Bharuch News: ભરૂચ જિલ્લામાં મુખ્ય સરકારી વકીલ પરેશ પંડ્યા અને મદદનીશ સરકારી વકીલ (APP) નીલમ મિસ્ત્રીએ અચાનક સરકારમાં રાજીનામું આપી દેતાં કાનૂની આલમમાં ભારે ચકચાર મચી છે. સરકારે બંનેના રાજીનામા મંજૂર કર્યા બાદ એડિશનલ પબ્લિક પ્રોસિક્યુટર (APP) જે.બી. પંચાલને જિલ્લા સરકારી વકીલનો વધારાનો ચાર્જ સોંપ્યો છે. જો, કે બંને સરકારી વકીલોએ અચાનક રાજીનામું આપવાનો ચોક્કસ કારણ હજુ સુધી સ્પષ્ટ થયું નથી. રાજીનામા પાછળના કારણ અંગે બંને તરફથી કોઈ સત્તાવાર નિવેદન આપવામાં આવ્યું નથી.
ચકચારી કેસોમાં પરેશ પંડ્યાએ કરી હતી દમદાર રજૂઆત
મુખ્ય સરકારી વકીલ પરેશ પંડ્યા ભરૂચ જિલ્લામાં અનેક મહત્વના અને ચકચારી કેસોમાં સરકાર પક્ષે રજૂઆત કરી ચૂક્યા છે. ઝઘડિયામાં બાળકી પર દુષ્કર્મ અને હત્યાના કેસમાં તેમણે કોઈ ફી લીધા વિના સરકાર પક્ષે દલીલો કરી આરોપીને ફાંસીની સજા અપાવવામાં મહત્વની ભૂમિકા ભજવી હતી. આ ઉપરાંત હાંસોટ રમખાણો અને ડબલ મર્ડર કેસ, વટારીયા સુગરમાં ગેરવહીવટનો કેસ તથા હીરા જોટવા સામેના મનરેગા કૌભાંડ જેવા કેસોમાં પણ તેમણે સરકાર પક્ષે દલીલો કરી હતી.
ડાયરેક્ટર ઓફ પ્રોસિક્યુશન વિભાગે રાજીનામા નકારવાની ભલામણ કરી
બંને સરકારી વકીલોના રાજીનામા બાદ ડાયરેક્ટર ઓફ પ્રોસિક્યુશન વિભાગ પણ સક્રિય બન્યો છે. મળતી માહિતી મુજબ, વિભાગે બંનેના રાજીનામા અસ્વીકાર કરીને તેમને ફરજ પર યથાવત રાખવા સરકારને ભલામણ કરી છે. આ ભલામણ પાછળ ભરૂચ જિલ્લા કોર્ટમાં સરકારી વકીલોના મહેકમની સ્થિતિ પણ મહત્વનું કારણ હોવાનું માનવામાં આવે છે.
સરકારી વકીલોના મહેકમની પણ ગંભીર કટોકટી
વર્ષ 2022માં ભરૂચ જિલ્લામાં પાંચ મદદનીશ સરકારી વકીલોની નિમણૂક કરવામાં આવી હતી. જોકે, તેમાંથી ચાર વકીલો વિવિધ કારણોસર સેવામુક્ત થઈ ચૂક્યા છે. આ સ્થિતિમાં મુખ્ય સરકારી વકીલ અને APPના રાજીનામાથી જિલ્લા કોર્ટમાં સરકારી પક્ષની કાનૂની કામગીરીને લઈને વધુ ચિંતા ઊભી થઈ છે. હવે સરકાર આ રાજીનામા અંગે શું નિર્ણય લે છે અને નવા સરકારી વકીલોની નિમણૂક ક્યારે થાય છે તેના પર સૌની નજર છે.
