Aravalli police firing: અરવલ્લીના ધનસુરા નજીક શિનોલ વિસ્તારમાં અચાનક એક્શન ફિલ્મ જેવો માહોલ સર્જાયો હતો. બિશ્નોઈ ગેંગ સાથે સંકળાયેલા હોવાની પ્રાથમિક માહિતી ધરાવતા શંકાસ્પદ આરોપીઓની સ્કોર્પિયો કારનો પોલીસે પીછો કર્યો હતો. કાર રોકવાનો પ્રયાસ કરતાં પોલીસ વાહન સાથે અથડામણ થઈ હતી અને ત્યારબાદ આરોપીઓએ પોલીસ પર હુમલો કરવાનો પ્રયાસ કર્યો હોવાનો આરોપ છે. પરિસ્થિતિ વણસતાં પીઆઈ પી.બી. ચૌધરીએ સ્વબચાવમાં બે રાઉન્ડ ફાયરિંગ કર્યું હતું. જોકે, આ દરમિયાન આરોપીઓ સ્થળ પરથી ફરાર થઈ જતાં પોલીસે તેમની શોધખોળ માટે સર્ચ ઓપરેશન શરૂ કર્યું છે.
શંકાસ્પદ સ્કોર્પિયોનો પીછો કરતા SOGએ ઘેર્યા
પ્રાપ્ત વિગતો અનુસાર, SOGની ટીમને બાતમી મળી હતી કે એક શંકાસ્પદ સ્કોર્પિયો કાર વિસ્તારમાંથી પસાર થઈ રહી છે. બાતમીના આધારે પોલીસે કારનો પીછો શરૂ કર્યો હતો અને તેને રોકવાનો પ્રયાસ કર્યો હતો. જોકે, કારચાલકે વાહન રોકવાને બદલે પોલીસ વાહન સાથે અથડાવી હોવાનું સામે આવ્યું છે. અથડામણ બાદ સ્થિતિ વધુ ગંભીર બની હતી.
આરોપીઓએ બંદૂક બતાવી, પોલીસે સ્વબચાવમાં ફાયરિંગ કર્યું
પોલીસના જણાવ્યા મુજબ, કારમાં સવાર આરોપીઓએ પોલીસકર્મીઓ પર હુમલો કરવાનો પ્રયાસ કર્યો હતો અને રિવોલ્વર જેવી બંદૂક બતાવી હતી. આ દરમિયાન પીઆઈ પી.બી. ચૌધરી દ્વારા આરોપીઓ તરફથી થયેલા કથિત હુમલાના સ્વબચાવમાં બે રાઉન્ડ ફાયરિંગ કરવામાં આવ્યું હતું. ફાયરિંગ બાદ પણ આરોપીઓ પોલીસની પકડમાં આવ્યા નહોતા અને ઘટનાસ્થળેથી ફરાર થઈ ગયા હતા.
પોલીસ વાહન સાથે અથડામણમાં બે પોલીસકર્મી ઈજાગ્રસ્ત
સ્કોર્પિયો અને પોલીસ વાહન વચ્ચે થયેલી અથડામણમાં બે પોલીસકર્મીઓને ઈજા પહોંચી હોવાનું સામે આવ્યું છે. બનાવની જાણ થતાં અરવલ્લી જિલ્લા પોલીસ વડા મનોહરસિંહ જાડેજા પણ તાત્કાલિક ઘટનાસ્થળે પહોંચ્યા હતા. સમગ્ર ઘટનાની ગંભીરતાને ધ્યાનમાં રાખીને પોલીસ દ્વારા વિસ્તારની નાકાબંધી અને સર્ચ ઓપરેશન વધુ સઘન કરવામાં આવ્યું છે.
ગુજરાત-રાજસ્થાન બોર્ડર પર પોલીસની કડક નજર
ફરાર આરોપીઓ રાજ્યની સરહદ પાર કરીને અન્ય રાજ્યમાં નાસી ન જાય તે માટે ગુજરાત-રાજસ્થાન બોર્ડર પર પણ પોલીસ દ્વારા સઘન તપાસ શરૂ કરવામાં આવી છે. પોલીસની અલગ-અલગ ટીમો આરોપીઓની શોધખોળ કરી રહી છે અને શંકાસ્પદ વાહનોની ચકાસણી કરવામાં આવી રહી છે. આરોપીઓ ક્યાં ભાગ્યા અને તેમની સાથે અન્ય કેટલા લોકો સંકળાયેલા છે તે અંગે પણ તપાસ ચાલી રહી છે.
બિશ્નોઈ ગેંગ સાથે કનેક્શનની તપાસ
પ્રાથમિક વિગતોમાં આરોપીઓ બિશ્નોઈ ગેંગ સાથે સંકળાયેલા હોવાની માહિતી સામે આવી છે. જોકે, આ કનેક્શન અંગે તપાસ હજુ ચાલી રહી છે અને પોલીસ તરફથી અંતિમ પુષ્ટિ કરવામાં આવી નથી. હવે પોલીસ માટે સૌથી મોટો પડકાર ફરાર આરોપીઓને ઝડપી પાડવાનો અને સમગ્ર ઘટનાની પાછળનું નેટવર્ક શોધવાનો છે.
