રિપ્ટોકરન્સીના નામે મોટાપાયે છેતરપિંડી કરનાર એક આરોપીને ઝડપી પાડવામાં મોટી સફળતા મેળવી છે. મુંબઈના દહિસર વિસ્તારમાં અનેક લોકોને ઊંચા વળતરના સપના બતાવી કરોડો રૂપિયાનું રોકાણ કરાવનાર સુજીત શંકરરાવ જાદવની અમદાવાદ એરપોર્ટ પરથી ધરપકડ કરવામાં આવી છે. લાંબા સમયથી ફરાર રહેલો આ આરોપી આખરે પોલીસના જાળમાં આવી ગયો છે.
કોણ છે આરોપી?
મળતી માહિતી મુજબ 47 વર્ષીય સુજીત જાદવ વ્યવસાયે સોફ્ટવેર ક્ષેત્ર સાથે સંકળાયેલો છે. તેની સામે મુંબઈના દહિસર પોલીસ સ્ટેશનમાં ભારતીય ન્યાય સંહિતા તેમજ મહારાષ્ટ્ર પ્રોટેક્શન ઓફ ઇન્ટરેસ્ટ ઓફ ડિપોઝિટર્સ (MPID) એક્ટ હેઠળ ગુનો નોંધાયેલો હતો. તે મૂળ મહારાષ્ટ્રના સતારા જિલ્લાનો રહેવાસી છે, પરંતુ છેલ્લા કેટલાક સમયથી અમદાવાદના નરોડા વિસ્તારમાં છુપાઈને રહેતો હતો. અંદાજે બે વર્ષથી તે પોલીસને ચકમો આપી રહ્યો હતો.
કઈ રીતે ક્રિપ્ટોકરન્સી સ્કેમ કરવામાં આવ્યો?
તપાસ મુજબ વર્ષ 2021 દરમિયાન જાદવે તેના સાથીદારો સાથે મળીને દહિસર વિસ્તારમાં એક ઓફિસ શરૂ કરી હતી. તેણે પોતાની કંપનીને રોકાણ સંબંધિત સંસ્થા તરીકે રજૂ કરી હતી અને લોકોમાં વિશ્વાસ ઊભો કરવા માટે વિવિધ પ્રેઝન્ટેશન અને લાલચભરી યોજનાઓ રજૂ કરેલી. ખાસ કરીને, ક્રિપ્ટોકરન્સીમાં રોકાણ કરવાથી ટૂંકા ગાળામાં ચાર ગણું વળતર મળશે એવી ખાતરી આપીને તેણે લોકોનો વિશ્વાસ જીતવાનો પ્રયાસ કર્યો હતો. આ આકર્ષક વચનોના કારણે 100થી વધુ રોકાણકારોએ લાખો-કરોડો રૂપિયા તેની પાસે મૂક્યા હતા. શરૂઆતમાં થોડા લોકોને નાનું વળતર આપીને વિશ્વાસ મજબૂત બનાવાયો હતો, પરંતુ ત્યારબાદ મોટી રકમ એકત્રિત થતાં જ ઓફિસ અચાનક બંધ કરી દેવામાં આવી. આરોપી અને તેના સાથીદારોએ રોકાણકારોનો સંપર્ક તોડી નાખ્યો અને સ્થળ પરથી ફરાર થઈ ગયા. ત્યારથી પીડિતોએ પોલીસમાં ફરિયાદ નોંધાવી હતી.
ગુપ્ત બાતમીના આધારે કાર્યવાહી હાથ ધરાઈ
અમદાવાદ ક્રાઈમ બ્રાન્ચને મળેલી ગુપ્ત બાતમીના આધારે કાર્યવાહી હાથ ધરાઈ હતી. ટેકનિકલ સર્વેલન્સ અને મુંબઈ પોલીસ સાથેના સંકલનથી માહિતી મળી કે, સુજીત જાદવ અમદાવાદ એરપોર્ટ પર આવવાનો છે. પોલીસે અગાઉથી જ વોચ ગોઠવી રાખી હતી. જેમ આરોપી એરપોર્ટ પર પહોંચ્યો, ત્યારે જ તેને ઝડપી લેવામાં આવ્યો.
પોલીસ દ્વારા લાલચભરી યોજનાઓથી સાવચેત રહેવાની અપીલ
હાલ પોલીસે તેની વધુ પૂછપરછ શરૂ કરી છે અને અન્ય સંભવિત સહઆરોપીઓ વિશે માહિતી મેળવવાની કાર્યવાહી ચાલી રહી છે. સાથે સાથે, છેતરપિંડીમાં સંકળાયેલા નાણાકીય વ્યવહારોની પણ તપાસ કરવામાં આવી રહી છે. પોલીસ અધિકારીઓએ રોકાણકારોને આવી લાલચભરી યોજનાઓથી સાવચેત રહેવાની અપીલ કરી છે અને કોઈ પણ પ્રકારનું રોકાણ કરતા પહેલા યોગ્ય તપાસ કરવાની સલાહ આપી છે.
