Bumble Dating Scam: ગાંધીનગરમાં ડેટિંગ એપ Bumble મારફતે મિત્રતા કર્યા બાદ એક મહિલા સાથે ₹5.28 લાખની કથિત સાયબર છેતરપિંડીનો મામલો સામે આવ્યો છે. ફાર્માસ્યુટિકલ કંપનીમાં સિનિયર એક્ઝિક્યુટિવ તરીકે કામ કરતી મહિલા ફરિયાદ મુજબ, Bumble પર સંપર્કમાં આવેલા એક વ્યક્તિએ પોતાની ઓળખ ડૉક્ટર તરીકે આપી હતી અને તે નેધરલેન્ડમાં રહેતો હોવાનો દાવો કર્યો હતો. બંને વચ્ચે મિત્રતા થયા બાદ કથિત આરોપીએ અલગ-અલગ કારણોસર મહિલાને પૈસા ટ્રાન્સફર કરવા કહ્યું હતું. બાદમાં કસ્ટમ્સ ક્લિયરન્સના નામે પણ વિવિધ બેંક ખાતામાં રકમ જમા કરાવવામાં આવી હતી. છેતરપિંડીનો ખ્યાલ આવતા મહિલાએ સાયબર ક્રાઈમમાં ફરિયાદ નોંધાવી છે.
Bumble પર ઓળખાણ, ડૉક્ટર હોવાનો દાવો
ગાંધીનગર રેન્જના સાયબર સેલમાં નોંધાયેલી ફરિયાદ મુજબ, ગાંધીનગરના રહેવાસી નૂપુર ગાંધીએ એપ્રિલ 2021માં Bumble ડેટિંગ એપ ડાઉનલોડ કરી હતી. આ દરમિયાન એક વ્યક્તિ સાથે તેમની ઓળખાણ થઈ હતી, જેણે પોતાની ઓળખ ડૉ. નિખિલ કોટેચા તરીકે આપી હતી. તેણે પોતે મૂળ ભારતનો હોવાનું પરંતુ છેલ્લા કેટલાક વર્ષોથી નેધરલેન્ડના એમ્સ્ટરડેમમાં રહેતો હોવાનો દાવો કર્યો હતો. બંનેએ મોબાઈલ નંબરની આપ-લે કરી હતી અને ત્યારબાદ ચેટ તથા વોટ્સએપ કોલ્સ દ્વારા સતત વાતચીત થતી હતી. ફરિયાદ મુજબ, સમય જતાં મહિલાને તેના પર વિશ્વાસ બેસી ગયો હતો. ત્યારબાદ આ વ્યક્તિએ કહ્યું હતું કે તે ભારતમાં હોસ્પિટલ શરૂ કરવા માટે તબીબી સાધનો ખરીદવા તુર્કીમાં છે. આંતરરાષ્ટ્રીય ટ્રાન્ઝેક્શન બાદ તેનું બેંક ખાતું બ્લોક થઈ ગયું હોવાનું કહી હોટેલ, ટેક્સી અને ફ્લાઈટના ખર્ચ માટે પૈસાની જરૂર હોવાનું જણાવ્યું હતું. તેના આધારે મહિલાએ 1 મે, 2026ના રોજ આરિફ અલીના નામના સ્લાઈસ સ્મોલ ફાઈનાન્સ બેંક ખાતામાં ₹1.50 લાખ ટ્રાન્સફર કર્યા હતા.
કસ્ટમ્સ અધિકારી બની મહિલાને ફોન કર્યો
ત્યારબાદ સમગ્ર મામલો કસ્ટમ્સ ક્લિયરન્સના નામે આગળ વધ્યો હતો. 4 મેના રોજ મહિલાને એક મોબાઈલ નંબર પરથી ફોન આવ્યો હતો. ફોન કરનાર મહિલાએ પોતે દિલ્હી કસ્ટમ્સ વિભાગની અધિકારી હોવાનો દાવો કર્યો હતો અને "એરપોર્ટ સર્વિસ"ના નામે વાત કરી હતી. કથિત રીતે તેને જણાવાયું હતું કે ડૉ. કોટેચાને કસ્ટમ્સ દ્વારા અટકાવવામાં આવ્યા છે અને ક્લિયરન્સ માટે ₹85,800 ચૂકવવા પડશે. આ વાત માનીને મહિલાએ એક્સિસ બેંકમાં આર.કે. એન્ટરપ્રાઇઝના નામના ખાતામાં ₹85,800 ટ્રાન્સફર કર્યા હતા. ત્યારબાદ કથિત કસ્ટમ્સ અધિકારીએ ડૉ. કોટેચા પાસે ₹10થી 12 લાખની કિંમતના હીરાની વીંટી, નેકલેસ અને બ્રેસલેટ હોવાનો દાવો કર્યો હતો અને તેના ક્લિયરન્સ માટે GST ચૂકવવાનું કહ્યું હતું. આ પછી કૅનરા બેંકમાં બુરા સુજાતા કુમારીના નામે ₹1.78 લાખ અને આર.કે. એન્ટરપ્રાઇઝના ખાતામાં ₹1.14 લાખ ટ્રાન્સફર કરાવવામાં આવ્યા હતા.
વધુ પૈસાની માંગણી થતાં ફ્રોડનો ભાંડો ફૂટ્યો
ફરિયાદ મુજબ, 5 મેના રોજ મહિલાને ફરી એ જ નંબર પરથી ફોન આવ્યો હતો અને અલગ-અલગ બહાના બનાવી વધુ પૈસાની માંગણી કરવામાં આવી હતી. આ સમયે મહિલાને પોતાની સાથે સાયબર ફ્રોડ થયો હોવાની શંકા ગઈ હતી. ત્યારબાદ તેમણે રાષ્ટ્રીય સાયબર ક્રાઈમ હેલ્પલાઈન 1930 પર સંપર્ક કર્યો હતો. ફરિયાદમાં જણાવ્યા મુજબ, અલગ-અલગ બેંક ખાતામાં કુલ ₹5.28 લાખ જમા કરાવવામાં આવ્યા હતા. ત્યારબાદ મહિલાએ ગાંધીનગર ક્રાઈમ બ્રાન્ચના સાયબર સેલનો સંપર્ક કરતાં ગુનો નોંધવામાં આવ્યો હતો. પોલીસના જણાવ્યા મુજબ, આરોપીઓએ કથિત રીતે પૂર્વઆયોજિત રીતે ડૉ. નિખિલ કોટેચાની ઓળખનો ઉપયોગ કરીને Bumble પ્રોફાઈલ બનાવી હતી અને નેધરલેન્ડ આધારિત મોબાઈલ નંબરનો ઉપયોગ કરીને મહિલાનો સંપર્ક કર્યો હતો. વિશ્વાસ કેળવ્યા બાદ અન્ય વ્યક્તિને દિલ્હી કસ્ટમ્સ અધિકારી તરીકે રજૂ કરીને વધુ રકમની માંગણી કરવામાં આવી હતી. સમગ્ર મામલે પોલીસે સંબંધિત કલમો હેઠળ ગુનો નોંધી વધુ તપાસ હાથ ધરી છે.
