Bomb threat on Indigo flight: લખનઉથી દમામ જઈ રહેલી ઇન્ડિગોની ઇન્ટરનેશનલ ફ્લાઇટ 6E 097માં બોમ્બ હોવાની ધમકી મળતા ભારે ખળભળાટ મચી ગયો હતો. વિમાન અમદાવાદ નજીકથી પસાર થઈ રહ્યું હતું ત્યારે બોમ્બની ધમકી અંગેની માહિતી સામે આવી હતી. ઘટનાની ગંભીરતા જોતા પાયલટે તાત્કાલિક અમદાવાદ એર ટ્રાફિક કંટ્રોલને જાણ કરી હતી, જેના પગલે ફ્લાઇટનું અમદાવાદ ઇન્ટરનેશનલ એરપોર્ટ પર ઇમરજન્સી લેન્ડિંગ કરાવવામાં આવ્યું હતું.
અમદાવાદ એરપોર્ટ પર સુરક્ષિત રીતે ઉતારવામાં આવ્યું
મળતી માહિતી મુજબ, ફ્લાઇટ લખનઉથી સાંજે લગભગ 4 વાગ્યે દમામ માટે રવાના થઈ હતી. અમદાવાદ નજીક પહોંચ્યા બાદ ધમકી મળતા વિમાનને ડાયવર્ટ કરીને સાંજે લગભગ 5.55 વાગ્યે અમદાવાદ એરપોર્ટ પર સુરક્ષિત રીતે ઉતારવામાં આવ્યું હતું. લેન્ડિંગ બાદ વિમાનને સામાન્ય પાર્કિંગ વિસ્તારમાં લઈ જવાને બદલે સીધું આઈસોલેશન એરિયામાં ખસેડવામાં આવ્યું હતું. ત્યારબાદ વિમાનમાં સવાર તમામ મુસાફરોને સુરક્ષિત રીતે બહાર ઉતારી લેવામાં આવ્યા હતા.
સુરક્ષા ટીમોએ એરક્રાફ્ટની સઘન તપાસ શરૂ કરી
બોમ્બની ધમકી મળતા એરપોર્ટ પર સુરક્ષા એજન્સીઓને તાત્કાલિક એલર્ટ કરવામાં આવી હતી. વિમાનને આઈસોલેશન એરિયામાં રાખીને બોમ્બ ડિસ્પોઝલ સ્ક્વોડ સહિતની સુરક્ષા ટીમોએ એરક્રાફ્ટની સઘન તપાસ શરૂ કરી હતી. વિમાનમાં કોઈ શંકાસ્પદ વસ્તુ કે અન્ય જોખમી સામગ્રી છે કે નહીં તે જાણવા માટે સુરક્ષા પ્રોટોકોલ મુજબ તપાસ હાથ ધરવામાં આવી રહી છે. સમગ્ર કાર્યવાહી દરમિયાન એરપોર્ટ પર જરૂરી સુરક્ષા વ્યવસ્થા વધારી દેવામાં આવી હતી.
એજન્સીઓ દ્વારા તમામ જરૂરી પ્રોટોકોલનું પાલન
હાલ બોમ્બની ધમકી કયા સ્ત્રોતથી મળી અને તપાસ દરમિયાન વિમાનમાંથી કોઈ શંકાસ્પદ વસ્તુ મળી કે નહીં તે અંગે સત્તાવાર માહિતી સામે આવી નથી. સુરક્ષા એજન્સીઓની તપાસ પૂર્ણ થયા બાદ જ સમગ્ર ઘટનાની સ્થિતિ સ્પષ્ટ થશે. મુસાફરોની સુરક્ષાને પ્રાથમિકતા આપીને ફ્લાઇટને અમદાવાદમાં ઉતારવામાં આવતા એરપોર્ટ તંત્ર અને સુરક્ષા એજન્સીઓ દ્વારા તમામ જરૂરી પ્રોટોકોલનું પાલન કરવામાં આવી રહ્યું છે.
