Anjar Varsamedi Murder Case: પૂર્વ કચ્છના અંજાર તાલુકામાં આવેલા વરસામેડી ગામેથી એક અત્યંત ચોંકાવનારો અને હૃદયકંપાવી દેનારો ગુનાહિત કિસ્સો સામે આવ્યો છે. ગત 31 ઓગસ્ટના રોજ વરસામેડી ગામમાંથી 43 વર્ષીય લખ્ખુભાઈ રૂડાભાઈ હુંબલ નામના આધેડ અચાનક ગુમ થઈ ગયા હતા. પરિવારે તેમની શોધખોળ હાથ ધરી હતી પરંતુ કોઈ પત્તો મળ્યો ન હતો. આ દરમિયાન 5 સપ્ટેમ્બરના રોજ ગામના સીમ વિસ્તારમાં આવેલા તળાવ કિનારેથી બે શંકાસ્પદ પ્લાસ્ટિકના કોથળા મળી આવ્યા હતા. સ્થાનિક લોકોની જાણ બાદ પોલીસે કોથળા ખોલીને તપાસ કરતા તેમાંથી માનવ શરીરના અલગ-અલગ ટુકડાઓ મળી આવતા સમગ્ર વિસ્તારમાં અરેરાટી સાથે ભારે સનસનાટી મચી ગઈ હતી.
પ્લાસ્ટિકના કોથળામાંથી મળેલા ટુકડા અને પોલીસની દોડધામ
તળાવ કિનારેથી પ્લાસ્ટિકના મીણિયા થેલામાં બંધ હાલતમાં મળી આવેલા મૃતદેહના ટુકડાઓની પોલીસે બારીકાઈથી ઓળખવિધિ હાથ ધરી હતી. તપાસ દરમિયાન આ છીનભિન્ન કરાયેલો મૃતદેહ ગુમ થયેલા લખ્ખુભાઈ હુંબલનો જ હોવાનું સ્પષ્ટ થયું હતું. એક જાગૃત નાગરિક અને જવાબદાર નાગરિક તરીકે લખ્ખુભાઈની આવી ઘાતકી અને અમાનવીય રીતે કરાયેલી હત્યાને પગલે પૂર્વ કચ્છ પોલીસ તંત્ર તાત્કાલિક હરકતમાં આવ્યું હતું. પોલીસે બનાવ સ્થળે પહોંચી જરૂરી ફોરેન્સિક પુરાવા એકત્ર કર્યા હતા અને અજાણ્યા હત્યારા સામે હત્યાનો ગુનો નોંધીને તપાસનો ધમધમાટ શરૂ કર્યો હતો.
દોઢ વર્ષથી ચાલતા અનૈતિક પ્રેમસંબંધે લીધો નિર્દોષનો ભોગ
પૂર્વ કચ્છ પોલીસ અધિક્ષક (SP) સાગર બાગમારની સીધી સૂચના અને માર્ગદર્શન હેઠળ અંજાર સ્થાનિક પોલીસ તેમજ લોકલ ક્રાઈમ બ્રાન્ચ (LCB)ની ટીમોએ તપાસનો દોર સંભાળ્યો હતો. પોલીસે હ્યુમન સોર્સ, ટેકનિકલ સર્વેલન્સ અને ગુપ્ત બાતમીદારોની મદદથી ઊંડાણપૂર્વક તપાસ આદરી હતી. શંકાસ્પદ લોકોની કડક પૂછપરછ દરમિયાન એક એવો ચોંકાવનારો ખુલાસો થયો જેણે સૌ કોઈને સ્તબ્ધ કરી દીધા. મૃતક લખ્ખુભાઈની પત્ની સાથે તેમના જ પાડોશમાં રહેતા દિનેશ રાયધણભાઈ ઠાકોર નામના શખ્સને છેલ્લા દોઢ વર્ષથી અફેર એટલે કે અનૈતિક પ્રેમસંબંધ ચાલતો હતો.
મોડી રાત્રે ઘરે બોલાવી લોખંડના રોડથી નીપજાવ્યું મોત
પ્રેમમાં અંધ બનેલા પાડોશી પ્રેમી દિનેશ ઠાકોરને પોતાની પ્રેમિકા (મૃતકની પત્ની) સાથેના સંબંધોમાં પતિ લખ્ખુભાઈ કાંટો બની રહ્યા હોવાનું લાગતું હતું. આથી પ્રેમિકાને કાયમી ધોરણે પામવા માટે તેણે લખ્ખુભાઈને રસ્તામાંથી હટાવી દેવાનું ભયાનક કાવતરું ઘડી કાઢ્યું હતું. યોજના મુજબ આરોપી દિનેશે લખ્ખુભાઈને મોડી રાત્રે પોતાના ઘરે બોલાવ્યા હતા. લખ્ખુભાઈ જેવા તેના ઘરે પહોંચ્યા કે તુરંત જ દિનેશે તેમના પર માથાના ભાગે લોખંડના ભારે રોડ વડે સણસણતો ઘા ઝીંકી દીધો હતો. માથામાં ગંભીર ઈજાઓ થવાના કારણે લખ્ખુભાઈ ઘટનાસ્થળે જ લોહીલુહાણ થઈ ઢળી પડ્યા હતા અને તેમનું કરૂણ મોત નીપજ્યું હતું.
પુરાવાનો નાશ કરવા મૃતદેહના ટુકડા કરી તળાવમાં ફેંક્યા
હત્યા કર્યા બાદ પોતાના પાપ પર પડદો પાડવા અને પોલીસ પકડથી બચવા માટે આરોપી દિનેશે અત્યંત ક્રૂરતા દાખવી હતી. તેણે લખ્ખુભાઈના મૃતદેહના ધારદાર હથિયાર વડે બે ટુકડા કરી નાખ્યા હતા. ત્યારબાદ આ ટુકડાઓને પ્લાસ્ટિકના બે અલગ-અલગ કોથળામાં પેક કરીને મોડી રાત્રે છાનામાના ગામના તળાવ કિનારે ફેંકી દીધા હતા જેથી કોઈને શંકા ન જાય. જોકે, 'પાપ છાપરે ચડીને પોકારે છે' તેમ પોલીસની તીક્ષ્ણ તપાસ અને ટેકનિકલ ટીમોની મહેનત સામે આરોપી પકડાઈ ગયો હતો. પોલીસે આરોપી દિનેશ ઠાકોરની ધરપકડ કરી આગળની કાયદેસરની કાર્યવાહી હાથ ધરી છે.
