Banaskantha Congress Organization Dispute: બનાસકાંઠા જિલ્લા કોંગ્રેસ પ્રમુખ તરીકે ગુલાબસિંહ રાજપૂતની નિમણૂકને એક વર્ષથી વધુ સમય વીતી ગયો હોવા છતાં જિલ્લા સંગઠનનું માળખું જાહેર થયું ન હતું. બે દિવસ પહેલાં ગુલાબસિંહ રાજપૂતે પોતાની રીતે બનાસકાંઠા અને વાવ-થરાદ જિલ્લા કોંગ્રેસ સંગઠનની જાહેરાત કરી હતી. જોકે, ગુજરાત કોંગ્રેસ પ્રમુખ અમિત ચાવડાએ આ નિમણૂકોને તાત્કાલિક અસરથી રદ કરી દેતાં પક્ષમાં આંતરિક વિવાદ સપાટી પર આવ્યો છે. કાર્યવાહી બાદ ગુલાબસિંહ રાજપૂતે કહ્યું કે, ‘અમારે કોંગ્રેસ સામે નહીં, ભાજપ સામે લડવું છે. મને જિલ્લા પ્રમુખ પદેથી હટાવીને અન્ય કોઈની નિમણૂક કરી દો.’
200થી વધુ કાર્યકર્તાઓને અલગ-અલગ જવાબદારી અપાઈ હતી
બે દિવસ પહેલાં ગુલાબસિંહ રાજપૂતે બનાસકાંઠા જિલ્લા કોંગ્રેસ સમિતિનું માળખું જાહેર કર્યું હતું. તેમાં ઉપપ્રમુખ, મહામંત્રી, મંત્રી, ખજાનચી, પ્રવક્તા, કાર્યાલય મંત્રી અને કારોબારી સભ્યો સહિતની વિવિધ જવાબદારીઓ સોંપવામાં આવી હતી. અંદાજે 200થી વધુ કાર્યકર્તાઓને સંગઠનમાં અલગ-અલગ જવાબદારી આપવામાં આવી હતી. ગુલાબસિંહે આ યાદી સોશિયલ મીડિયા પર પણ જાહેર કરી હતી.
અમિત ચાવડાએ નિમણૂકો રદ કરી
સંગઠનની યાદી જાહેર થયા બાદ પ્રદેશ કોંગ્રેસ પ્રમુખ અમિત ચાવડાએ આ કાર્યવાહી સામે વાંધો ઉઠાવ્યો હતો. પ્રદેશ કોંગ્રેસની મંજૂરી વગર અને સંબંધિત નેતાઓને વિશ્વાસમાં લીધા વિના સંગઠનનું માળખું જાહેર કરવામાં આવ્યું હોવાનો દાવો કરવામાં આવ્યો હતો. આ કારણોસર બનાસકાંઠા જિલ્લા કોંગ્રેસ સમિતિના હોદ્દેદારો અને કારોબારીની જાહેર કરાયેલી યાદીની તમામ નિમણૂકો તાત્કાલિક અસરથી રદ કરવામાં આવી હતી.
'બેથી ત્રણ લોકો કોંગ્રેસને નુકસાન કરવાનો પ્રયાસ કરે છે'
ગુલાબસિંહ રાજપૂતે આ કાર્યવાહી અંગે નારાજગી વ્યક્ત કરતાં જણાવ્યું કે, તેઓ જિલ્લા પ્રમુખ બન્યા ત્યારથી સંગઠનની નિમણૂક અટકેલી છે અને સંગઠનનું માળખું જ ન હોય તો કામગીરી કેવી રીતે થઈ શકે તે અંગે અનેક વખત રજૂઆત કરી છે. તેમણે આક્ષેપ કર્યો કે બેથી ત્રણ લોકો મજબૂત કોંગ્રેસને નુકસાન પહોંચાડવાનો પ્રયાસ કરી રહ્યા છે. તેમના જણાવ્યા મુજબ, લોકસભા ચૂંટણીમાં પાટણ અને બનાસકાંઠામાં પાર્ટીને નુકસાન કરનારા લોકો જ હવે સંગઠનને નબળું પાડવાનો પ્રયાસ કરી રહ્યા છે.
'યાદી જાહેર કરતા પહેલાં તમામને વિશ્વાસમાં લીધા હતા'
ગુલાબસિંહે દાવો કર્યો કે જાહેર કરાયેલી યાદીમાં નામ નક્કી કરતાં ધારાસભ્યો, પૂર્વ ધારાસભ્યો, પૂર્વ જિલ્લા પ્રમુખો અને તાલુકા સમિતિના આગેવાનો પાસેથી અભિપ્રાય લેવામાં આવ્યો હતો. તેમણે કહ્યું કે પાર્ટી માટે સક્રિય રીતે કામ કરનારા કાર્યકર્તાઓને જવાબદારી સોંપવામાં આવી હતી. કેટલાક લોકોએ નામો અંગે વાંધો ઉઠાવ્યો હતો, ત્યારે તેમણે પ્રદેશ પ્રમુખ સાથે ચર્ચા કરીને નામોમાં ફેરફાર કરવાની પણ તૈયારી દર્શાવી હતી, પરંતુ સંગઠનનું માળખું તો બનાવવું જોઈએ તેવી તેમની માગ હતી. ગુલાબસિંહે કેટલાક નેતાઓ પર ગંભીર આક્ષેપો પણ કર્યા હતા. તેમણે દાવો કર્યો કે કેટલાક લોકોએ ચૂંટણી દરમિયાન કોંગ્રેસને નુકસાન પહોંચાડવા માટે ભાજપ સાથે સાંઠગાંઠ કરી હતી. જોકે, આ તમામ આક્ષેપો ગુલાબસિંહ રાજપૂતના નિવેદન પર આધારિત છે અને તેની સ્વતંત્ર પુષ્ટિ થઈ નથી.
'મને પ્રમુખ પદેથી હટાવી દો, પણ સંગઠન તો બનાવો'
ગુલાબસિંહ રાજપૂતે કહ્યું કે, ‘અમારે કોંગ્રેસ સામે નહીં, ભાજપ સામે લડવું છે.’ તેમણે સંગઠન રચનાને લઈને ચાલી રહેલા મતભેદો વચ્ચે પોતાને જિલ્લા પ્રમુખ પદેથી હટાવીને અન્ય કોઈની નિમણૂક કરવાની પણ વાત કરી. તેમણે કહ્યું કે જો પાર્ટીમાં એવા લોકોને જવાબદારી આપવામાં આવશે જે કોંગ્રેસને નુકસાન પહોંચાડે છે તો તેનો વિરોધ કરવામાં આવશે. તેમના જણાવ્યા મુજબ, તેમણે અને ઉત્તર ગુજરાતના અન્ય નેતાઓએ પ્રભારી તથા રાષ્ટ્રીય પ્રમુખ સમક્ષ પણ રજૂઆત કરી છે. પ્રદેશ પ્રમુખને પણ આ અંગે રજૂઆત કરવામાં આવી છે. ગેનીબેન ઠાકોર સાથે પણ આ મુદ્દે ચર્ચા થઈ હોવાનું તેમણે જણાવ્યું હતું. ગુલાબસિંહે કહ્યું કે તેઓ ઈચ્છે છે, કે પાર્ટી આંતરિક મતભેદોને બદલે ભાજપ સામેની લડાઈ પર ધ્યાન કેન્દ્રિત કરે અને સંગઠનને મજબૂત બનાવે.
