Ankleshwar GIDC Fire: ભરૂચ જિલ્લાના અંકલેશ્વર GIDC વિસ્તારમાં વીજપોલમાં આગ લાગવાની ઘટના સામે આવી છે. S.A. મોટર્સ પાસે આવેલા DGVCLના વીજપોલમાંથી અચાનક આગની જ્વાળાઓ નીકળવા લાગતાં આસપાસના લોકોમાં ગભરાટ ફેલાયો હતો. જોકે, ફાયર ટીમે સમયસર પહોંચીને આગ પર કાબૂ મેળવતાં મોટી દુર્ઘટના ટળી હતી.
શોર્ટ સર્કિટથી આગ લાગી હોવાનું અનુમાન
પ્રાથમિક માહિતી મુજબ, વીજપોલમાં શોર્ટ સર્કિટ થવાના કારણે આગ લાગી હોવાનું અનુમાન છે. ચાલુ વીજપ્રવાહ વચ્ચે વીજપોલમાં આગ ભભૂકતાં ત્યાંથી પસાર થતા રાહદારીઓ અને વાહનચાલકોમાં ભયનો માહોલ સર્જાયો હતો. સદનસીબે આ ઘટનામાં કોઈ જાનહાનિ થઈ હોવાના અહેવાલ નથી.
ફાયર ટીમે ગણતરીની મિનિટોમાં આગ પર મેળવ્યો કાબૂ
ઘટનાની જાણ થતાં જ નોટિફાઈડ વિભાગની ફાયર ટીમ તાત્કાલિક સ્થળ પર પહોંચી હતી. ફાયર જવાનોએ કામગીરી હાથ ધરીને ગણતરીની મિનિટોમાં આગને કાબૂમાં લીધી હતી. સમયસર કરવામાં આવેલી કામગીરીને કારણે આગ વધુ ફેલાતી અટકી હતી.
વીજ પુરવઠો બંધ કરી મરામતની કામગીરી
આગ લાગ્યા બાદ સુરક્ષાના ભાગરૂપે વીજ પુરવઠો બંધ કરવામાં આવ્યો હતો. ક્ષતિગ્રસ્ત વીજપોલની મરામતની કામગીરી પણ હાથ ધરવામાં આવી હતી, જેથી આસપાસના વિસ્તારમાં વીજ પુરવઠો ફરી શરૂ કરી શકાય. આ ઘટનાએ ઔદ્યોગિક વિસ્તારમાં વીજ સુરક્ષાની વ્યવસ્થા અંગે પણ સવાલો ઊભા કર્યા છે.
