Amreli-Savarkundla Highway Accident: અમરેલી-સાવરકુંડલા નેશનલ હાઈવે પર આજે સવારે એક અત્યંત હૃદયદ્રાવક અને ગમખ્વાર માર્ગ અકસ્માત સર્જાયો હતો, જેણે સમગ્ર પંથકમાં અરેરાટી ફેલાવી દીધી છે. અમરેલીથી સાવરકુંડલા તરફ જઈ રહેલી એસ.ટી. બસ (GJ-18-ZT-3660) જ્યારે ગોખરવાળા નજીક આવેલા શેત્રુંજી નદીના પુલ પાસેથી પસાર થઈ રહી હતી, ત્યારે સામેથી આવી રહેલી એક મોટરસાઈકલ સાથે ધડાકાભેર ટક્કર થઈ હતી. અકસ્માત એટલો ભયાનક હતો કે ટક્કર બાદ બસ પણ રોડ પરથી નીચે ખાડામાં ઉતરી ગઈ હતી અને હાઈવે પર મુસાફરોની ચીચીયારીઓ ગુંજી ઉઠી હતી.
અકસ્માત પાછળનું ચોંકાવનારું કારણ આવ્યું સામે
પ્રાથમિક તપાસ અને મળતી વિગતો અનુસાર, આ કરૂણ દુર્ઘટના પાછળ એક અન્ય વાહનની ટક્કર નિમિત્ત બની હોવાનું સામે આવ્યું છે. એસ.ટી. બસ શેત્રુંજી નદીના પુલ પરથી પસાર થઈ રહી હતી તે સમયે સામેથી આવતી એક બોલેરો ગાડીનું કેરિયર બસના સાઈડ મિરર સાથે અથડાયું હતું. આ ટક્કરથી સાઈડ મિરરનો કાચ તૂટીને સીધો બસ ચાલકને વાગ્યો હતો, જેના કારણે ચાલકે સ્ટીયરિંગ પરથી કાબૂ ગુમાવી દીધો હતો. બેકાબૂ બનેલી બસ સામેથી આવતી બાઈક સાથે અથડાતા આ મોટી જાનહાનિ સર્જાઈ હતી.
એક જ પરિવારના 3 સભ્યો અને બસ ડ્રાઈવરનું ઘટનાસ્થળે જ મોત
આ ગોઝારા અકસ્માતમાં બાઈક પર સવાર એક હસતો-રમતો પરિવાર વિખેરાઈ ગયો છે. અકસ્માતની ગંભીરતા એટલી હતી કે બાઈક ચાલક પિતા, તેમના બે નાના બાળકો અને એસ.ટી. બસના ડ્રાઈવર એમ કુલ 4 લોકોના ઘટનાસ્થળે જ કમકમાટીભર્યા મોત નિપજ્યા હતા. આ દુર્ઘટનામાં મૃત્યુ પામેલા કમનસીબ લોકોની ઓળખ નીચે મુજબ થઈ છે:
ગોગનભાઈ બટુકભાઈ સોલંકી (ઉંમર: 37 વર્ષ - બાઈક સવાર પિતા)
નીતિન ગોગનભાઈ સોલંકી (ઉંમર: 4 વર્ષ - પુત્ર)
ધૃતિ ગોગનભાઈ સોલંકી (ઉંમર: 6 માસ - માસૂમ પુત્રી)
મેહુલભાઈ વાળા (ઉંમર: 35 વર્ષ - એસ.ટી. બસ ડ્રાઈવર)
આ ઉપરાંત અકસ્માતમાં અન્ય કેટલાક મુસાફરો પણ ઈજાગ્રસ્ત થયા હતા, જેમને તાત્કાલિક સારવાર માટે ખસેડવામાં આવ્યા હતા.
સ્થાનિકોની મદદ અને પોલીસ તંત્રની ત્વરિત કાર્યવાહી
અકસ્માતનો પ્રચંડ અવાજ સાંભળીને આસપાસના રાહદારીઓ અને સ્થાનિક વાહનચાલકો તાત્કાલિક મદદ માટે દોડી આવ્યા હતા. ઘટનાસ્થળે ભારે અફરાતફરી અને ટ્રાફિક જામના દ્રશ્યો સર્જાયા હતા. સ્થાનિક લોકોએ સમયસૂચકતા વાપરીને તુરંત 108 ઈમરજન્સી એમ્બ્યુલન્સને જાણ કરી હતી, જેના પગલે 108ની ટીમ ઘટનાસ્થળે પહોંચી હતી અને તમામ ઈજાગ્રસ્તો તથા મૃતદેહોને અમરેલી સિવિલ હોસ્પિટલ ખાતે ખસેડવાની કામગીરી હાથ ધરી હતી. બનાવની જાણ થતા જ અમરેલી તાલુકા પોલીસનો કાફલો અને એસ.ટી. વિભાગના ઉચ્ચ અધિકારીઓ પણ સ્થળ પર દોડી આવ્યા હતા અને અકસ્માતનો ગુનો નોંધી આગળની કાયદેસરની તપાસ તેજ કરી છે.
જિલ્લા ભાજપ પ્રમુખ અતુલભાઈ કાનાણી સિવિલ હોસ્પિટલ દોડી ગયા
આ કરૂણ દુર્ઘટનાના સમાચાર મળતા જ વહીવટી તંત્ર અને રાજકીય આગેવાનોમાં દોડધામ મચી ગઈ હતી. અમરેલી જિલ્લા ભાજપ પ્રમુખ અતુલભાઈ કાનાણી કોઈ પણ વિલંબ કર્યા વિના તાત્કાલિક અમરેલી સિવિલ હોસ્પિટલ ખાતે પહોંચ્યા હતા. તેમણે ઈમરજન્સી વોર્ડમાં જઈને અકસ્માતમાં ઘાયલ થયેલા મુસાફરોની રૂબરૂ મુલાકાત લીધી હતી અને તેમના ખબરઅંતર પૂછ્યા હતા. પરિસ્થિતિની ગંભીરતાને જોતા તેમણે હોસ્પિટલના તબીબો અને અધિકારીઓ સાથે તાકીદની બેઠક યોજીને તમામ ઈજાગ્રસ્તોને શ્રેષ્ઠ અને ઝડપી સારવાર મળે તેવી કડક સૂચના આપી હતી. આ સાથે જ તેમણે મૃતકોના શોકસંતપ્ત પરિવારજનો પ્રત્યે ઊંડી સંવેદના વ્યક્ત કરી દુઃખની આ ઘડીમાં સરકાર અને પક્ષ તેમની સાથે હોવાનું આશ્વાસન આપ્યું હતું.








