Ahmedabad Municipal Corporation CCRS App Update: અમદાવાદ મ્યુનિસિપલ કોર્પોરેશન (AMC) દ્વારા નાગરિકોની સરળતા માટે તૈયાર કરવામાં આવેલી CCRS (કોમ્પ્રિહેન્સિવ કમ્પ્લેઈન્ટ રિડ્રેસલ સિસ્ટમ) એપ્લિકેશન હાલમાં વિવાદોના ઘેરાવામાં આવી છે. નાગરિકોનો આરોપ છે કે એપમાં કરવામાં આવેલા નવા અપડેટ બાદ ફરિયાદ નોંધાવવાની મર્યાદાઓ નક્કી કરી દેવામાં આવી છે. એક દિવસમાં માત્ર 1 થી 3 ફરિયાદો જ નોંધી શકાય છે અને ત્યારબાદ નવી ફરિયાદ સ્વીકારવામાં આવતી નથી. અગાઉ એપમાં આવી કોઈપણ મર્યાદા ન હોવાથી નાગરિકોમાં રોષ ભભૂકી ઉઠ્યો છે.
આઈફોનમાં ટેક્નિકલ ખામી અને લાંબો સમય બગાડ
શહેરના જાગૃત નાગરિકોના જણાવ્યા અનુસાર, આ એપ આઈફોન યુઝર્સ માટે લગભગ 70 દિવસ સુધી બંધ હાલતમાં રહી હતી. આ ગંભીર ટેક્નિકલ ખામી અંગે સીપીગ્રામ્સ (CPGRAMS) પોર્ટલ, મુખ્યમંત્રી કાર્યાલય તેમજ મેયર સમક્ષ અનેક વખત રજૂઆતો કરવા છતાં કોઈ જ સંતોષકારક ઉકેલ આવ્યો નથી. એક તરફ તંત્ર ડિજિટલ ઇન્ડિયા અને સ્માર્ટ સિટીની મોટી મોટી વાતો કરે છે, તો બીજી તરફ ખુદ ફરિયાદ નિવારણ માટેની એપ્લિકેશન જ નાગરિકો માટે મુસીબત બની ગઈ છે.
ફરિયાદ વોર્ડ બદલીને ફરતી રહેવાની અજીબોગરીબ ઘટના
એપની નબળી કામગીરીનું ઉદાહરણ આપતા સંસ્થાના પદાધિકારીઓએ જણાવ્યું કે, નવા વાડજ વિસ્તારમાં રોડ પરના ખાડા અંગે કરવામાં આવેલી ફરિયાદ સંબંધિત વોર્ડમાં નિવારણ પામવાને બદલે નવા વાડજ, બાપુનગર અને સ્ટેડિયમ એમ ત્રણ અલગ-અલગ વોર્ડમાં રઝળતી રહી હતી. જ્યારે એપમાં લોકેશન નાખવાથી આપમેળે જ સાચો વોર્ડ નક્કી થઈ જતો હોય છે, ત્યારે આ પ્રકારે ફરિયાદ અલગ-અલગ વોર્ડમાં ફરતી રહેવાથી તંત્રની કામગીરી સામે મોટા સવાલો ખડા થયા છે.
ઓઢવના જાગૃત નાગરિકને વ્યક્તિગત માહિતી લીક થવાની ધમકી
વિવાદનો વ્યાપ ત્યારે વધુ વધ્યો જ્યારે ઓઢવ વિસ્તારના એક નાગરિકે ગંભીર આક્ષેપ કર્યો કે તેમણે કચરા અને રખડતાં ઢોર અંગે ફરિયાદ કરી હતી, ત્યારે કોર્પોરેશનના કર્મચારીઓએ તેમનું નામ, સરનામું અને ફોન નંબર સીધા ગાયના માલિકને આપી દીધા હતા. પરિણામે, 10 થી 15 લોકો ફરિયાદીના ઘરે પહોંચી ગયા હતા અને તેમને જાનથી મારી નાખવાની ધમકીઓ આપી હતી. આ પ્રકારના અસુરક્ષિત વ્યવહારને કારણે નાગરિકોમાં ડર અને અસંતોષનું વાતાવરણ ફેલાયું છે.
તંત્ર દ્વારા તમામ આક્ષેપો ફગાવી દેવાયા
નાગરિકો અને વિવિધ સંસ્થાઓ દ્વારા ઉઠાવવામાં આવેલા આ તમામ ગંભીર સવાલો અને આક્ષેપો અંગે ડેપ્યુટી મ્યુનિસિપલ કમિશનરે તમામ દાવાઓને સદંતર ફગાવી દીધા છે. તંત્રનું કહેવું છે કે CCRS એપ્લિકેશન આઈફોનમાં પણ યોગ્ય રીતે કામ કરી રહી છે અને તેમાં કોઈપણ પ્રકારની ફરિયાદ મર્યાદા રાખવામાં આવી નથી. આમ છતાં, જાગૃત નાગરિકોએ પારદર્શક અને સરળ સુવિધાની માંગણી સાથે તંત્ર વિરુદ્ધ કડક રજૂઆતો ચાલુ રાખી છે.
