AMTS Bus Stand Vanishes Overnight: અમદાવાદ સ્માર્ટ સિટીના જોધપુર ચાર રસ્તા વિસ્તારમાંથી એક અત્યંત ચોંકાવનારો અને વિચિત્ર કિસ્સો સામે આવ્યો છે. અહીંના મુખ્ય માર્ગ પર આવેલું અને વર્ષોથી હજારો નાગરિકો માટે અનુકૂળ બનેલું AMTS (અમદાવાદ મ્યુનિસિપલ ટ્રાન્સપોર્ટ સર્વિસ)નું બસ સ્ટેન્ડ રાતોરાત ગાયબ થઈ ગયું છે. દરરોજની જેમ સવારે જ્યારે મુસાફરો બસની રાહ જોવા માટે બસ સ્ટેન્ડ પર પહોંચ્યા, ત્યારે ત્યાં બસ સ્ટેન્ડ જ ગાયબ જોઈને સૌ કોઈ આશ્ચર્યચકિત થઈ ગયા હતા. આટલા વ્યસ્ત ચાર રસ્તા પરથી આખેઆખું બસ સ્ટેન્ડ ક્યાં ગાયબ થઈ ગયું તે વાત અત્યારે સમગ્ર શહેરમાં કૌતુક અને ચર્ચાનો વિષય બની છે.
AMTSના અધિકારીઓ બેખબર
આ ઘટનાની સૌથી ગંભીર બાબત તો એ છે કે ખુદ અમદાવાદ મ્યુનિસિપલ કોર્પોરેશન (AMC) અને AMTSના ઉચ્ચ અધિકારીઓ આ આખી બાબતથી સાવ અજાણ છે. તંત્રના જવાબદાર અધિકારીઓ પાસે આ અંગે કોઈ જ સ્પષ્ટ માહિતી નથી કે બસ સ્ટેન્ડ ક્યારે, ક્યાં અને કોના આદેશથી હટાવવામાં આવ્યું છે. જ્યારે આ અંગે તંત્રનો સંપર્ક કરવામાં આવ્યો ત્યારે કોઈ પણ અધિકારી સંતોષકારક જવાબ આપી શક્યા ન હતા. આ ઘટનાએ પુરવાર કર્યું છે કે જાહેર સંપત્તિની સુરક્ષા અને તેની જાળવણી પ્રત્યે સરકારી તંત્ર કેટલું બિનજવાબદાર છે.
સ્થાનિકોમાં અનેક શંકા-કુશંકાઓ
બસ સ્ટેન્ડ અચાનક ગાયબ થતાં સ્થાનિક રહીશો અને વેપારીઓમાં રોષ સાથે અનેક આશંકાઓ જાગી રહી છે. બસ સ્ટેન્ડની બિલકુલ પાછળ એક ખુલ્લો પ્લોટ આવેલો હોવાથી, લોકો શંકા વ્યક્ત કરી રહ્યા છે કે કોઈ મોટા બિલ્ડરના અંગત ફાયદા કે રસ્તાના એક્સેસ માટે રાતોરાત આ બસ સ્ટેન્ડ હટાવી દેવાયું હોઈ શકે છે. જો આ બસ સ્ટેન્ડ અધિકારીઓની મિલીભગતથી દૂર કરાયું હોય તો તે મોટા ભ્રષ્ટાચાર તરફ ઈશારો કરે છે, અને જો તે ખરેખર ચોરાઈ ગયું હોય તો સ્માર્ટ સિટી અમદાવાદની કાયદો અને વ્યવસ્થા પર મોટા સવાલો ઊભા થાય છે.
જાહેર સંપત્તિની સુરક્ષા પર મોટો સવાલ
અમદાવાદ જેવા મોટા અને વિકસિત મેટ્રોપોલિટન શહેરમાં રાત્રિના સમયે ક્રૂઝ કે જેસીબી લાવીને આખું લોખંડનું બસ સ્ટેન્ડ ઉખાડીને લઈ જવામાં આવે અને પોલીસ કે તંત્રને ખબર પણ ન પડે તે વાત ગળે ઊતરે તેવી નથી. જો આ કોઈ તસ્કરોનું કારનામું હોય તો જાહેર સંપત્તિ સુરક્ષિત નથી તે સ્પષ્ટ થાય છે. બીજી તરફ, જો તંત્રના જ કોઈ કર્મચારી કે કોન્ટ્રાક્ટરે તેને હટાવ્યું હોય તો વગર કોઈ પૂર્વ સૂચનાએ કે ચોક્કસ આદેશ વગર બસ સ્ટેન્ડ હટાવવાની હિંમત કોણે કરી તે તપાસનો વિષય છે.
કડક તપાસ અને જવાબદારો સામે કાર્યવાહીની માંગ
હાલમાં AMTS દ્વારા મોટાભાગના રૂટની બસોને BRTS કોરિડોરમાં શિફ્ટ કરવાની પ્રક્રિયા ચાલી રહી છે, પરંતુ તેનો અર્થ એવો બિલકુલ નથી કે જૂના બસ સ્ટેન્ડ આ રીતે રાતોરાત બિનવારસી બની જાય. જોધપુર ચાર રસ્તા પર બનેલી આ ઘટના તંત્રની ઘોર બેદરકારીનું ઉત્તમ ઉદાહરણ છે. શહેરીજનો અને મુસાફરો માંગ કરી રહ્યા છે કે સીસીટીવી ફુટેજ તપાસીને આ ઘટનાની તટસ્થ તપાસ કરવામાં આવે અને આ કૃત્ય કરનાર કે કરાવનાર તમામ જવાબદારો સામે કડકમાં કડક પગલાં ભરવામાં આવે.
