Asiatic Lion Seriously Injured After Being Hit by Goods Train: અમરેલી જિલ્લામાં એશિયાટિક સિંહો અને વન્યજીવોની સુરક્ષા પર ફરી એકવાર મોટા પ્રશ્નાર્થચિહ્નો ઊભા થયા છે. લીલિયા અને દામનગર વચ્ચેથી પસાર થતી રેલવે લાઈન પર એક એશિયાટિક સિંહ માલગાડીની અડફેટે આવી જતાં ભારે સળવળાટ મચી ગયો છે. પીપાવાવ પોર્ટ તરફથી માલસામાન ભરીને ઢસા તરફ પૂરપાટ ઝડપે જઈ રહેલી માલગાડીનો ભોગ આ સાવજ બન્યો હતો. ટ્રેક ક્રોસ કરતી વખતે અચાનક બનેલી આ ઘટનાને કારણે સિંહ ગંભીર રીતે ઈજાગ્રસ્ત થયો છે.
60 થી 70 કિમીની પૂરપાટ ઝડપે દોડતી ટ્રેને લીધો અડફેટે
પ્રાપ્ત વિગતો અનુસાર, પીપાવાવ પોર્ટથી નીકળેલી માલગાડી આશરે 60 થી 70 કિલોમીટર પ્રતિ કલાકની ભારે ઝડપે દોડી રહી હતી. લીલિયા-દામનગર રેલવે સેક્શન પરથી માલગાડી પસાર થઈ રહી હતી ત્યારે જ એક સિંહ ટ્રેક ઓળંગવાનો પ્રયાસ કરી રહ્યો હતો. ટ્રેનની ઝડપ વધુ હોવાથી લોકો પાયલટ બ્રેક મારે તે પહેલાં જ ટ્રેનનું એન્જિન સિંહના પાછળના ભાગ અને પૂંછડી સાથે અથડાઈ ગયું હતું. આ ભયાનક અકસ્માતમાં સિંહની પૂંછડી કપાઈ ગઈ હતી અને પાછળના ભાગે ગંભીર ઈજાઓ પહોંચી હતી.
દર્દથી કણસતો સાવજ નજીકના ખેતરોમાં છુપાયો
ટ્રેનની જોરદાર ટક્કર વાગતાં જ સિંહ લોહીલુહાણ થઈ ગયો હતો. ઈજા પામ્યા બાદ સિંહ દર્દથી કણસતો કણસતો રેલવે ટ્રેકની આસપાસ આવેલા રેવન્યુ વિસ્તારના ખેતરો તરફ ભાગી છૂટ્યો હતો. અકસ્માત બાદ તરત જ રેલવે સ્ટાફ દ્વારા આ ઘટના અંગે વન વિભાગને જાણ કરવામાં આવી હતી. ગંભીર રીતે ઘાયલ થયેલો વનરાજ ખેતરોમાં છુપાયો હોવાના સમાચાર વાયુવેગે પ્રસરતાં જ આસપાસના ગ્રામ્ય વિસ્તારોના ખેડૂટો અને સ્થાનિક રહીશોમાં ભારે ફફડાટ અને ડરનો માહોલ સર્જાયો છે.
ઈજાગ્રસ્ત સિંહ વધુ આક્રમક બનવાની શક્યતાથી સ્થાનિકોમાં ચિંતા
વન્યજીવ નિષ્ણાતો અને વનકર્મીઓના જણાવ્યા મુજબ, જ્યારે કોઈ વન્યજીવ અને ખાસ કરીને સિંહ જેવા શિકારી પ્રાણી ઈજાગ્રસ્ત થાય છે, ત્યારે તે સામાન્ય કરતાં વધુ આક્રમક અને હિંસક બની જવાની સંભાવના રહે છે. દર્દ અને અસુરક્ષાની ભય વચ્ચે સિંહ ખેતરોમાં ગમે ત્યારે વળતો પ્રહાર કરી શકે છે. આ જ કારણોસર વન વિભાગે નજીકના ગ્રામજનોને ખેતરો તરફ જતી વખતે વિશેષ સાવચેતી રાખવા અને સતર્ક રહેવા માટે સૂચના આપી છે.
વન વિભાગનું બૃહદ સર્ચ અને રેસ્ક્યુ ઓપરેશન શરૂ
બનાવની જાણ થતાં જ અમરેલી વન વિભાગનો ઉચ્ચ અધિકારીઓ સહિતનો મોટો કાફલો, વનકર્મીઓ અને નિષ્ણાત રેસ્ક્યુ ટીમો તાત્કાલિક ઘટનાસ્થળે દોડી આવી હતી. વન વિભાગની જુદી જુદી ટીમો દ્વારા સિંહના પગના નિશાન (પગમાર્ક) અને જમીન પર પડેલા લોહીના ડાઘાના આધારે ખેતરોમાં સઘન શોધખોળ શરૂ કરવામાં આવી છે. વન વિભાગનો મુખ્ય ઉદ્દેશ્ય ઈજાગ્રસ્ત સિંહને વહેલી તકે શોધીને ટ્રેન્કુલાઈઝ કરી, તેને તાત્કાલિક ધોરણે સારવાર માટે વન્યજીવ હોસ્પિટલ પહોંચાડવાનો છે જેથી તેનો જીવ બચાવી શકાય.
