Gujarat High Court Rejects Asaram Interim Bail: દુષ્કર્મના કેસમાં આજીવન કેદની સજા કાપી રહેલા આસારામને ગુજરાત હાઈકોર્ટ તરફથી વધુ એક મોટો આંચકો લાગ્યો છે. પોતાની વયોવૃદ્ધ અને બિમાર પત્નીને મળવા માટે આસારામે 20 દિવસના હંગામી (અસ્થાયી) જામીન મેળવવા અરજી કરી હતી. જોકે, અદાલતે તમામ પાસાંઓ અને દલીલો વિચારણામાં લીધા બાદ આ જામીન અરજીને સંપૂર્ણપણે ફગાવી દીધી છે. કાયદાકીય રાહત મેળવવાની આસારામની વધુ એક કોશિશ પર પાણી ફરી વળ્યું છે.
સરકારી વકીલ અને મેડિકલ રિપોર્ટની મહત્વની દલીલો
સુનાવણી દરમિયાન રાજ્ય સરકાર વતી ઉપસ્થિત રહેલા સરકારી વકીલે જામીન અરજીનો સખત વિરોધ કર્યો હતો. તેમણે અદાલત સમક્ષ મેડિકલ રિપોર્ટ રજૂ કરતા જણાવ્યું હતું કે, આસારામની પત્ની હાલમાં એક મલ્ટી-સ્પેશિયાલિટી હોસ્પિટલમાં સારવાર હેઠળ છે અને તેમની સ્થિતિ સંપૂર્ણપણે સ્થિર છે. તબીબોના જણાવ્યા અનુસાર, તેમને આગામી બે-ત્રણ દિવસમાં હોસ્પિટલમાંથી રજા પણ આપી દેવામાં આવશે. આ ઉપરાંત, પરિવારના સભ્યો અને અંગત ડોક્ટરો તેમની પૂરી સંભાળ રાખી રહ્યા હોવાથી આસારામને તાત્કાલિક ધોરણે જેલમાંથી બહાર લાવવાની કોઈ જ જરૂરિયાત ઊભી થતી નથી.
હાઈકોર્ટે આપી માનવતાવાદી રાહત: વીડિયો કોલથી કરી શકશે વાત
અદાલતે સરકારી વકીલની રજૂઆતો અને મેડિકલ રિપોર્ટની નોંધ લઈને સ્પષ્ટ કર્યું કે, આસારામને ટેમ્પરરી જામીન આપવા માટે કોઈ મજબૂત કારણ જણાતું નથી. જોકે, માનવીય અભિગમ અપનાવીને હાઈકોર્ટે આસારામને એક નાની રાહત ચોક્કસ આપી છે. અદાલતે આસારામને જેલ સુપરિન્ટેન્ડન્ટની મંજૂરી મેળવીને વીડિયો કોન્ફરન્સિંગ (VC) મારફતે પોતાની બીમાર પત્ની સાથે વાતચીત કરવાની પરવાનગી આપી છે.
રાજસ્થાન પેરોલનો હવાલો પણ કામ ન આવ્યો
આ અગાઉ, રાજસ્થાન હાઈકોર્ટે આસારામને અન્ય એક કેસમાં 20 દિવસની પેરોલ મંજૂર કરી હતી, જેને આધાર બનાવીને તેમણે ગુજરાત હાઈકોર્ટમાં પણ રાહત મેળવવાનો પ્રયાસ કર્યો હતો. પરંતુ ગુજરાત હાઈકોર્ટે સ્પષ્ટ કર્યું હતું કે, એક રાજ્યમાં મળેલી પેરોલ કે રાહતના આધારે બીજા રાજ્યની સજામાં આપોઆપ જામીન મેળવી શકાય નહીં. આસારામ ગાંધીનગર સેશન્સ કોર્ટ દ્વારા 2013ના બળાત્કાર કેસમાં દોષિત ઠર્યા બાદ આજીવન કેદની સજા ભોગવી રહ્યા છે.
