Bhavnagar ST Bus Accident: ભાવનગર શહેરના મધ્યમાં આવેલા મુખ્ય એસ.ટી. બસ સ્ટેન્ડ બહાર આજે કરૂણ અને કમકમાટીભર્યો અકસ્માત સર્જાયો હતો. સિહોર-ટાણા-વરલ રૂટની એસ.ટી. બસ ડેપોમાંથી બહાર નીકળી રહી હતી ત્યારે અચાનક ડ્રાઈવરે કાબૂ ગુમાવતા અને બસની બ્રેક ન વાગતાં પૂરપાટ ઝડપે દોડતી બસ ફૂટપાથ પર ચડી ગઈ હતી. આ બસે ફૂટપાથ પર બેસેલા લોકોને અડફેટે લીધા બાદ ભરૂચા ક્લબની દીવાલ સાથે ભયાનક રીતે ટકરાઈ હતી. આ અકસ્માતમાં વાહનની રાહ જોઈને બેસેલા માતા-પુત્રીનું ઘટનાસ્થળે જ કમકમાટીભર્યું મોત નીપજ્યું છે.
માતા-પુત્રીનું અકાળે અવસાન
આ અકસ્માતમાં ફૂટપાથ પર નિર્દોષ ભાવે બેસેલા પરમાર પરિવારના બે સભ્યોના પ્રાણપંખેરુ ઊડી ગયા હતા. ઘટનાની જાણ થતાં જ આસપાસના લોકોના ટોળાં ઉમટી પડ્યા હતા. ઈજાગ્રસ્તોને તાત્કાલિક 108 એમ્બ્યુલન્સ મારફતે ભાવનગરની સર તખ્તસિંહજી (SRT) હોસ્પિટલ ખાતે સારવાર અર્થે ખસેડવામાં આવ્યા હતા.
મૃતકોની વિગતો:
લલીતાબેન ગુલાબસિંહ પરમાર (ઉંમર: 28 વર્ષ, રહે. રામધરી, સણોસરા)
સોનિયાબેન ગુલાબસિંહ પરમાર (ઉંમર: 7 વર્ષ, રહે. રામધરી, સણોસરા)
ઈજાગ્રસ્તની વિગતો:
મધુબેન લાલજીભાઈ વાઘેલા (રહે. ઠોડા, ઉમરાળા) – હાલ હોસ્પિટલમાં સારવાર હેઠળ છે.
ઘટનાસ્થળે પોલીસ કાફલો દોડી આવ્યો
ગમખ્વાર અકસ્માતની જાણ થતાં જ સ્થાનિક પોલીસ કાફલો તેમજ ટ્રાફિક પોલીસ ઘટનાસ્થળે દોડી આવી હતી. બસ ભરૂચા ક્લબની દીવાલમાં ઘૂસી ગઈ હોવાથી અને રસ્તા પર લોકોના ટોળાં જમા થતાં ટ્રાફિકજામની સ્થિતિ સર્જાઈ હતી. પોલીસે ક્રેનની મદદથી બસને ખસેડીને વાહનવ્યવહાર પૂર્વવત કરાવ્યો હતો અને મૃતદેહોને પોસ્ટમોર્ટમ અર્થે પીએમ રૂમ ખાતે મોકલી આપ્યા હતા.
બ્રેક ફેઇલ કે ડ્રાઈવરની બેદરકારી?
પ્રાથમિક માહિતી મુજબ, બસ સ્ટેન્ડમાંથી બહાર નીકળતી વખતે બસની બ્રેક ફેઇલ થઈ ગઈ હોવાનું કહેવાય છે. જોકે, પોલીસે બસ ડ્રાઈવરની અટકાયત કરી તેની સામે ગુનો નોંધવાની તજવીજ હાથ ધરી છે. આ ઉપરાંત, બસમાં યાંત્રિક ખામી હતી કે કેમ તેની ખાતરી કરવા માટે RTO (Regional Transport Office) ની મદદ લેવામાં આવી રહી છે.
ST નિગમની બસોની જાળવણી સામે સવાલો
બસની ફિટનેસ પર સવાલો: અવારનવાર એસ.ટી. બસોની બ્રેક ફેઇલ થવાની કે યાંત્રિક ખામી સર્જાવાની ઘટનાઓ સામે આવતી રહે છે. બસ સ્ટેન્ડ જેવા અત્યંત ભીડભાડ વાળા વિસ્તારમાં જ બ્રેક ફેઇલ થવાના કારણે બે માસૂમ જીવ જતાં એસ.ટી. નિગમની બસોની મેન્ટેનન્સ અને ફિટનેસ સામે ગંભીર સવાલો ઊભા થયા છે.
સહાયની માગ: સ્થાનિકો અને પીડિત પરિવારે મૃતકના આશ્રિતોને એસ.ટી. નિગમ તેમજ રાજ્ય સરકાર દ્વારા યોગ્ય વળતર અને કડક તપાસની માગ કરી છે.
