Rain is predicted in Gujarat: દેશના અનેક રાજ્યોમાં ચોમાસું સક્રિય છે ત્યારે ભારતીય હવામાન વિભાગ (IMD)એ આગામી દિવસોમાં વરસાદને લઈને મહત્વની આગાહી કરી છે. પૂર્વ ઉત્તર પ્રદેશ, પશ્ચિમ મધ્ય પ્રદેશ, પશ્ચિમ બંગાળ, ઓડિશા અને મિઝોરમમાં છેલ્લા 24 કલાક દરમિયાન ભારે વરસાદ નોંધાયો છે. ઉત્તર પ્રદેશ નજીકની લો પ્રેશર સિસ્ટમના કારણે આગામી ચાર દિવસ દરમિયાન મધ્યમથી ભારે વરસાદ અને વીજળી પડવાની શક્યતા છે. દરમિયાન, 11 સપ્ટેમ્બરની આસપાસ ઉત્તર આંધ્રપ્રદેશ અને દક્ષિણ ઓડિશા નજીક બંગાળની ખાડીમાં નવી લો પ્રેશર સિસ્ટમ સર્જાવાની સંભાવના છે.
12 સપ્ટેમ્બરે અત્યંત ભારે વરસાદનું એલર્ટ
નવી હવામાન સિસ્ટમની અસરથી મધ્ય પ્રદેશ અને છત્તીસગઢમાં 10થી 14 સપ્ટેમ્બર દરમિયાન અનેક વિસ્તારોમાં વરસાદની શક્યતા છે. ઓડિશામાં 10 સપ્ટેમ્બર અને અરુણાચલ પ્રદેશમાં 12 સપ્ટેમ્બરે અત્યંત ભારે વરસાદનું એલર્ટ આપવામાં આવ્યું છે, જ્યારે તટીય આંધ્રપ્રદેશ, તેલંગાણા અને વિદર્ભમાં 11થી 14 સપ્ટેમ્બર દરમિયાન ગાજવીજ સાથે ભારે વરસાદ પડી શકે છે. ઉત્તરાખંડમાં 10 સપ્ટેમ્બરથી ચાર દિવસ ભારે વરસાદની શક્યતા છે. બીજી તરફ દિલ્હી, હરિયાણા, ચંદીગઢ અને પંજાબમાં 8થી 13 સપ્ટેમ્બર દરમિયાન છૂટોછવાયો વરસાદ રહી શકે છે. છેલ્લા 24 કલાકમાં લોંગ આઇલેન્ડ અને અસમના આમ્રઘાટમાં 12 સેમી સુધી વરસાદ નોંધાયો છે.
30થી 40 કિમી પ્રતિ કલાકની ઝડપે પવન
ગુજરાતમાં પણ 12 સપ્ટેમ્બરથી વરસાદનું જોર ફરી વધવાની આગાહી કરવામાં આવી છે. દક્ષિણ ગુજરાતના ભરૂચ, નર્મદા, સુરત, તાપી, ડાંગ, નવસારી અને વલસાડ ઉપરાંત દમણ, દાદરા અને નગર હવેલીમાં ભારે વરસાદની સંભાવના છે. સૌરાષ્ટ્રના અમરેલી અને ભાવનગરમાં પણ છૂટાછવાયા સ્થળોએ ભારે વરસાદ પડી શકે છે. 12 અને 13 સપ્ટેમ્બરે અનેક વિસ્તારોમાં 30થી 40 કિમી પ્રતિ કલાકની ઝડપે પવન સાથે ગાજવીજ અને વીજળી પડવાની શક્યતા હોવાથી યલો એલર્ટ જાહેર કરવામાં આવ્યું છે. 14 સપ્ટેમ્બરે ઉત્તર ગુજરાત, દક્ષિણ ગુજરાત તથા સૌરાષ્ટ્ર-કચ્છના વિવિધ વિસ્તારોમાં હળવાથી મધ્યમ વરસાદી ઝાપટાં ચાલુ રહી શકે છે.
12 સપ્ટેમ્બરથી વરસાદનો નવો રાઉન્ડ શરૂ થઈ શકે
હવામાન નિષ્ણાતોના જણાવ્યા અનુસાર, મધ્ય ઉત્તર પ્રદેશની લો પ્રેશર સિસ્ટમ નબળી પડીને પૂર્વ ઉત્તર પ્રદેશ અને બિહાર તરફ આગળ વધી રહી છે, જ્યારે 11 સપ્ટેમ્બરની આસપાસ બંગાળની ખાડી તથા ઉત્તર આંધ્રપ્રદેશ-દક્ષિણ ઓડિશા કિનારે નવી સિસ્ટમ સક્રિય થવાની શક્યતા છે. તેના કારણે ગુજરાતમાં ભેજનું પ્રમાણ વધશે અને 12 સપ્ટેમ્બરથી વરસાદનો નવો રાઉન્ડ શરૂ થઈ શકે છે. હાલમાં ઉત્તર ગુજરાત અને સૌરાષ્ટ્રના કેટલાક વિસ્તારોમાં હવામાન પ્રમાણમાં શુષ્ક છે, પરંતુ આગામી વરસાદી સિસ્ટમ ખેડૂતો માટે રાહતરૂપ બની શકે છે. દિલ્હી-NCRમાં પણ 11 સપ્ટેમ્બર બાદ વરસાદના બે રાઉન્ડથી તાપમાન ઘટીને 31થી 33 ડિગ્રી સુધી પહોંચવાની શક્યતા છે.
