Ambaji Temple new Flag Rules: વિશ્વપ્રસિદ્ધ શક્તિપીઠ અંબાજી મંદિરમાં દર્શન માટે રોજ લાખો ભક્તો પહોંચે છે. માતાજી પ્રત્યે પોતાની આસ્થા વ્યક્ત કરવા માટે ભક્તો ધજા ચઢાવવાની પરંપરા લાંબા સમયથી અનુસરી રહ્યા છે. જોકે હવે આ પરંપરામાં એક મહત્વનો અને જરૂરી ફેરફાર કરવામાં આવ્યો છે. અંબાજી દેવસ્થાન ટ્રસ્ટ દ્વારા ભક્તોની સલામતી તથા મંદિરના સુવર્ણ શિખરની સુરક્ષાને ધ્યાનમાં રાખીને નવી માર્ગદર્શિકા જાહેર કરવામાં આવી છે.
શું છે નવો નિયમ?
હવેથી મંદિરના શિખર પર વધુમાં વધુ 5 મીટર લંબાઈની જ ધજા ચઢાવી શકાશે. મંદિર ટ્રસ્ટ દ્વારા જાહેર કરવામાં આવેલા નિર્ણય મુજબ આ નવો નિયમ 1 જાન્યુઆરી 2026થી અમલમાં આવશે. ધજા ચઢાવવા ઇચ્છતા ભક્તોએ અગાઉથી ઓનલાઈન અથવા ઓફલાઈન રીતે સ્લોટ બુક કરાવવો ફરજિયાત રહેશે. આ વ્યવસ્થા થકી ધજા ચઢાવવાની પ્રક્રિયામાં વ્યવસ્થિતતા આવશે તેમજ ભીડ નિયંત્રણમાં પણ મદદ મળશે.
આ નિર્ણય પાછળના કારણો
આ નિર્ણય પાછળ મહત્વના કારણો જવાબદાર છે. મંદિર વહીવટીતંત્રે ટેકનિકલ નિષ્ણાતો સાથે મળીને કરેલા સર્વેક્ષણમાં જાણવા મળ્યું હતું કે, મંદિરના મુખ્ય શિખર પર લાગેલો ધ્વજદંડ લગભગ 15 વર્ષ જૂનો થઈ ગયો છે. રોજના ધોરણે 50થી 60 ધજાઓ ચઢાવવામાં આવતી હોવાથી તેના વજન અને પવનના સતત દબાણથી ધ્વજદંડને નુકસાન થવાની શક્યતા વધી ગઈ છે. લાંબા સમય સુધી આ સ્થિતિ ચાલુ રહે તો કોઈ મોટી દુર્ઘટના સર્જાઈ શકે તેવી આશંકા વ્યક્ત કરવામાં આવી હતી.
ટેકનિકલ તપાસમાં શું સામે આવ્યું?
ખાસ કરીને અત્યંત લાંબી ધજાઓ પવનમાં લહેરાય ત્યારે તે મંદિરના સુવર્ણ શિખરના કવચ સાથે ઘસાય છે. આ ઘસારાના કારણે સોનાના કવચને નુકસાન થતું હોવાનું પણ ટેકનિકલ તપાસમાં સામે આવ્યું છે. ઉપરાંત, કેટલાક ભક્તો 50 ગજ કે તેનાથી પણ વધુ લંબાઈની ધજાઓ લઈને આવે છે. આવી લાંબી ધજાઓ જમીન સુધી લટકતી હોવાથી અન્ય યાત્રિકોના પગમાં ફસાઈ જવાનો ભય રહે છે, જેના કારણે અકસ્માત થવાની શક્યતા વધી જાય છે. સાથે જ, અવરજવર કરતી વખતે અન્ય ભક્તોની ધાર્મિક લાગણીને પણ ઠેસ પહોંચી શકે છે.
સલામતી સંબંધિત તમામ પાસાઓનું ગંભીરતાપૂર્વક મૂલ્યાંકન
આ સમગ્ર મુદ્દે નિર્ણય લેતા પહેલાં મંદિરના ભટ્ટજી મહારાજ સાથે વિસ્તૃત પરામર્શ કરવામાં આવ્યો હતો. શાસ્ત્રોક્ત વિધિ, પરંપરા અને ધાર્મિક માન્યતાઓ જળવાઈ રહે તે રીતે 5 મીટરની મર્યાદા નક્કી કરવામાં આવી છે. સાથે સાથે ભવિષ્યમાં કોઈ અનિચ્છનીય ઘટના ન બને તે માટે ટેકનિકલ સર્વે અને સલામતી સંબંધિત તમામ પાસાઓનું ગંભીરતાપૂર્વક મૂલ્યાંકન કરવામાં આવ્યું હતું.
યાત્રિકો માટે દર્શન વધુ સુરક્ષિત બનશે
અંબાજી દેવસ્થાન ટ્રસ્ટે તમામ ભક્તો, ધાર્મિક સંગઠનો અને સંઘોને અપીલ કરી છે કે તેઓ મંદિરની પવિત્રતા અને સલામતી જાળવવા માટે આ નિર્ણયમાં પૂર્ણ સહકાર આપે. લાંબી ધજાઓ લાવવાને બદલે નિર્ધારિત માપની ધજાઓ દ્વારા માતાજી પ્રત્યે પોતાની શ્રદ્ધા અને ભક્તિ વ્યક્ત કરવા માટે ભક્તોને અનુરોધ કરવામાં આવ્યો છે. આ નિર્ણયથી મંદિરની સુરક્ષા મજબૂત બનશે અને તમામ યાત્રિકો માટે દર્શન વધુ સુરક્ષિત બની રહેશે.
