Low Pressure: અમરેલી જિલ્લામાં જાફરાબાદ બંદરે હવામાન વિભાગની ચેતવણીના પગલે ફરી 1 નંબરનું સિગ્નલ લગાવવામાં આવ્યું છે. છેલ્લા દિવસોથી સૌરાષ્ટ્રના દરિયાકાંઠા વિસ્તારોમાં વાતાવરણમાં ફેરફાર જોવા મળી રહ્યો છે, જેમાં પવનની ગતિ વધતા અને વાદળછાયા માહોલ સાથે હળવા વરસાદની શક્યતા સર્જાઈ છે.
પવન અને છૂટાછવાયા વરસાદની શક્યતા
હવામાન વિભાગના અનુમાન પ્રમાણે અરબી સમુદ્રમાં સક્રિય નીચા દબાણના કારણે કાંઠાવર્તી વિસ્તારોમાં પવન અને છૂટાછવાયા વરસાદની શક્યતા છે. આ પરિસ્થિતિને ધ્યાનમાં રાખીને બંદર અધિકારીએ માછીમારોને દરિયામાં ન ઉતરવા અને દરિયાકાંઠાથી દૂર રહેવાની ચેતવણી આપી છે.
સ્થાનિક પ્રશાસને સુરક્ષા વધારી
હાલ બંદર પર 1 નંબરનું સિગ્નલ યથાવત રાખવામાં આવ્યું છે અને માછીમારોને તેનું પાલન કરવા જણાવ્યું છે. સ્થાનિક પ્રશાસને સુરક્ષા વધારી છે અને બંદર વિસ્તારના લોકોને હવામાન વિશે ચેતવણી ફેલાવી છે. હવામાનમાં સતત ફેરફારને ધ્યાનમાં રાખીને આગામી દિવસોમાં પણ સાવચેત રહેવાની સલાહ આપવામાં આવી છે.
