ગુજરાતમાં નવરાત્રિ પર વરસાદનું સંકટ? અંબાલાલ પટેલની મોસમને લઈને મોટી આગાહી, જાણી લો હવામાનનો નવો મિજાજ

Gujarat Weather Update: ગુજરાતમાં આ વર્ષે ધોધમાર વરસાદ વરસ્યા બાદ હવે મેઘરાજા ધીમે ધીમે વિદાય તરફ આગળ વધી રહ્યા છે. પરંતુ ચોમાસાની સત્તાવાર વિદાયની ઘડીઓ વચ્ચે પણ હવામાનમાં મોટા પલટા આવવાની પૂરેપૂરી સંભાવનાઓ વર્તાઈ રહી છે. પ્રખ્યાત હવામાન નિષ્ણાત અંબાલાલ પટેલના જણાવ્યા મુજબ, ચોમાસાના અંતિમ તબક્કામાં રાજ્યમાં વાતાવરણ સતત બદલાતું રહેશે. એક તરફ વાદળછાયું વાતાવરણ અને બીજી તરફ તીવ્ર ગરમીનો પ્રકોપ લોકોને અકળાવશે. આ પરિસ્થિતિ વચ્ચે ગરબા ઉત્સવ નવરાત્રિના આયોજનો પર હવામાનનો આ નવો મિજાજ કેવી અસર કરશે, તે અંગે સમગ્ર રાજ્યના ખેલૈયાઓ અને આયોજકોમાં મોટો ચિંતાનો વિષય બન્યો છે.

સપ્ટેમ્બરના અંતમાં વરસાદી સિસ્ટમ થશે સક્રિય
અંબાલાલ પટેલની આગાહી અનુસાર, સપ્ટેમ્બર મહિનાના અંતિમ દિવસોમાં બંગાળની ખાડીમાં નવી વરસાદી સિસ્ટમ આકાર લઈ શકે છે. આ સિસ્ટમ આંધ્ર પ્રદેશ અને ઓડિશાના દરિયાકાંઠે થઈને ભારતના આંતરિક ભાગો પર અસર પહોંચાડશે. જેના પરિણામે 24 થી 30 સપ્ટેમ્બર દરમિયાન ગુજરાતના ખાસ કરીને પૂર્વ અને ઉત્તર ભાગોમાં ભારે પવન અને ગાજવીજ સાથે વરસાદી ઝાપટાં પડી શકે છે. આ દિવસો દરમિયાન અનેક જિલ્લાઓમાં ગાજવીજ સાથે વાતાવરણમાં અચાનક બદલાવ જોવા મળશે.

અકળાવનારી ગરમીનો પ્રકોપ અને ખેડૂતો માટે રાહત
વરસાદના રાઉન્ડ ઉપરાંત રાજ્યમાં બફારા અને ગરમીનું પ્રમાણ પણ નોંધપાત્ર રીતે વધશે. અંબાલાલ પટેલે સ્પષ્ટ કર્યું છે કે સપ્ટેમ્બરના પાછલા દિવસોથી લઈને ઓક્ટોબરના અંત સુધી રાજ્યમાં ગરમીનું જોર વધશે. આ અકળાવનારી ગરમીથી સામાન્ય લોકોને મુશ્કેલી પડી શકે છે, પરંતુ કૃષિ ક્ષેત્ર માટે આ તાપમાન અત્યંત ફાયદાકારક સાબિત થશે. ખેતરોમાં ઊભા પાકના દાણા બરાબર સુકાય અને પાક તૈયાર થાય તે માટે આ કડક તાપમાન જરૂરી છે.

નવરાત્રિમાં ખેલૈયાઓની મજા બગાડશે વરસાદી ઝાપટાં?
ગરબાના રસિયાઓ માટે સૌથી મોટા સમાચાર નવરાત્રિ દરમિયાનના હવામાનને લઈને છે. અંબાલાલ પટેલના અનુમાન પ્રમાણે, ઓક્ટોબરમાં શરૂ થતા નવરાત્રિના દિવસોમાં વાતાવરણ ભેજવાળું રહેશે. ઓક્ટોબરની શરૂઆતમાં તથા નવરાત્રિ દરમિયાન રાજ્યના કેટલાક ભાગોમાં અચાનક વરસાદી ઝાપટાં ખાબકી શકે છે. બપોરના સમયે કાળઝાળ ગરમી અને સાંજના સમયે વાદળછાયું વાતાવરણ કે છૂટોછવાયો વરસાદ ગરબાના આયોજનોમાં વિઘ્ન ઊભું કરી શકે છે, જેના કારણે ગરબા રસિકોએ સાવચેતી રાખવી પડશે.

બંગાળની ખાડીની હિલચાલ પર હવામાન ખાતાની નજર
દરિયાઈ વાતાવરણ અને વાવાઝોડા જેવી સ્થિતિ પર નજર રાખતા હવામાન નિષ્ણાતો જણાવે છે કે, બંગાળની ખાડીમાં થતી સતત હિલચાલ ગુજરાતના તાપમાન અને વરસાદ પર સીધી અસર કરી રહી છે. ચોમાસાની વિદાય રેખા નજીક હોવા છતાં, સાયક્લોનિક સર્ક્યુલેશન અને લો-પ્રેશર સિસ્ટમ સમય અંતરે સક્રિય થઈ રહી છે. પરિણામે, રાજ્યમાં વિધિવત રીતે ઠંડીની શરૂઆત થાય તે પહેલાં લોકોએ ગરમી, બફારા અને વચ્ચે-વચ્ચે આવતા વરસાદી માહોલ સામનો કરવો પડશે.