Analogue paneer in Gujarat: ગુજરાતમાં નાગરિકોના આરોગ્ય સાથે ચેડાં કરતા ભેળસેળિયા માફિયાઓ સામે રાજ્ય સરકારે કડક વલણ અપનાવ્યું છે. વિધાનસભામાં પૂછાયેલા પ્રશ્નના જવાબમાં આરોગ્ય મંત્રી પ્રફુલભાઈ પાનસેરિયાએ સ્પષ્ટ કર્યું કે રાજ્યમાં એક પણ ભેળસેળિયા માફિયાને સાંખી લેવામાં નહીં આવે. મુખ્યમંત્રી ભૂપેન્દ્ર પટેલ અને ગૃહ રાજ્યમંત્રી હર્ષ સંઘવીના માર્ગદર્શન હેઠળ ‘એનાલોગ પનીર’ના ઉત્પાદન, વેચાણ અને પરિવહન પર સંપૂર્ણ પ્રતિબંધ મૂકવામાં આવ્યો છે. પામ ઓઇલ અને મિલ્ક પાવડર જેવા ઘટકોમાંથી બનતું આ પનીર અસલી પનીર ન હોવાને કારણે તેના ઉપયોગને લઈને આરોગ્ય સંબંધિત ચિંતાઓ પણ વ્યક્ત કરવામાં આવી છે.
પાંચ મહિનાથી વિશેષ ડ્રાઇવ ચલાવવામાં આવી
રાજ્યમાં એનાલોગ પનીર સામે કાર્યવાહી ઉપરાંત ખાદ્યપદાર્થોમાં ભેળસેળ રોકવા છેલ્લા ચારથી પાંચ મહિનાથી વિશેષ ડ્રાઇવ ચલાવવામાં આવી રહી છે. ફૂડ પોઇઝનિંગ અથવા આરોગ્ય માટે હાનિકારક કેમિકલયુક્ત પ્રોડક્ટના પોઝિટિવ રિપોર્ટ મળ્યા બાદ કાયદેસરની કાર્યવાહી હાથ ધરવામાં આવી છે. તાજેતરમાં ઊંઝામાં વરિયાળી અને જીરામાં હાનિકારક કલર ભેળવતી પાંચ ફેક્ટરીઓને સીલ કરવામાં આવી છે. સરકારના જણાવ્યા મુજબ, એનાલોગ પનીર પર પ્રતિબંધ બાદ પ્રમાણભૂત અને અસલી સહકારી ડેરીઓના પનીર, ચીઝ અને બટરના વેચાણમાં પણ વધારો નોંધાયો છે.
ઉત્પાદન કે વેચાણ કરનાર સામે જેલ અને દંડ
બનાસકાંઠા સહિતના વિસ્તારોમાં નકલી તેલ અને ઘીના વેચાણ અંગે ઉઠાવવામાં આવેલી ચિંતાના જવાબમાં આરોગ્ય મંત્રીએ જણાવ્યું કે ફૂડ સેફ્ટી એક્ટ, 2006 હેઠળ અસુરક્ષિત ખાદ્યપદાર્થોનું ઉત્પાદન કે વેચાણ કરનાર સામે જેલ અને દંડ બંનેની જોગવાઈ છે. સરકાર દ્વારા ભેળસેળયુક્ત ખાદ્યપદાર્થો સામે સતત તપાસ અને કાર્યવાહી કરવામાં આવી રહી છે. તંત્રનું કહેવું છે કે ખાદ્યપદાર્થોની ગુણવત્તા સાથે ચેડાં કરનારા સામે નિયમ મુજબ કડક પગલાં લેવામાં આવશે.
ભેળસેળયુક્ત ખાદ્યપદાર્થ બનાવતા કે વેચતા લોકો અંગે કોઈ માહિતી
આરોગ્ય વિભાગે નાગરિકો અને લોકપ્રતિનિધિઓને પણ અપીલ કરી છે કે જો તેમની પાસે નકલી અથવા ભેળસેળયુક્ત ખાદ્યપદાર્થ બનાવતા કે વેચતા લોકો અંગે કોઈ માહિતી હોય તો સરકાર સુધી પહોંચાડે. આવી માહિતીના આધારે તાત્કાલિક તપાસ કરીને કાયદાકીય કાર્યવાહી કરવામાં આવશે. સરકારના આ કડક વલણથી આગામી દિવસોમાં ભેળસેળિયા ખાદ્યપદાર્થોના ઉત્પાદન અને વેચાણ સામેની કાર્યવાહી વધુ તેજ થવાની શક્યતા છે.
